Cristo cheit'ee ewate nùdaipia bù
5
1 Âpemaarã, taipa jarada–e jõmasaa taarãit'ee Jesús cheit'ee. Naaweda jaradap'edaak'a, apidaapa k'awada–e sãapaita iru cheit'ee. 2 Parãpa pia k'awa p'anù ma ewate pait'ee eperãarã atu p'anùde. Nechùapari p'ãrik'ua cheparik'a eperã temãi chi te chipari atu bùde, mãgá pait'ee. 3 Cristode ijãadak'aa beerãpa jara p'anù misa: “Tachi k'ãiwee p'anù, nepùra wêe,” atu p'anùde ma ewate cheit'ee mãik'aapa Tachi Ak'õrepa ãchi ârù ne–inaa k'achia pëiit'ee, ichia k'îsia iru bù ooit'ee ãchimaa. Ara wêra biak'oo bù atu baparik'a bi p'iradaik'ãri warra t'oit'ee, mãga pùk'a ijãadak'aa beerã atu p'anadait'ee. Ma ewate apida uchiada–e pait'ee Tachi Ak'õre juadeepa.4 Mamîda âpemaarã, parã p'ãriu pùk'a bùde p'anadak'aa ma ijãadak'aa beerã p'anapatak'a, Tachi Waibùa atu p'anùde cheit'ee perã. 5 Ma k'ãyaara ma ewate nùmaa p'anù Tachi Ak'õre âdaa pùk'a bùde p'anapata perã, Jesucristode ijãadap'eda. Irude ijãadak'ãriipa tachi waa p'ãriu pùk'a bùde p'anadak'aa. 6 Ma et'ewa jarada wãara perã, k'ãi pùk'a p'anadaik'araa bù awaraarãk'a. Ma k'ãyaara k'îra jîp'a p'anadáma, Cristo cheit'ee ewate nù p'anù misa. 7 P'ãrik'ua eperãarã k'ãipata mãik'aapa it'ua topata, Tachi Ak'õre net'aa k'îsiada–ee. 8 Mamîda tachi ijãapataarã mãgá pariatua p'anadak'aa, Ak'õre âdaa pùk'a bùde p'anadairã. Mapa k'îra jîp'a p'anapataadaipia bù. Waapùara Tachi Waibùade ijãadaipia bù mãik'aapa audupùara chik'inia p'anapataadaipia bù, k'awa p'anadairã Cristopa tachi ata chek'ãri, ichi ome p'ananadait'ee Tachi Ak'õre truade. 9 Tachi Ak'õrepa tachi jùrùt'era–e paji tachi k'achia ooit'ee ma ewate. Jîp'a jùrùt'eraji ichi truade ichita p'ananadamerã Tachi Waibùa Jesucristo k'aurepa. 10 Ma–it'ee Jesucristo piuji tachi ijãapataarã pari, ichi ome araa p'anapataadamerã, chok'ai p'anù mîda wa piu p'anù pùjida. 11 Maperã o–îa para bátù mãik'aapa chik'aripa p'anapatáatù oodait'ee irua oopi bùk'a, parãpa nãgaweda oomaa p'anùk'a.
Pablopa jarada na k'art'a p'ã aupa wãk'ãri
12 Âpemaarã, taipa enenee jõnù waaweedamerã pãchi ijãapataarã poro waibùarã, ãchi audú mimiapata perã parã–it'ee. Ãchia parã ûraapata mãik'aapa ak'ùpata Tachi Waibùapa k'inia bùk'a. 13 Mapa parãpa ãchi pia ak'ùdaipia bù mãik'aapa k'inia iru p'anadaipia bù. K'ãiwee p'anapatáatù ãchi ome mãik'aapa jõmaarã ijãapataarã ome.
14 Ichiaba âpemaarã, taipa parã ûraadait'ee jaradamerã chi mimia k'iniada–ee p'anùùrãmaa mimiadamerã. K'aripátù chi pia chooda–ee p'anùùrã nepùra k'aurepa. Ichiaba k'aripátù chi Cristode ijãadai naaweda ne–inaa k'achia oodap'edaarã, mãùrãpa ârá oodamerã Cristopa oopi bùk'a. Mãùmisa t'ãri pia p'anapatáatù jõmaarã ome.
15 Pia p'anapatáatù parãdepema apidaapa ne–inaa k'achia oonaadamerã. Mãga p'anadaipia bù awaraarãpa parãmaa ne–inaa k'achia ooruta pùjida. Ichita jùrùpatáatù ne–inaa pia oodait'ee pãchi t'ãidepema ijãapataarãmaa mãik'aapa jõmaarãmaa.
16 Ichita t'ãri o–îa p'anapatáatù. 17 Ichita ùt'aa t'âpatáatù. 18 Ichita Tachi Ak'õremaa gracias jarapatáatù, Ak'õrepa mãgata k'inia bairã Jesucristode ijãapataarãpa oodamerã.
19 Tachi Ak'õre Jaurepa ijãaparimaa ne–inaa jarapiru pùrã maa–e pùrã ne–inaa oopiru pùrã, ita–aria oopítù. 20 Pia ûrítù apidaapa jaradak'ãri: “Tachi Ak'õre Jaurepa mùmaa na pedee jarapimaa bù.” 21 Mãgà pedee ûridap'eda, pia k'îsíatù k'awaadait'ee ûraa pia wa k'achia. Ûraa pia bù pùrã, óotù ma ûraade jara bùk'a. Mamîda pia–e bù pùrã, Tachi Ak'õre Jauredepema–e. Mapa ne–inaa jõma mãgá ak'ùdaipia bù k'awaadait'ee wãara Ak'õrepa oopi bùk'a wa mãga–e. 22 Ne–inaa k'achia apida oonáatù.
23 Ârá ùt'aa iidi k'inia p'anù Tachi Ak'õremaa parã pari. Iruata tachi k'ãiwee p'anapipari. Mapa iidi p'anù irua parã awara bùmerã pãchi t'ãride, oo k'inia p'anadamerã irua oopi bùk'a; pãchi k'ap'ùade, p'ek'au k'achia oo amaadamerã; pãchi jaurede, parãpa iru Jauremaa oopidamerã irua oopi k'inia bùk'a parãmaa. Mãgá irua parã pia ak'ùit'ee Tachi Waibùa Jesucristo waya chek'ãri. 24 Tachi Ak'õre, parã jùrùdapa mãga ooit'ee parã ome, oopari perã ichia jara bùk'a.
Salude pëida
25 Âpemaarã, ichiaba tai pari ùt'aa t'âpatáatù.
26 Tai pari saludaa para bátù ak'ùpidait'ee chik'inia p'anù.
27 Tachi Waibùa Jesucristopa mùmaa jarapiru na k'art'a leedamerã tachi âpemaarã jõmaarã taide.
28 Mùa ùt'aa iidi bù Tachi Waibùa Jesucristopa parã pia ak'ù bapariimerã.
Mãgapai paji.