3
1 Mãpai tai waa chooda–e pak'ãri parã ak'ùda–ee, k'îsiajida: “¿sãga oodait'ee?” Tai jõma p'oyaa wãda–e pada perã parã ak'ùde, mù ituaba beeji Atenas p'uurude. 2 Jõdee tachi âpema Timoteo pëijida tai pari. Iru pia mimiapari Tachi Ak'õre–it'ee, Cristopa ooda jarateepari perã. Iru pëijida Ak'õre Ûraa pipùara jarateemerã parãmaa mãik'aapa parã ûraamerã. Mãgá parã waapùara ijãadai, irua jara bù k'aurepa. 3 Mãgá ijãadak'ãri, chupùria jõneeruta pùjida, apidaapa parã k'ûrada–e pai ijãa amaadamerã. Parãpa pia k'awa p'anù Cristode ijãa p'anù k'aurepa, awaraarãpa tachi ichita jùrùdait'ee miapidait'ee. 4 Taipa mãga jarajida naaweda parã ome p'anadak'ãri. Parãpa k'awa p'anù wãara uchiaji taipa jaradak'a. 5 Maperãpù mùa Timoteo pëiji irua k'awaamerã parã Tachi Ak'õre ome nipapata. Mùa waa choo–e paji parã unu k'iniapa mãik'aapa k'îsia nâbùpa. Mãgá k'îsia nâbaji Netuara Poro Waibùapa parã Cristode ijãa amaapii jîak'aapa. Mãga pada paara, tai mimia parã t'ãide atuak'aji.6 Mamîda mãga–e paji. Parã ak'ùnap'eda, Timoteo waya chek'ãri, pedee pia nepùrù cheji. Jaraji parã Tachi Ak'õre ome pia nidá mãik'aapa chik'inia p'anapata. Ichiaba jaraji parãpa tai k'irãpapata mãik'aapa tai unu k'inia jõnapata, taipa parã unu k'inia jõnùk'a. 7 Mapa âpemaarã, ârá tai jùrù jõnù mîda miapidait'ee, k'ãiwee p'anù Timoteo it'aideepa ûridap'edaa perã parã at'ãri Cristode pia ijãa p'anù. 8 Parã mãgá choo p'anadak'ãri Cristode ijãa p'anùde, audupùara taipa jõmaarãmaa jaratee k'inia p'anù, awaraarãpa Cristode ijãadamerã parãk'a. 9 ¿Sãga gracias jaradaima Tachi Ak'õremaa parã pari? Parã k'aurepa tai t'ãri o–îa p'anù Tachi Ak'õre k'îrapite. 10 Ewari chaa, p'ãrik'ua pida, ùt'aa iidi p'anù Tachi Ak'õremaa, irua tai waya wãpimerã parã ak'ùde. Jaratee k'inia p'anù Ak'õre net'aa parãpa waide k'awada–e p'anù. Mãgá parãpa pipùara oodai Ak'õrepa k'inia bùk'a.
11 Mãgá ùt'aa iidi p'anù misa, iidipata Tachi Ak'õre Tachi Waibùa Jesucristo ome tai waya pëidamerã parã ak'ùde. 12 Ichiaba iidipata Tachi Waibùa Jesucristopa parã waapùara chik'inia p'anapimerã. Ma awara iidipata irua parãmaa awaraarã k'inia iru p'anapimerã, taipa parã k'inia iru p'anùk'a. 13 Iidipata irua parã choopimerã pãchi t'ãride. Mãgá chooruta pùrã, k'achia wêe p'anadait'ee Tachi Ak'õre k'îrapite, Tachi Waibùa Jesús chek'ãri jõma ichideerã ùt'ari p'anùùrã ome.