Pablo Tesalónica p'uurude mimiada
2
1 Âpemaarã, paråpata k'awa p'anù tai wãdak'ãri parã ak'ùde, pia uchiaji taipa oo k'inia p'anadap'edaa parã t'ãide. 2 Ichiaba k'awa p'anù ma wãdade parã ak'ùde, Filipos p'uurude jaratee nipadak'ãri, jã p'uurudepemaarãpa taimaa ik'achia jara wãjida mãik'aapa miapijida. Filipode mãga paji mîda, Tachi Ak'õrepa tai k'aripaji ichia jara pëida waawee–ee jaranadamerã parãmaa. Taipa mãga oojida eperãarã ûk'uruurãpa jarateepiamaa jõnajida mîda. 3 Mama p'anùde parã t'ãide, wãarata jarateejida. Parã ûraadak'ãri, iwarraa pedee jarada–e paji parã k'achiade baaipidait'ee. Ma awara seewa jarada–e paji parã k'ûradait'ee. 4 Ma k'ãyaara jîp'a jarateejida Tachi Ak'õrepa taimaa jarateepidak'a. Tachi Ak'õrépata tai jùrùt'eraji jarateenadamerã Cristopa ooda eperãarã k'aripait'ee. Maperãpù mãga jaratee nipapata. Jarateeda–e eperãarãpa tai t'o p'anadamerã. Jîp'a jarateepata Tachi Ak'õrepa tai pia ak'ùpariimerã. Iruata k'awa bù tai t'ãride k'îsia iru p'anù. 5 Parãpa k'awa p'anù taipa imeraa pedee jaradak'aa paji, parãpa tai k'inia iru p'anadamerã awaraarã k'ãyaara. Ichiaba imeraa pedee jarateedak'aa paji, parã k'ûradait'ee, taimaa p'arat'a teedamerã. ¡Tachi Ak'õrepa k'awa bù mùa wãarata jara bù! 6 Ichiaba audú k'awaa beerãk'a jarateedak'aa paji parãpa wa awaraarãpa k'îsiadamerã taipa pipùara jaratee p'anù awaraarã k'ãyaara. 7 Jesucristopa tai wãara pëida perã jarateede, parãmaa mãga k'îsiapik'ajida mãik'aapa tai k'aripapik'ajida. Mamîda mãga ooda–e paji. T'ãri pia p'anapachida parã t'ãide. Ara nawepa ichi warrarã pia ak'ùparik'a, mãga pùk'a taipa parã ak'ùpachida. 8 Taipa parã k'inia iru p'anapata perã, Ak'õrepa jara pëida parãmaa jarateenajida, ma k'aurepa piuk'ajida mîda. 9 Parãpa k'irãpa p'anù tai mimiapatap'edaa mama p'anadak'ãri. Ewari chaa parãmaa Tachi Ak'õrepa jara pëida jarateepachida. Sê jõnùde pida, p'ãrik'ua pida tai mimia oopachida nek'odait'ee. Mãga p'anapachida parã p'arat'a jita k'iniada–e p'anadap'edaa perã tai chik'o k'odait'ee.10 Parãpa k'awa p'anù mãik'aapa Tachi Ak'õrepa pida k'awa bù parã ijãapataarã t'ãide nipadak'ãri, ne–inaa k'achia ooda–ee nipapachida. Ne–inaa oopachida Tachi Ak'õrepa oopidak'a. Maperã apidaapa jarada–e pai taipa ne–inaa k'achia oojida. 11 Ara ak'õrepa ichi warra pia ûraaparik'a, mãga pùk'a taipa parã ûraapachida. 12 Mãgá ûraa p'anùde parã k'aripapachida ne–inaa jõma oo k'inia p'anadamerã Ak'õrepa k'inia bùk'a. Tachi Ak'õrépata parã jùrùji ichideerã papiit'ee mãik'aapa ichi trua k'îra wãreedee wãpiit'ee ewari cherude.
13 Maperã taipa ichita gracias jarapata Tachi Ak'õremaa. Taipa parãmaa jarateedak'ãri Cristopa ooda eperãarã k'aripait'ee, ma pedee ûri k'inia p'anajida mãik'aapa Cristode ijãajida. Ijãada–e paji tai pia pedee p'anadap'edaa perã. Jîp'a ijãajida ma pedee Tachi Ak'õrepa jara pëida perã. Maperãpù Tachi Ak'õrepa parã ijãapataarã k'aripamaa bù oodamerã ichia oopi bùk'a. 14 Mãga oopata perã, parã auk'aarãpa parã jùrùpachida miapidait'ee, judiorãpa Judea eujãdepema Jesucristode ijãapataarã auk'a jùrù p'anadap'edaak'a. 15 Mãgee judiorãpa Tachi Waibùa Jesús peepijida, ãchi auk'aarãpa chonaarãweda Tachi Ak'õre pedee jarapataarã peepidap'edaak'a. Jesús peepidap'eda, t'ãri k'achiapa tai jida jùrùpachida miapidait'ee mãik'aapa t'ùmà jërek'oodait'ee ãchi eujãdeepa. Tachi Ak'õrepa mãgee eperãarã pia ak'ù–e. Mãgeerãpa eperãarã jõmaweda k'îra unuamaa iru p'anù. 16 Mùa mãga jara bù ãchia taimaa jarateepidaamaa p'anadairã Cristopa ooda eperãarã k'aripait'ee; judio–eerã t'ãide paara. K'iniada–e apida o k'achiadeepa uchiadamerã Cristo k'aurepa. Mãga oo p'anù k'aurepa, Tachi Ak'õre audupùara k'îraupiruta, iru naaweda k'îraupidap'edaa k'ãyaara, ãchia ne–inaa k'achia oopatap'edaa k'aurepa. Maperãpù irua ãchi k'achia ooit'ee.
Pablo waya wã k'inia bada<R>Tesalonicadepema ijãapataarãmaa
17 Âpemaarã, taarã–e bù mîda tai unudap'edaa, parã ichita iru p'anapata tai k'îsiade mãik'aapa waya wã k'inia p'anajida parã ak'ùde. 18 Mamîda p'oyaa wãda–e paji. Mùchi ituaba wãda chok'ara wãit'ee paji. Mamîda Satanapa taidepema apida wãpi–e paji. 19 Parãpa pia ijãadak'ãri, jõmaarãmaa ak'ùpipata wãara Jesucristo Tachi Waibùa. Mapa tai o–îa p'anù parã ome mãik'aapa taipa awaraarãmaa jara k'inia p'anù parãpa ne–inaa pia oopata. Ichiaba parãpa mãga oopata perã, tachi jõmaweda o–îa p'anadait'ee Jesucristo k'îrapite, iru na eujãdee waya chek'ãri. 20 ¡Wãarapù! Parã mãgá ijãapata k'aurepa tai o–îa p'anù. Ma awara parã k'aurépata awaraarãpa tai ãpùte pia pedeepata.