1 TESALONICENSES
San Pablopa K'art'a Naapùara P'ãda Tesalónica P'uurudepema Ijãapataarãmaa
Salude pëida
1
1 Mù, Pablo Silvano ome mãik'aapa Timoteopa paara na k'art'a p'ã pëiruta parã Cristode ijãapataarãmaa, Tesalónica p'uurude p'anù. Taipa k'awa p'anù parã Tachi Ak'õredeerã mãik'aapa Tachi Waibùa Jesucristodeerã, wãara ijãapata perã. Mapa ùt'aa iidi p'anù ãrapa parã pia ak'ù p'anadamerã. Mãgá k'ãiwee p'anapataadait'ee.Tesalónica p'uurudepema ijãapataarãpa ne–inaa pia oopata
2 Tai ùt'aa t'âdak'ãri Tachi Ak'õremaa, ichita gracias jarapata parã jõmaarã pari. 3 Mãgá irumaa gracias jara p'anùde, k'irãpa p'anù parãpa ne–inaa pia oopata Ak'õrepa oopi bùk'a, Cristode wãara ijãapata perã. Parã audú mimiapata awaraarã k'aripadait'ee, Cristo k'aurepa ãra k'inia iru p'anapata perã. Mãga oo p'anùde choopata, ijãapata perã Tachi Waibùa Jesucristo unudait'ee, ichideerã ata chek'ãri. 4 Âpemaarã Cristo k'aurepa, taipa k'awa p'anù Tachi Ak'õrepa parã k'inia iru bapari. Mapa ichia parã jùrùt'eraji ichideerã papiit'ee. 5 Taipa parãmaa jaratee nipadak'ãri Tachi Ak'õrepa pedee pia jara pëida Cristode, pedeepapai wa tai k'îradoopapai jarateeda–e paji. Ma k'ãyaara Tachi Ak'õre Jaurépata taimaa mãgá jarateepiji. Ichia tachi t'ãride k'awapiji taipa wãarata jarateepata. Parãpa k'awa p'anù tai nipapatap'edaa parã t'ãide, Cristode ijãadamerã.
6 Taipa jarateedap'edaa ijãadak'ãriipa parã p'ana k'inia p'aneejida tai p'anapatak'a mãik'aapa Tachi Waibùa Jesús baparik'a. Ma k'aurepa awaraarãpa parã miapijida mîda, Tachi Ak'õre Jaurepa parã t'ãri o–îapiji. 7 Ma awara, parã mãgá p'anapata perã, ijãapataarã Macedonia eujãdepema mãik'aapa Acaya eujãdepema auk'a p'ana k'inia p'anù parãk'a. 8 Ãchia awaraarãmaa ichiaba jara p'anù parã p'anapata, Tachi Ak'õrede ijãadak'ãriipa. Mãgá taipa maarepida jarada–eeta, awaraa eujãdepemaarãpa k'awa p'anù Cristopa oomaa bù parã t'ãide. 9 Mãùrãpa nepùrùpata parãpa tai pia auteebaidap'edaa, jaratee nipadak'ãri parã t'ãide. Ichiaba nepùrùpata parã ne–inaa juapa oodade ijãa amaadap'edaa, ijãa p'aneedait'ee Tachi Ak'õre chok'ai bùde, taipa jarateeda ûridap'eda. Mãgá Ak'õre wãarade ijãadak'ãriipa, oo k'inia p'aneejida irua oopi bùk'a. 10 Ma awara parã mãgá ijãadak'ãriipa, nù p'anù unudait'ee Tachi Ak'õre Warra, ichi chek'ãri ùt'ariipa ichideerã atade. Tachi Ak'õrepa ichi Warra Jesús chok'ai p'irabaipiji eperãarã o k'achiadeepa k'aripa atamerã. Mapa Ak'õre ewari waibùa ewate pak'ãri, Tachi Ak'õre waa k'îrau–e pait'ee tachi ome, tachia p'ek'au k'achia oopata k'aurepa.