Cristode ijãapataarãpa ùt'aripema ne–inaade k'îsiadaipia bù
3
1 Mùa naaweda jaradak'a parã p'irabai pùk'ajida Cristo ome, iru chok'ai p'irabaik'ãri. Mãgá eperã chiwidi pùk'a p'aneejida; p'ek'au k'achia oo amaa p'anapataarãk'a. Mapa jùrùpatáatù ùt'aripema ne–inaa, Cristo mama bapari perã. Tachi Ak'õrepa Cristo ichi juaraare bùji, tachi jõmaweda ak'ù bamerã. 2 Maperã ùt'aripema ne–inaade k'îsia p'anapatáatù, na p'ek'au eujãdepema net'aadepai k'îsiadai k'ãyaara. 3 Cristo piuk'ãri, parã jida piu pùk'ajida. Ma awara Tachi Ak'õrepa Cristo waya chok'ai bapik'ãri, parã auk'a chok'ai p'anapiji, ichita p'anapataadamerã iru ome. 4 Maperã Cristo, chi ichita chok'ai p'anapipari waya chek'ãri, parã auk'a chedait'ee iru ome iru k'îra wãree unupide jõmaarãmaa.Ne–inaa k'achia oopatap'edaa Cristode ijãadai naaweda<R>oo amaadaipia bù
5 Parã mãgá ichita chok'ai p'anadairã Cristo chok'ai bùk'a, oo amáatù ne–inaa k'achia k'îra t'ãdoo parãpa oopatap'edaa irude ijãadai naaweda. P'ek'au oonáatù awaraarã ome. Awaraarã jùrùnáatù ãra ome k'achia oodait'ee. K'îsianáatù ne–inaa pãchia k'achia oo k'iniata oodait'ee. Pãchia net'aa iru p'anù omepai k'ãiwee p'anapatáatù, waapùara ata k'inia p'anada–ee. Chi net'aa k'iniayaa bùpa net'aa k'iniara iru bù Tachi Ak'õre k'inia iru bai k'ãyaara. 6 Eperãarãpa mãgee ne–inaa k'achia oodak'ãri, Tachi Ak'õre k'îraupipata. Mapa ewari cherude irua mãgee ne–inaa k'achia oopataarã miapiit'ee. 7 Naaweda parãpa pida mãgee ne–inaa k'achia oopachida, oo k'iniadak'aa pada perã Tachi Ak'õrepa oopi bùk'a. 8 Mamîda ârá mãga p'anadaik'araa bù. Mapa nãgee jõmaweda oo amáatù. K'îrau mãik'aapa t'ãri k'achia p'ananáatù. K'îsianáatù chîara k'achia oodait'ee. Pedee k'achia pedeenáatù awaraarã ãpùte mãik'aapa ik'achia pedeenáatù. 9 Seewa jaranáatù awaraa ijãapataarãmaa, parãpa mãgee ne–inaa k'achia oodaamaa p'anadap'edaa perã Cristode ijãadak'ãri. Irude ijãadak'ãri, oo amaajida ne–inaa jõmaweda pãchi p'ek'au k'achia ooyaa bù k'ap'ùapa oopi bùk'a. 10 Ma k'ãyaara p'ana k'inia p'aneejida eperãarã chiwidi p'anùk'a, Tachi Ak'õre, tachi oodapa parã ichi k'îrak'a papimerã. Mãga p'anadai iru wãara k'awa wãdak'ãri. 11 Tachi Ak'õrepa mãga oopari jõmaarã Cristode ijãapataarã–it'ee: judiorã–it'ee, judio–eerã–it'ee auk'a; chi k'ap'ùade tauchaa iru beerã–it'ee, chi tauchaa wêe beerã–it'ee; k'îra tewaraarã–it'ee mãik'aapa sîpanaarã–it'ee, esclavoorã–it'ee, esclavo–eerã–it'ee paara. Ak'õrepa mãga oopari ma jõmaarã–it'ee, Cristo bapari perã jõmaweda irude ijãapataarã ome. Iruata ma jõmaweda k'aripapari, jõmaarã k'ãyaara waibùara bapari perã.
12 Tachi Ak'õrepa parã mãgá jùrùt'eraji ichideerã papiit'ee. Parã k'inia iru bapari perã, parã awara bùji nãga p'anapataadamerã awaraarã ome: chupùria k'awaa; t'ãri pia; audua–ee; k'îrau–ee; t'ãripa choo, nepùrade baairuta pùjida. 13 Mapa choopatáatù awaraarãpa nepùra jùrù p'anù pùjida parã ome. Parãdepemapa awaraa ùmùateeru pùrã, ma ùmùateeda perdonáatù, Tachi Waibùapa perdonaaparik'a parãpa k'achia oopata. 14 Ma awara chik'inia p'anapatáatù. Mãga p'anapataadak'ãri, wãara oodai ma jõma et'ewa jarada Tachi Ak'õredeerãpa oopataadamerã. 15 Oopítù Cristomaa irua oopi k'inia bùk'a pãchi t'ãride. Irua parã t'ãri o–îapi k'inia bù, k'ãiwee para bamerã. Ma–it'eeta Tachi Ak'õrepa parã jùrùji, k'ap'ùa apai pùk'a, k'ãiwee p'anapataadamerã. Mapa gracias jarapatáatù Tachi Ak'õremaa.
16 T'ãripa jùrùpatáatù Cristopa jarateeda waapùara k'awaadait'ee mãik'aapa p'anapatáatù ma jarateedade jara bùk'a. Iidítù Tachi Ak'õrepa parã k'îsia k'awaapimerã mãik'aapa jaratéetù ma jarateeda awaraarã pãchi t'ãidepemaarãmaa. Ichiaba ûráatù oodamerã Cristopa oopi k'inia bùk'a. Ma jõma oodai cheepurudak'ãri k'aride salmo Tachi Ak'õre Ûraa p'ãdadepema, Ak'õre k'ari mãik'aapa Tachi Ak'õre Jaurepa k'aripiru. Mãgà k'aridak'ãri, t'ãripa k'aridaipia bù Tachi Ak'õremaa, iru jõmaarã k'ãyaara t'ãri piara bapari perã. 17 Wãara jõmaweda parãpa oopata oodaipia bù Tachi Waibùa Jesupa oopi bùk'a. Ichiaba jõmaweda parãpa jarapata jaradaipia bù irua jarapi bùk'a. Mãga oodak'ãri, iru k'ap'ùa pari gracias jaradait'ee Tachi Ak'õremaa.
Sãga p'anapataadaipia bù awaraa ijãapataarã ome
(Efesios 5.22-33; 1 Pedro 3.1-7)
18 Wêraarã, ùmùk'îra paraa beerã, chok'ek'ee p'anapatáatù pãchi k'ima ome, Tachi Waibùapa k'inia bairã wêraarã irude ijãa p'anù mãga p'anapataadamerã. 19 Jõdee ùmùk'îraarã wêra paraa beerã, pãchi wêra k'inia iru p'anapatáatù. K'îrau p'ananáatù ãra ome. Ma k'ãyaara t'ãri pia p'anapatáatù.
20 Warrarã, ichita oopatáatù pãchi ak'õreerãpa jara p'anùk'a, Tachi Ak'õrepa k'inia bairã mãga oodamerã. 21 Ak'õreerã, pãchi warrarã k'îraupináatù, k'îra pia–ee p'ananaadamerã.
22 Esclavoorã, ichita oopatáatù pãchi chipariirãpa jara p'anùk'a. Oonáatù esclavoorã ûk'uruurãpa oopatak'a. Mãùrã k'îra jîp'a mimiapata ãchi chipariirãpa ak'ù p'anù misa aupai, ãchi mimiayaa beeda adamerã. Mamîda parãpa mãga oodaik'araa bù. Ma k'ãyaara auk'a k'îra jîp'a mimiapataadaipia bù, pãchi chipariirãpa ak'ùda–e p'anù pùjida. Mãgá ak'ùpidai Tachi Waibùa wãara waaweepata. 23 Mimiapataadai k'ãyaara eperãarã–it'ee aupai, t'ãripa ne–inaa jõma oopatáatù Tachi Waibùa Cristo–it'ee, iru parã chipari waibùara bairã. 24 K'awa p'anù parãpa mimiapata pari iruata parãmaa atapiit'ee jõma Tachi Ak'õrepa k'îsia iru bù teeit'ee ichideerãmaa. 25 Mamîda mãga oo–e pait'ee chi ne–inaa k'achia oopari ome. Ma ne–inaa k'achia oopata pari Tachi Ak'õrepa ichiaba mãgùmaa ne–inaa k'achia ooit'ee. Ichia mãga k'îsia iru bù ooit'ee jõma k'achia oopataarã ome; esclavoorã ome, esclavo–eerã ome auk'a, eperãarã jõmaweda auk'a p'anadairã iru k'îrapite.