FILIPENSES
San Pablopa K'art'a P'ãda Filipos P'uurudepema Ijãapataarãmaa
San Pablo, Jesucristopa jùrùt'eradapa na k'art'a p'ãji. K'îsiapata na k'art'a jida p'ãji Romade, carcelde bak'ãri. Pablo naapùara jaratee nipapachi Filipos p'uurude. Ma p'uuru Macedonia eujãde bù. Mapa mãpema ijãapataarã k'inia iru bapachi. Na k'art'a p'ãji gracias jarait'ee ãramaa, ichi k'aripadap'edaa perã ofrenda tee pëidak'ãri. Ichiaba k'irãpapiji ichia Ak'õrepa wãarata jarateeda ãra t'ãide, k'ûrapinaadamerã seewa jaratee nipapataarãmaa.
Naapùara jara bù ichia ùt'aa t'âpari ãra pari mãik'aapa ichi bapata (cap. 1.1-11). Jara bù ichi bapari ooit'ee Cristopa oopi bùk'a mãik'aapa waawee–e piuit'ee, Cristo ome araa bapari perã (cap. 1.12-26). Ûraa bù ãrapa waaweenaadamerã miadait'ee Cristode ijãa p'anù k'aurepa; oopariidamerã iru ûraade jara bùk'a mãik'aapa nipapataadamerã iruk'a: audua–ee, chupùria k'awaa (caps. 1.27--2.18). Jara bù ichia k'îsia iru bù oopiit'ee ichi k'aripapataarã Timoteomaa mãik'aapa Epafroditomaa (cap. 2.19-30). Nepùrù bù ichi bapata Cristode ijãai naaweda. K'îsia baji mîda Tachi Ak'õrepa iru pia ak'ùi Moisepa p'ãdade jara bùk'a oopachi perã, ârá k'awa bù Cristode ijãapata k'aurepapai Ak'õrepa eperãarã pia ak'ùpari. Ichiaba jara bù Cristode ijãapataarã deporte jemenepataaråk'apù p'anù maa–e pùrã carrera p'irapataarãk'a (cap. 3). T'êepai ûraa bù ijãapataarã t'ãri o–îa p'anapataadamerã mãik'aapa gracias jara bù ãrapa tee pëidap'edaa pari (cap. 4).