Ûraa warrarã mãik'aapa ak'õreerã–it'ee
6
1 Ârá mùa ûraait'ee warrarãmaa: Warrarã, parãpa Tachi Waibùa k'inia iru p'anadairã, oopatáatù pãchi ak'õreerãpa jara p'anùk'a. Mãga k'inia bù Tachi Ak'õrepa parãpa oodamerã. 2 Iru ley p'ãdade jara bù:‘Pùchi ak'õre mãik'aapa pùchi nawe k'inia iru baparíiji mãik'aapa ãra pedee ûriparíiji.’ (Éxodo 20.12)
Tachi Ak'õrepa jarak'ãri warrarãpa mãga oodamerã, ichiaba jaraji sãga k'aripait'ee chi ma jaradak'a oopataarã. 3 Mãgaji:
‘Pãchi ak'õreerã pedee ûriruta pùrã, pia p'anapataadait'ee mãik'aapa taarã nipapataadait'ee na p'ek'au eujãde.’ (Éxodo 20.12)
4 Ak'õreerã, pãchi warrarã k'îraupináatù. Ma k'ãyaara pia ak'ù p'anapatáatù. Mãga oo p'anù misa, ûraapatáatù ne–inaa k'achia oonaadamerã. Ma awara jarateepatáatù Tachi Waibùade ijãapataadamerã mãik'aapa oopataadamerã irua oopi bùk'a.
Ûraa esclavoorã–it'ee mãik'aapa ãchi chipariirã–it'ee
(Colosenses 3.22-25; Tito 2.9-10; 1 Pedro 2.18-20)
5 Esclavoorã, oopatáatù parã na p'ek'au eujãdepema chipariirãpa jara p'anùk'a. Ãra waaweepatáatù mãik'aapa k'îra jîp'a mimiapatáatù, Cristo–it'ee mimiak'ajidak'a. 6 Edaare esclavo k'îra jîp'a mimiapari chiparipa ak'ù bù misa aupai, ichi mimiayaa bùda amerã. Mamîda parãpa mãga oodaik'araa bù. Ma k'ãyaara auk'a k'îra jîp'a mimiapataadaipia bù, chipariirãpa ak'ùda–e p'anù pùjida. Mãgá t'ãripa ichiaba oopatáatù Tachi Ak'õrepa oopi bùk'a, Cristo parã chipari jõmaarã k'ãyaara waibùara bairã. 7 Maperãpù parã mimiadai k'ãyaara chi mimia chipariirãpa parã pia ak'ùdamerã, t'ãripa mimiadaipia bù Tachi Waibùa–it'ee. 8 Mãga oodaipia bù k'awa p'anadairã chi mimia pia oo bùpa iru bait'ee jõma Tachi Ak'õrepa k'îsia iru bù teeit'ee ichideerãmaa. Esclavoorã, esclavo–eerã auk'a mãga iru p'anadait'ee ãchi mimia pia oopata pari.
9 Parã, chi esclavoorã chipariirã ichiaba pia p'anapatáatù pãchi esclavoorã ome. Ijâatù pedeenáatù p'eradamerã. K'irãpapatáatù parã ùt'ari chipari ichiaba iru p'anù. Mãgà Tachi Waibùa Jesucristo. Iruata esclavo chipari pipùara ak'ùk'aa chi esclavo k'ãyaara, ichideerã jõmaweda iru k'îrapite auk'a p'anadairã.
Armadura Tachi Ak'õrepa teepari<R>Cristode ijãapataarãmaa
10 Âpemaarã Cristo k'aurepa, ârá mùa parã ûraait'ee t'ãridepai choopataadamerã, araa p'anadairã Tachi Waibùa ome. Iru jõmaarã k'ãyaara waibùara bairã, parã k'aripait'ee oodamerã irua k'inia bùk'a. 11 Nãgá tachi k'aripait'ee. Ârapema soldaorãpa armadura jâpatak'a, Tachi Ak'õrepa armadura teeda jâpatáatù, Netuara Poro Waibùapa parã k'ûranaamerã. 12 Tachi chõoda–e p'anù eperãarã jîp'aarã ome. Jîp'a chõo p'anù na p'ek'au eujãdepema–eerã ome; chi Netuara Poro Waibùa eere p'anùùrã ome. Mãgùùrã jua ek'ari na p'ek'au eujãdepema ijãadak'aa beerã jõmaweda p'ãriu pùk'a bùde p'anapata. 13 Maperã Tachi Ak'õrepa teeda armadura jõmaweda jâpatáatù. Mãgá Netuara Poro Waibùa eere p'anùùrã chedak'ãri parã k'achiade baaipidait'ee, parãpa mãga oopida–e pait'ee. Mapa Tachi Ak'õrepa oopi bùk'a oo wãk'ãtù wåtù, mãgùùrã p'oyaadait'ee ãchi cheruta chaa.
14 Mãga p'anadait'ee nãga oopatáatù: soldaorãpa ne–inaa k'ùrrùde jâpatak'a, mãga pùk'a Tachi Ak'õrepa wãarata jara pëida k'awáatù mãik'aapa ichita wãarata jarapatáatù. Soldaorãpa camisa hierrodee ooda jâpatak'a, mãga pùk'a Tachi Ak'õrepa oopi bùk'a ichita oopatáatù, netuara eere p'anùùrãpa maarepida parãmaa k'achia oonaadamerã. 15 Soldaorãpa chancla jâpatak'a awara ãyaa wãdait'ee pak'ãri, mãga pùk'a k'awáatù jarateedait'ee Cristopa tachi o k'achiadeepa k'aripa atak'ãri, k'ãiwee p'anapata, netuara eere p'anùùrãpa nepùrade baaipi cheruta pùjida. 16 Soldaorãpa escudo ateepatak'a, mãga pùk'a waapùara Cristode ijãapatáatù. Mãgá jaut'ù pùk'a p'anadai Netuara Poro Waibùapa k'achia oopi k'inia bù parãmaa. 17 Soldaorãpa casco jâpatak'a, mãga pùk'a wãara ijãapatáatù Tachi Ak'õrepa parã o k'achiadeepa k'aripa ataji. Ma awara soldaorãpa espada ateepatak'a, Tachi Ak'õre Ûraa jara pëida ichi Jaure k'ap'ùa pari t'ãride atéetù.
18 Oodait'ee ma jõma et'ewa jarada, ichita ùt'aa t'âpatáatù Tachi Ak'õre Jaurepa oopi bùk'a. Ùt'aa iidipatáatù Tachi Ak'õrepa parã k'aripamerã ne–inaa jõmaade. K'îrak'aupai ùt'aa t'âda–ee p'anapataadai. Ma k'ãyaara jõmaarã ijãapataarã pari ùt'aa t'âpatáatù. 19 Ichiaba ùt'aa t'âpatáatù mù pari, Tachi Ak'õrepa ichia jara k'iniata mùmaa jarapimerã. Iidipatáatù mùa jõmaarãmaa waawee–ee k'awapimerã Tachi Ak'õrepa k'îsia iru bada eperãarã o k'achiadeepa k'aripa atait'ee, ichi Warra pëik'ãri piumerã eperãarã pari. 20 Cristopa mù pëiji mãga jarateemerã. Ma jaratee bù k'aurépata mù nama carcelde bù. Mamîda ùt'aa t'âpatáatù, mùa at'ãri waawee–ee mãga jarateemerã Tachi Ak'õrepa k'inia bùk'a.
Pablopa salude tee pëida na k'art'a p'ã aupa wãk'ãri
21 Mùa na k'art'a pëiru tachi âpema Cristo k'aurepa Tíquico ome. Mùa iru k'inia iru bù, k'õp'ãyo pia perã. Irua mù ichita k'aripapari, Tachi Ak'õrepa oopi bùk'a oo k'inia bairã. Irua parãmaa nepùrùnait'ee mùa k'îsia bù mãik'aapa mùa oomaa bù, parãpa ma jõma k'awaadamerã. 22 Ma–it'ee mùa iru pëiru, parãpa pia k'awaadamerã tai p'anapata mãik'aapa t'ãri o–îa p'aneedamerã irua jararu ûridak'ãri.
23 Ârá mùa ùt'aa iidi bù Tachi Ak'õrepa mãik'aapa Tachi Waibùa Jesucristopa parã k'ãiwee p'anapimerã jõmaarã ijãapataarã ome mãik'aapa chik'inia p'anapimerã, Cristode ijãapata perã. 24 Ichiaba iidi bù ãrapa pia ak'ù p'anadamerã jõmaarã t'ãripa Tachi Waibùa Jesucristo k'inia iru p'anapataarã.
Mãgapai paji.