Sãga Tachi Ak'õre warrarã p'anapata
5
1 Tachi Ak'õrepa parã k'inia iru bapari ichi warrarã perã. Mapa k'awaa wãk'ãtù wåtù awaraarã k'inia iru p'anadait'ee irua tachi k'inia iru baparik'a. 2 Chik'inia p'anapatáatù Cristopa tachi k'inia iru baparik'a. Tachi mãgá k'inia iru bada perã, piuji tachi k'aripait'ee. Ichi k'ap'ùa paara peepiji ak'ùpiit'ee Tachi Ak'õre k'inia iru bù mãik'aapa eperãarã ichiaba k'inia iru bù. Maperãpù Tachi Ak'õrepa irua ooda pia ak'ùji.3 Tachi Ak'õrepa parã awara bùda perã Cristok'a p'anapataadamerã, nãgee p'ek'au k'achia eperãarãpa oopata jida jaradaik'araa bù: miak'ãi p'anùùrã awaraarã ome k'ãipata; k'îra nejasia wêe awaraarã jùrùpata p'ek'au oodait'ee ãchi ome; awaraarã wêra wa net'aa k'âapata. 4 Ichiaba parãpa nãgee k'achia oopata apida oodaik'araa bù: bùsù pedeepata; pariatua pedeepata maa–e pùrã bùsù pedee pedeepata ëidamerã. Cristopa apidaamaa mãgá pedeepik'aa. Mãgá pedeedai k'ãyaara, gracias jarapatáatù Tachi Ak'õremaa. 5 Parãpa k'awaadaipia bù chi nãgee k'achia oopataarã Cristodeerã–e: pariatua p'ek'au oo wãpata awaraarã ome; k'îra nejasia wêe awaraarã jùrùpata k'achia oodait'ee ãchi ome; awaraarã wêra wa net'aa k'âapata. Mãgeerã ne–inaa juapa ooda k'îrapite ùt'aa t'âpataaråk'apù p'anù. Ne–inaa awaraa k'iniara iru p'anù Tachi Ak'õre k'ãyaara. Mapa wãda–e pait'ee iru truadee. 6 Mãgee p'ek'au k'achia oopataarã atuadait'ee, Tachi Ak'õre k'îraupipata perã ãchia k'achia oo jõnùpa mãik'aapa oodaamaa p'anapata perã irua oopi bùk'a. K'ûrapináatù mãgee pariatua pedeepataarã apidaamaa, seewa jarateepata perã. 7 K'õp'ãyo meraanáatù mãgee eperãarã ome.
8 Wãara naaweda ichiaba parã mãgeerãk'a p'ãriu pùk'a bùde p'anapachida, k'achiade p'anapataadap'edaa perã. Mamîda ârá parã araa p'anadairã Tachi Waibùa ome, âdaa pùk'a bùde p'anapata. Mapa p'anapatáatù Cristodeerãk'a. 9 Eperã âdaa pùk'a bùde bak'ãri, nãga bapari: t'ãri pia jõmaarã ome; oopari Tachi Ak'õrepa oopi bùk'a; ichita wãarata jarapari. 10 Mapa k'awaa wãk'ãtù wåtù mãgá p'anapataadait'ee. Mãgá Tachi Waibùa o–îa bait'ee parã ome. 11 Ijãadak'aa beerãpa ne–inaa k'achia oodak'ãri, t'îunáatù ãchi ome, ãchi p'ãriu pùk'a bùde p'anapata perã. Ma k'ãyaara ãchi ûraapatáatù k'awaadamerã atuadait'ee ãchia k'achia oopata k'aurepa. 12 Tachi k'îra nejasiadarii nepùrùit'ee ãchia ne–inaa k'achia merã oopata. 13 Mamîda Tachi Ak'õrepa mãgee p'ek'au k'achia oopata paara wêpapii, ma eperãarãpa ûriruta pùrã chi âdaa pùk'a bùde p'anùùrãpa Tachi Ak'õre Ûraa jaradak'ãri. Mãga ûridap'eda, k'awaadai ãchia ne–inaa k'achia oopata. 14 Mãpai Cristode ijãaruta pùrã, ãchi ichiaba âdaa pùk'a bùde t'îudai. Mapa k'aride jara bù:
“Ârùmátù parã k'ãi pùk'a p'anùùrã, k'achia oomaa p'anadairã. P'irabáitù parã piu pùk'a p'anùùrã, ijãadak'aa perã. Cristopa parã k'aripai âdaa pùk'a bùde t'îudamerã.”
15 Maperã k'îrak'aupai p'anadai k'îsia k'awa–ee beerãk'a. Ma k'ãyaara k'îra jîp'a, k'îsia k'awaa p'anapatáatù. 16 Ichita jùrùpatáatù ne–inaa pia oodait'ee, ârapemaarã k'achia ooyaa p'anapata perã. 17 K'îra k'awa–ee p'anùùrãk'a p'ananáatù. Ma k'ãyaara jùrùpatáatù k'awaadait'ee Tachi Ak'õrepa parãmaa oopi k'inia bù. 18 It'uapa piu nipanáatù, jãgùpa eperãarã k'achiade baaipipari perã. Ma k'ãyaara Tachi Ak'õre Jaure ome o–îa nipapatáatù oodait'ee irua parãmaa oopi k'inia bùk'a. 19 Awaraa ijãapataarã ome p'anadak'ãri, k'ari para bátù salmo Tachi Ak'õre Ûraa p'ãdadepema mãik'aapa Ak'õre k'ari. K'aripatáatù Tachi Ak'õre Jaurepa k'aripi bùk'a. T'ãripa k'aripatáatù Tachi Waibùamaa, parãpa iru k'inia iru p'anapata perã. 20 Tachi Waibùa Jesucristode ijãapata perã, ichita gracias jarapatáatù Tachi Ak'õremaa, jõma irua oo bù pari tachi–it'ee.
Sãga p'anapataadaipia bù awaraa ijãapataarã ome
21 Ak'ùpidait'ee Cristo wãara pãchi poro waibùa, ûripatáatù awaraa ijãapataarãpa ûraa p'anù mãik'aapa oopatáatù ãrapa jara p'anùk'a.
22 Wêraarãpa oopataadaipia bù ãchi ùmùk'îraarãpa jara p'anùk'a, Tachi Waibùapa mãga k'inia bairã. 23 Ùmùk'îra chi wêra poro waibùa, Cristo tachi ijãapataarã poro waibùak'a. Tachi ijãapataarã Cristo k'ap'ùa apai pùk'a p'anù. Iruata tachi o k'achiadeepa k'aripa ataji atuanaadamerã. 24 Mapa ijãapataarã Cristo jua ek'ari p'anapata. Mãgá ichiaba wêraarã nejõmaade ãchi ùmùk'îraarã jua ek'ari p'anapataadaipia bù.
25 Ùmùk'îraarãpa jõdee ãchi wêraarã k'inia iru p'anapataadaipia bù, Cristopa ijãapataarã k'inia iru baparik'a. Irua tachi ijãapataarã audupai k'inia iru bada perã, piuji tachi pari. 26 Mãgá tachi ijãapataarãpa p'ek'au k'achia oopata wêpapiji. Tachi sùù pùk'aji paniapa irude ijãa p'anùda adak'ãri, iru ûraa ûridap'eda. Mãgá tachi ijãapataarã awara bùji ichi–it'ee. 27 Ara ùmùk'îrapa wêra awêra k'îra wãree, t'ãri pia, k'inia bùk'a aù ome miak'ãiit'ee, mãga pùk'a Cristopa k'inia bù tachi ijãapataarã Tachi Ak'õre k'îra wãreek'a, t'ãri pia, maarepida anida wêe p'anapataadamerã ichi–it'ee. Ma–it'eeta tachi awara bùji. 28 Cristopa tachi ijãapataarã, ichi k'ap'ùa apai pùk'a p'anùùrã, mãgá k'inia iru bapari perã, ùmùk'îraarãpa ãchi wêraarã ichiaba k'inia iru p'anapataadaipia bù ãchi k'ap'ùak'a. Ùmùk'îrapa ichi wêra wãara k'inia iru bak'ãri, pia ak'ù bapariit'ee, ichi k'ap'ùa ak'ù baparik'a. 29 Eperã apidaapa ichi k'ap'ùa unuamaa iru bak'aa. Ma k'ãyaara nek'opari mãik'aapa ichi k'ap'ùa pia ak'ù bapari, Cristopa tachi ijãapataarã ak'ù baparik'a. 30 K'awa p'anù Cristopa tachi ijãapataarã mãgá ak'ù bapari, tachi iru k'ap'ùa apai pùk'a p'anadairã. 31 Tachi Ak'õre Ûraa p'ãdade jara bù:
‘Mapa ùmùk'îrapa atabëiit'ee chi ak'õre chi nawe ome, araa p'anapataadait'ee chi wêra ome. Mãgá eperã omeeweda eperã apai pùk'a p'aneedait'ee.’ (Génesis 2.24)
32 Mãgà jarada k'aurepa tachia ne–inaa wãarata k'awaadai, waide k'awada–e p'anadap'edaa. Mù–it'ee nãga bù. Cristo tachi ijãapataarã ome, ùmùk'îra chi wêra ome bùk'a bù. 33 Mapa waya jara k'inia bù parãmaa: Ùmùk'îra chaa ichi wêra k'inia iru baipia bù ichi k'ap'ùa k'inia iru baparik'a. Jõdee wêra chaa ichi ùmùk'îra waaweeipia bù ichi poro waibùak'a.