GÁLATAS
San Pablopa K'art'a P'ãda Galacia Eujãdepema Ijãapataarãmaa
San Pablo, Jesucristopa jùrùt'eradapa na k'art'a p'ãji. Na k'art'ade Pablopa k'irãpapi bù Galacia eujãdepema ijãapataarãmaa, ichiata ãchi t'ãide naapùara jaratee nipapachi Jesucristopa ooda ãchi o k'achiadeepa k'aripa atait'ee. P'anau bù judiorã, chi mama jarateepataarãpa Cristode ijãapataarã tauchaa bùpidaipia bù ãchi ùmùk'îraarã k'ap'ùade maa–e pùrã atuadait'ee. Pablopa jîp'a jara bù eperãarã ùt'aa wãdait'ee wãara Cristode ijãapata perãpai.
Salude jarap'eda, naapùara Pablopa ma Galacia eujãdepema ijãapataarã ùtrùa bù Cristodepai ijãadai k'ãyaara, awara ijãa k'inia p'anadairã (cap. 1.1-10). Jara bù wãara ichi Jesucristopa jùrùt'erada mãik'aapa pëida ichi ûraa jarateede; awaraa Cristopa jùrùt'eradaarã Jerusalende p'anùùrãpa irua jarateepata pia ak'ùpata (caps. 1.11--2.21); sãap'eda Cristodepai ijãapataadaipia bù mãik'aapa sãap'eda jùrùdaik'araa bù oodait'ee Moisepa p'ãdade jara bùk'a, Ak'õrepa ãra pia ak'ùmerã (caps. 3.1--4.31). Ûraa bù jîp'a oopataadamerã Cristopa oopi bùk'a mãik'aapa chik'inia p'anapataadamerã (caps. 5.1--6.10). T'êepai jara bù Tachi Ak'õrepa eperãarã pia ak'ù–e, ãchi k'ap'ùade tauchaa iru p'anadairã maa–e pùrã wêe p'anadairã. Jîp'a pia ak'ùpari t'ãri chiwidi pùk'a p'anadak'ãri Jesucristode ijãapata k'aurepa (cap. 6.11-18).