Pablopa jarada ichia ooit'ee bù Corinto p'uurude
13
1 Mùa et'ewa jaradak'a nãgà wãrupa parã ak'ùde wãda õpee pait'ee. Jãma panak'ãri, parã at'ãri k'achiade p'anù pùrã, mùa ooit'ee Tachi Ak'õre Ûraa chonaarãweda p'ãdade jara bùk'a:‘Eperãpa chîara ùmùateek'ãri, iru miapii naaweda, irua k'achia ooda unudap'edaarã omé wa õpee jùrùdaipia bù, auk'a jaradamerã ãrapa unudap'edaa.’ (Deuteronomio 19.15)
2 Mù parãmaa wãda omeede jaraji chi k'achia oo p'anadap'edaarãmaa mùa ãchi chupùria k'awa–e pait'ee, ma k'achia oo amaada–e p'anù pùrã, mù pai naaweda. Ârá jõmaarãmaa mùa jara pëiru wãara ãchi chupùria k'awa–e pait'ee mù jãma panak'ãri. 3 Parãpa k'inia p'anùda a p'anù mùa ak'ùpimerã Cristopa pedeepari mù k'ap'ùa pari. K'awaadait'ee mù jãma panak'ãri. Cristo eperã juatau wêe bùk'a bù–e. Jõma oopari ichia k'inia bùk'a, jõmaarã k'ãyaara waibùara bairã. Mãgá auk'a ooit'ee parã t'ãide, k'achia oo amaada–e p'anù pùrã. 4 Wãara iru juatau wêe pùk'a baji kurusode piuk'ãri. Mamîda ârá ichita chok'ai bù Tachi Ak'õrepa iru chok'ai p'irabaipida perã. Tai jida juatau wêe pùk'a p'anù. Mamîda iru ome araa p'anapata perã, ichiaba ichita chok'ai p'anapataadait'ee iru ome. Maperã taipa parã nepùra ak'ùdai irua k'aripak'ãri.
5 Pia k'îsíatù parã t'ãri chaachaa. ¿Wãara Jesucristode ijãapatak'ã? Mãgá ijãa p'anù pùrã, k'awa p'anù Cristo bapari parã ome. Mamîda p'oyaa ooda–e p'anù pùrã irua oopi bùk'a, wãara iru ba–e parã ome. ¿Wãara–ek'ã? 6 Parãpa taipa oopata pia ak'ùdak'ãri, k'awaadai wãara Cristopa tai pëiji, taipa oopata perã irua oopi bùk'a. 7 Mamîda parãpa tai at'ãri ak'ùda–e p'anù mîda Cristopa pëidak'a, taipa ùt'aa iidimaa p'anù Tachi Ak'õrepa parã k'aripamerã ne–inaa k'achia oonaadamerã. Iidida–e irua parã t'ãri p'uapimerã tai juapa. Jîp'a iidi p'anù parãpa ne–inaa pia oodamerã irua ichideerãmaa oopi k'inia bùk'a. Mãga ooruta pùrã, taipa apida t'ãri p'uapida–e Tachi Ak'õrepa taimaa oopiparik'a. 8 Wãara Tachi Ak'õrepa tai pëipari ùtrùadamerã chi p'ek'au k'achia oopataarã ijãapataarã t'ãide p'anù. Mamîda mãgùùrãpa Ak'õremaa chupùria iididak'ãri, ma k'achia oo amaa p'anù pùrã, mãgá ùtrùada–e pait'ee, Ak'õrepa chi chupùria iidirutaarã p'ek'au k'achia wêpapipari perã. 9 Tai o–îa p'anù Tachi Ak'õrepa tai pëi–e pak'ãri ijãapataarã ùtrùade. Mapa irumaa iidi p'anù parãpa pipùara ijãadamerã mãik'aapa oodamerã Cristopa oopi bùk'a. 10 Ma–it'ee mùa na k'art'a parãmaa p'ãji mù wãi naaweda. Mùa parã ùtrùa k'inia–e bù mãik'aapa apida t'ãri p'uapi k'inia–e bù, Ak'õrepa mùmaa mãga oopi bù mîda. T'ãri p'uapii k'ãyaara, mùa parã k'aripa k'inia bù pipùara ijãadamerã. Ma–it'eepù Tachi Ak'õrepa mù parãmaa pëiji.
Pablopa jarada na k'art'a p'ã aupa wãde
11 Ârá âpemaarã, na k'art'a aupa k'inia bù. K'inia bù parã o–îa p'anapataadamerã mãik'aapa ne–inaa jõmaweda oo k'inia p'anapataadamerã Cristopa oopi bùk'a. T'ãri auk'a, k'ãiwee, chik'inia p'anapatáatù mùa ûraadak'a. Mãgá Tachi Ak'õrepa parã pia ak'ùit'ee, irua eperãarã k'ãiwee p'anapipari perã mãik'aapa chik'inia p'anapipari perã.
12 Âpemaarã ome chik'inia saludaapatáatù parãpa ichita oopatak'a. Nãpema Cristode ijãapataarãpa parãmaa salude pëiruta.
13 Taipa k'inia p'anù Tachi Waibùa Jesucristopa parã k'aripamerã. Ichiaba k'inia p'anù Tachi Ak'õrepa parã chik'inia p'anapimerã mãik'aapa Tachi Ak'õre Jaurepa parã jõmaarãmaa k'awapimerã wãara Cristodeerã.
Mãgapai paji.