1 CORINTIOS
San Pablopa K'art'a Naapùara P'ãda Corinto P'uurudepema Ijãapataarãmaa
San Pablo, Jesucristopa jùrùt'eradapa na k'art'a p'ãji, Éfeso p'uurude bak'ãri. P'ã pëiji Corinto p'uurudepema ijãapataarãmaa. Pablo Jesucristo ûraa jaratee nipak'ãri judio–eerã t'ãide Corinto p'uurude, mãùrã ûk'uru Cristode ijãa p'aneejida. Corinto p'uuru waibùa baji Grecia eujãde. Mama eujã k'îra t'ãdoodeepa net'aa aneedap'edaa netopachida. Ichiaba mama p'anapachida awaraa ak'õre waibùa apatade ijãapataarã k'îra t'ãdoo. Maperã Cristode ijãapataarã nepùra k'îra t'ãdoode baaipachida. Pablopa na k'art'a p'ãji ãra ûraait'ee, jîp'a Jesucristode ijãapataadamerã; ãchi p'ek'au k'achia oo amaadamerã mãik'aapa chik'inia p'anapataadamerã Cristopa k'inia bùk'a.
Naapùara Pablopa gracias jara bù Tachi Ak'õremaa ma Corintodepemaarã pari, Jesucristode wãara ijãapata perã (cap. 1.1-9). Mamîda t'êepai ãra ùtrùa bù k'îsia awara–awaraa p'anapata perã, chik'inia p'anada–ee (caps. 1.10--4.21). Ichiaba ãra ùtrùa bù ãchi t'ãide p'ek'au oopataarã ichiak'au bùpata perã mãik'aapa charraarãmaa nepùra ateepata perã, t'ãri auk'a bùdai k'ãyaara Cristopa k'inia bùk'a (caps. 5--6). Jara bù sãga miak'ãi p'anùùrã p'anapataadaipia bù (cap. 7) mãik'aapa sãga p'anapataadaipia bù ijãadak'aa beerã ãchi ik'aawa p'anapataarã ome (caps. 8.1--11.1). P'anau bù Corintodepemaarãpa iidi pëidap'edaa, k'awa k'inia p'anadak'ãri sãga oodaipia bù chip'edaidak'ãri ùt'aa t'âpataadait'ee (cap. 11.2-16). Ichiaba jara bù ijãapataarã nek'opatade Cristo piuda k'irãpadak'ãri (cap. 11.17-34); sãga p'anapata wãara chik'inia iru p'anapataarã (cap. 13) mãik'aapa Tachi Ak'õre Jaurepa ijãapataarãmaa ne–inaa oopiparide (caps. 12 y 14). Jara bù k'ãata jara k'inia bù Jesús piup'eda chok'ai p'irabaida irude ijãapataarã–it'ee (cap. 15). T'êepai jara bù sãga p'arat'a p'edaipia bù awaraa ijãapataarã k'aripadait'ee mãik'aapa ichia k'îsia iru bù ooit'ee (cap. 16).