2 CORINTIOS
San Pablopa K'art'a T'êepema P'ãda Corinto P'uurudepema Ijãapataarãmaa
San Pablo, Jesucristopa jùrùt'eradapa na k'art'a p'ãji. Na k'art'a p'ãk'ãri Corintodepema ijãapataarãmaa, Macedonia eujãde baji. Na k'art'a p'ãji k'awaak'ãri Corintodepema ijãapataarã t'ãide pedee k'achia jaradap'edaa iru ãpùte. K'irãpapi bù ichi Cristopa jùrùt'erada mãik'aapa k'îra jîp'a nipada ãra t'ãide jaratee nipak'ãri. Awaraa k'art'a p'ãda k'ãyaara, na k'art'ade Pablopa jîp'a jara bù ichi t'ãridepai k'îsia iru bada.
Naapùara jara bù ichi chupùria nâbada, Cristopa ooda eperãarã k'aripait'ee jarateepari k'aurepa (cap. 1.1-11). Jara bù sãap'eda audú ùtrùa pedee p'ãji ãramaa (caps. 1.12--2.4); ârá sãga o–îa bù ãradepemapa ne–inaa k'achia oopata oo amaada perã mãik'aapa iru ûraadak'a oodap'edaa perã (cap. 2.5-17). Jara bù Ak'õrepa ûraa chiwidi jara pëida Cristo k'ap'ùa pari (caps. 3.1--4.6); sãap'eda ijãapataarãpa waaweedaik'araa bù piudait'ee (caps. 4.7--5.10); sãga Ak'õrepa ichi t'ãri auk'a bùpari ijãapataarã t'ãri ome (caps. 5.11--6.13) mãik'aapa Corinto p'uurudepemaarãpa ijãadap'edaa (caps. 6.14--7.16). Ma Corintodepema ijãapataarã nepùrade p'anadak'ãri, k'îsiada–e paji awaraa ijãapataarã k'aripadait'ee. Maperã Pablopa jara bù p'arat'a p'e atadamerã tee pëidait'ee Judeadepema chupùria beerãmaa (caps. 8--9). Ma eere Pablopa p'anau bù ichi ùmùateedap'edaarã. Jara bù sãga Cristopa ichi jùrùt'eraji mãik'aapa sãap'eda Corintodepema ijãapataarãpa iru ûraa ûridaipia bù, ãchi t'ãidepema seewa jarateepataarã ûridai k'ãyaara (caps. 10.1--13.10). T'êepai jara bù ichia k'inia bù ãra k'ãiwee, chik'inia p'anapataadamerã (cap. 13.11-14).