Ijãapataarã–it'ee p'arat'a p'edap'edaa
16
1 Ârá jarait'ee sãga p'arat'a p'edaipia bù pëidait'ee apemaarã ijãapataarã–it'ee. Óotù mùa jaradak'a Galacia eujãdepema ijãapataarãmaa, ãchi ùt'aa t'âpata chaa. 2 Tomia ewate parã chaachaa p'arat'a awara bùdaipia bù, parãmaa p'aa p'anùdepema. P'arat'a waibùa p'aa p'anù pùrã, waibùa awara bàtù. Mamîda mak'ùara p'aada–e p'anù pùrã, ma jîak'a awara bùdai. Mãga oodaipia bù ewaa p'arat'a p'enaadamerã mù panak'ãri. 3 Ma awara jùrùt'eradaipia bù parã t'ãidepemaarã, ma p'arat'a p'edap'edaa ateedamerã Jerusalendee. Mãpai mù parãmãi panak'ãri, k'art'a p'ã pëiit'ee ãra ome Jerusalendee, ijãapataarãpa k'awaadamerã wãara mãùrã parãpa jùrùt'erada. 4 Mãga–e pùrã, mù jida auk'a ãra ome wãi.Pablopa k'îsia iru bada Corinto p'uurudee wãit'ee
5 Mù wãit'ee Macedonia eujãdee ijãapataarã ak'ùde. Ma t'êepai wã k'inia bù Corinto p'uurudee parã ak'ùde. 6 K'îsia bù taarãit'ee parã ome p'usa t'ojara wãyaarumaa. Mãga ooru pùrã, k'inia bù mù k'aripadamerã jãmãik'aapa wãk'ãri. 7 Arak'atùa wiibai k'inia–e parãmãi. Jîp'a taarã bee k'inia bù, Tachi Ak'õrepa mãga k'inia bù pùrã. 8 Nãgaweda k'îsia bù beeit'ee nama Éfeso p'uurude Pentecostés fiestaa parumaa. 9 Nama at'ãri bee k'inia bù nãpema chok'araarãpa mùa jaratee bù ûri k'inia p'anadairã. Mapa jaratee nâbait'ee, chok'ara Tachi Ak'õre k'îra unuamaa iru p'anùùrãpa mãgá jarateepi k'iniada–e p'anù mîda.
10 Timoteo panak'ãri parãmaa, auteebai pedéetù iru ome, iru mù ome auk'a Cristo mimia oopari perã. 11 Iru oo iru p'anadaik'araa bù. Ma k'ãyaara pia ak'ù p'anátù mãik'aapa k'aripátù, o–îa chemerã apemaarã ijãapataarã ome mùa nùmaa bùmãi.
12 Parãpa iidi pëijida sãapai tachi âpema Cristo k'aurepa Apolo parãmaa wãit'ee. Mùa jaraji wãmerã apemaarã ome parã ak'ùde. Mamîda na wãdade wã k'inia–e paji. Jua pari bak'årita wãit'ee.
Pablopa jarada na k'art'a p'ã auparude
13 K'îrak'aupai apidaapa parã k'achiade baaipidai. Cristode ijãapatáatù mùa jarateedak'a mãik'aapa oopatáatù Cristopa oopi bùk'a. Pia choopatáatù Cristode ijãa p'anùde. 14 Ma awara parãpa oo p'anù jõmaweda chik'inia oopatáatù.
15 K'awa p'anù Estéfanas ichi te pidaarã ome naapùara Cristode ijãajida Acaya eujãde. Ãrapa apemaarã ijãapataarã k'aripapata. 16 Maperã mùa k'inia bù ãra pãchi poroorãk'a iru p'anadamerã mãik'aapa mãgá ichiaba iru p'anadamerã apemaarã ijãapataarã ãrak'a k'aripapata.
17 Mù o–îa bù chedap'edaa perã Estéfanas, Fortunato mãik'aapa Acaico mù k'aripade parã pari. 18 Ãrapa mù o–îapi chejida parã o–îapidap'edaak'a. Mapa ãra pari Tachi Ak'õremaa gracias teedáma.
19 Ásia eujãdepema ijãapataarãpa salude pëiruta. Ichiaba salude pëiruta Aquilapa Priscila ome mãik'aapa ãchi tede cheepurupata ijãapataarãpa. 20 Nãpema ijãapataarãpa auk'a salude pëiruta. Parã saludaadak'ãri, chik'inia saludaapatáatù.
21 Mù, Pablopa nãgà salude p'ãru mùchi juadoopa.
22 Eperã apidaapa Jesucristo k'iniada–e p'anù pùrã, Tachi Ak'õrepa mãgà k'achia ooit'ee. Tachi Waibùa Cristo, ¡isapai chéji!b
23 Mùa k'inia bù Tachi Waibùa Jesucristopa parã pia ak'ù bapariimerã. 24 Parã jõmaweda k'inia iru bù Jesucristodeerã perã.
Mãgapai paji.