ROMANOS
San Pablopa K'art'a P'ãda Romade P'anù Ijãapataarãmaa
San Pablo, Jesucristopa jùrùt'eradapa na k'art'a p'ãji. Pablo judío paji. Tachi Ak'õrepa Moisemaa ûraa p'ãpida pia k'awa baji, fariseo pada perã. Irua na k'art'a p'ã pëiji Romade p'anù ijãapataarãmaa; judiorã, judio–eerãmaa paara. Na k'art'a p'ãdade Pablopa jara bù ichia k'îsia iru bù wãit'ee Romadee mãik'aapa Españadee. Jesucristopa jùrùt'eradaarã waide mamaa wãda–e pada perã jarateede, na k'art'ade Pablopa jara bù sãga eperãarã ijãapataadaipia bù Jesucristode, irua ãra o k'achiadeepa k'aripa atamerã. Ichiaba jaratee bù judiorãpa ijãapata judio–eerãpa ijãapata ome; sãga p'anapataadaipia bù Cristode ijãadak'ãri.
Naapùara Pablopa jara bù ichi Jesupa jùrùt'erada; ichia ùt'aa t'âpari Romadepema ijãapataarã pari mãik'aapa sãap'eda na k'art'a p'ãji ãramaa (cap. 1.1-17). Jara bù eperãarã jõmaweda p'ek'au k'achia oopata jua ek'ari p'anapata perã, atuadait'ee. Maperãpù chupùria iididaipia bù Jesupa ãra ma o k'achiadeepa k'aripa atamerã (caps. 1.18--3.20). Jara bù sãga Jesude ijãadak'ãri, Tachi Ak'õrepa eperãarãpa p'ek'au k'achia oopata wêpapipari mãik'aapa ichi t'ãri auk'a bùpari ãchi t'ãri ome (caps. 3.21--5.11); Adán k'aurepa p'ek'au k'achia oopata; jõdee Cristo k'aurepa p'ek'au k'achia oo amaadai (caps. 5.12--6.23); ijãapataarã araa p'anadak'ãri Cristo ome, Tachi Ak'õre Jaure jua ek'ari p'anapata (caps. 7--8); judiorãpa Jesucristode ijãa k'iniada–e pada perã, Tachi Ak'õrepa ichi ûraa chiwidi k'awapiji tachi judio–eerãmaa, mamîda judiorã jida auk'a Ak'õre truadee wãdai Cristode ijãaruta pùrã (caps. 9--11). Jara bù sãga Cristode ijãapataarã p'anapataadaipia bù: chik'inia p'anapataadaipia bù mãik'aapa oodaipia bù Ak'õrepa k'inia bùk'a; ãchi poro waibùarã waawee p'anù; k'îra jîp'a nipa p'anù awaraarã ome (caps. 12.1--15.13). T'êepai na k'art'a p'ã aupa wãk'ãri, Pablopa salude pëiru ichi k'îra k'awa p'anùùrãmaa (caps. 15.14--16.27).