ROMANOS
San Pablopa K'art'a P'ãda Romade P'anù Ijãapataarãmaa
Salude pëida
1
1 Mù, Pablopa oopari Jesucristopa oopi bùk'a. Mapa nãgà k'art'a p'ãru. Tachi Ak'õrepa mù jùrùt'eraji mãik'aapa awara bùji jarateemerã irua pedee pia jara pëida Jesucristode.2 Chonaarãweda Tachi Ak'õrepa jaraji ma pedee pia jara pëida ichi pedee jarapataarã k'ap'ùa pari, ãrapa mãgà p'ãdamerã mãik'aapa jâadamerã awaraa ley p'ãda ome. 3 Ma jara pëidade Ak'õrepa jaraji ichi Warra uchiait'ee chonaarãwedapema Rey Daviddeepa, eperã jîp'aa uchiaparik'a. 4 Mamîda ichi warra eperã jîp'aa–e paji. Tachi Ak'õre Warra paji. Ak'ùpiit'ee Jesucristo wãara ichi Warra, Tachi Ak'õrepa iru jõmaarã k'ãyaara waibùara papiji, iru piup'eda, chok'ai p'irabaipik'ãri. Mãga ooji jõmaarãpa k'awaadamerã wãara Jesucristota Tachi Waibùa.
5 Cristopa mù pia ooji mù pëik'ãri mãga jarateenamerã. Mapa mùa jarateepari judio–eerã jõmaarãmaa, irude ijãadamerã mãik'aapa oodamerã irua oopi bùk'a. 6 Parãpa ichiaba ma jarateeda ijãajida. Tachi Ak'õrepa parã jida jùrùji Cristodeerãa papiit'ee.
7 Maperã mùa na k'art'a p'ãru parã Roma p'uurudepemaarãmaa k'irãpapiit'ee Tachi Ak'õrepa parã k'inia iru bù mãik'aapa parã awara bù k'inia bù ichideerã p'aneedamerã. Mùa ùt'aa iidi bù irua mãik'aapa Tachi Waibùa Jesucristopa parã pia ak'ù p'anadamerã. Mãgá k'ãiwee p'anapataadait'ee.
Pablo Romadee wã k'inia bada
8 Naapùara mùa jara k'inia bù Jesucristo k'aurepa mùa gracias jarapari mù Ak'õre Waibùamaa parã jõmaarã pari. Mùa mãgá gracias jarapari, ijãapataarã para bee chaa nepùrùpata perã parãpa wãara Jesucristode ijãa p'anù. 9 Tachi Ak'õrépata k'awa bù mù ichita ùt'aa t'âpari parã pari, t'ãripa oo k'inia bairã irua oopi bùk'a. Mapa jarateepari iru Warrapa ooda eperãarã k'aripait'ee. 10 Enenee nâbù Tachi Ak'õremaa mù k'aripamerã wãit'ee parã ak'ùde, irua mãga k'inia bù pùrã. Taarãru mù wã k'inia bù. 11 Parã k'îra ak'ù k'inia bù, parãmaa waapùara k'awaapiit'ee Ak'õre Jaurepa oopi bù. Mãgá parãpa pipùara oodai Ak'õrepa k'inia bùk'a. 12 Ma awara mãgá tachi jõmaweda chik'aripa p'anadai pipùara Cristode ijãadait'ee.
13 Âpemaarã Cristo k'aurepa, mùa parãmaa k'awapi k'inia bù mù wã k'inia bada parã ak'ùde. Mamîda p'oyaa–e paji. Parã auk'a k'aripa k'inia bù apemaarã judio–eerã k'aripaparik'a. K'inia bù parã t'ãidepemaarã ichiaba Cristode ijãadamerã mãik'aapa oodamerã irua oopi bùk'a. 14 Wãara Tachi Ak'õrepa mù jùrùt'eraji ichia jara pëida jarateenamerã jõmaarãmaa: Grecia eujãdepema pedee pedeepataarãmaa; aù pedee pedeedak'aarãmaa ichiaba; k'îsia k'awaa p'anùùrãmaa mãik'aapa k'îsia k'awa–ee p'anùùrãmaa paara. 15 Maperã parã Roma p'uurudepemaarãmaa ichiaba mùa jaratee k'inia bù Jesucristopa ooda eperãarã k'aripait'ee.
16 Mù k'îra nejasia–ee jarateeit'ee Cristopa ooda eperãarã k'aripait'ee, Tachi Ak'õre, ichi juapa aùde ijãapataarã k'aripait'ee perã atuanaadamerã. Naapùara mãga jara pëiji judiorãmaa mãik'aapa ârá mãga ichiaba jara pëiru judio–eerãmaa. 17 Mãgà jara pëida k'aurepa k'awa p'anù eperãarãpa k'awaadak'ãri Cristopa ooda ãchi–it'ee mãik'aapa irude ijãadak'ãri, Tachi Ak'õrepa ãchi p'ek'au k'achia wêe ak'ùpariit'ee. Tachia mãga k'awa p'anù Tachi Ak'õre Ûraa p'ãdade jara bairã:
‘Eperã Tachi Ak'õrede wãara ijãapari ichita bapariit'ee iru ome, p'ek'au k'achia wêe bairã iru k'îrapite.’ (Habacuc 2.4)
P'ek'au k'achia oopata k'aurepa atuadait'ee
18 Ùt'ariipa Tachi Ak'õrepa ijãapataarã mãgá p'ek'au k'achia wêe ak'ù bù mîda, ichia jõmaarãmaa k'awapi k'inia bù mãgá ak'ù–e ichide ijãadak'aa beerã. K'îrau bù ãchi ome p'ek'au k'achia ooi awaa p'anapata perã mãik'aapa ne–inaa k'achia oopata perã apemaarãpa ijãanaadamerã irua wãarata jara pëidade. 19 Ãchia mãga oopata, ãchi t'ãride pia k'awa p'anù mîda Tachi Ak'õre bapari. Mãga k'awa p'anù ichi jua at'apai ãchimaa ak'ùpidoo perã. 20 Tachi Ak'õrepa na eujã, pajã mãik'aapa ne–inaa jõma aùde nâbù oodak'ãriipa, eperãarãpa ma ooda ak'ù p'anapachida. Mãgá k'awaa wãpachida iru ichita bapari mãik'aapa jõmaweda irua ooda, eperãarãpa p'oyaa oodak'aa perã mãgee net'aa ãchi juadoopa. Mãga k'awa p'anajida mîda, ãchi k'inia p'ek'au k'achia oo wãpachida. 21 Mãgá Tachi Ak'õre k'awa p'anùde at'ãri irude ijãa k'iniadak'aa paji mãik'aapa ùt'aa t'â k'iniadak'aa paji gracias jaradait'ee, irua ãchi pia ak'ù bapachi mîda. Ak'õre net'aade k'îsiadak'aa paji. Maperãpù eperãarã k'îra k'awa–ee pùk'a p'anapachida, pia mãik'aapa k'achia k'awada–ee. 22 “Tachia ne–inaa jõma k'awa p'anùda” apachida. Mamîda wãara k'îsia k'awadak'aa paji, Ak'õrede ijãadak'aa paji perã. 23 Unupachida Tachi Ak'õrepa ne–inaa k'îra wãree ooda. Mamîda ùt'aa t'âdai k'ãyaara Ak'õre k'îra wãreemaa, irua oodadepema ne–inaa mãgee jîak'a juapa oopachida aù k'îrapite ùt'aa t'âpataadait'ee. Mãgá ùt'aa t'â p'aneejida eperã jîak'a ooda k'îrapite; ipana, ne–animal maa–e pùrã eujãde bipa nîuteepata, mãgee jîak'aa ooda k'îrapite. Mãga oopachida mãgee net'aa chook'aa mîda, eperãpa ooda perã. Jõdaipari eperãk'a. Mamîda Tachi Ak'õre ichita bapari.
24 Mãga oo k'inia p'anapachida perã, Tachi Ak'õrepa ichiak'au bëiji k'achia oodamerã chîara ome. Mãgá ãchia k'achia oo k'iniata oo wãpachida, k'îra nejasia–ee. 25 Tachi Ak'õrepa wãara ne–inaa jõmaweda ooji mîda, ma wãarata ijãadai k'ãyaara, seewa ijãapachida. Mapa ùt'aa t'âpachida irua oodamaa, irumaa ùt'aa t'âdai k'ãyaara. ¡Mamîda tachi ooda ichita Ak'õre Waibùa pait'ee! ¡Mãgùta Tachi Ak'õre Waibùa! Amén.
26 Ãchia mãgá Tachi Ak'õrepa oodamaa ùt'aa t'â p'anadap'edaa perã irua ichiak'au bëiji ãchia oo k'iniata oodamerã. Mãgá ne–inaa k'achia k'îra t'ãdoo oo wãpachida. Wêraarã awaraa wêraarã ome k'ãi k'inia p'anapachida, wêra chi ùmùk'îra ome k'ãiparik'a. 27 Ichiaba ùmùk'îraarãpa awaraa ùmùk'îraarã audú jùrùpachida ãchi ome auk'a araa k'ãidait'ee, wêraarã ome k'ãidai k'ãyaara. Mãga oo p'anùùpa k'îra nejasia wêe, ãchi k'ap'ùa miapipachida, Ak'õrepa oopi k'inia bùk'a eperãarãmaa oodaamaa p'anadap'edaa perã.
28 Ma awara Tachi Ak'õre k'awadaamaa p'anadap'edaa perã, irua ãchi ichiak'au atabëiji ne–inaa k'achia k'îra t'ãdoo k'îsiadamerã mãik'aapa oodamerã. 29 Mãgá p'ek'au k'achia k'îra t'ãdoo oo p'aneejida. Mãgee eperãarã nãgá p'anapata: pariatua awaraarã jùrùpata aù ome k'ãidait'ee; ik'awaa ne–inaa k'achia oodait'ee; chîara net'aa k'âayaa; chîara k'achia ooyaa; chîara k'îra unuamaa iru bee ne–inaa k'aurepa; chîara jùrùyaa peedait'ee; chõo jùrùyaa; chîara k'ûrayaa; t'ãri k'achia–idaa; chîara ãpùte k'achia pedeeyaa; 30 ik'achia jarayaa; Tachi Ak'õre k'îra unuamaa; auduayaa; ãchia oopata nepùrùyaa awaraarãpa ãchi t'o p'anadamerã; ne–inaa k'achia oodait'ee k'îsiayaa; ãchi ak'õreerã pedee ûridaamaa; 31 k'îsia k'awadak'aa; oodak'aa ãchia oodait'eeda apatak'a; ãchideerã paara k'îra unuamaa; k'îra jõdak'aa; chupùria k'awaadak'aa. 32 Mãgeerãpa ãchi t'ãridepai k'awapata p'ek'au k'achia oo p'anù Tachi Ak'õre k'îrapite. Ma awara k'awapata Tachi Ak'õrepa atuapiit'ee mãgee p'ek'au k'achia ooi awaa beerã. Mamîda ichi k'inia mãgee ne–inaa k'achia oo wãpata mãik'aapa pia ak'ùpata awaraarã ãchi ome auk'a oo wãpataarã.