Tachi Ak'õre ewari waibùa ewate
2
1 Mãgee k'achia oopataarã ak'ùk'ãri, parãdepema abaapa k'îsiai: “Mùa mãga oo–e pak'aji”. Mamîda pùa pida ne–inaa k'achia oopari Tachi Ak'õre k'îrapite. Maperã k'îrak'aupai jarai Tachi Ak'õrepa mãgee k'achia oopataarã miapiipia bù. Auk'a Ak'õrepa pù miapii, pùa k'achia oopata k'aurepa. 2 Wãara, tachia k'awa p'anù Tachi Ak'õrepa ne–inaa k'achia chook'aa ichi bùmãi. Maperãpù ichia ne–inaa pia oopari, jarak'ãri mãgeerã miapiit'ee ãchia p'ek'au k'achia oopata k'aurepa. 3 Mãga bùta ¿k'îsia bùk'ã irua pù miapi–e pait'ee, auk'a ne–inaa k'achia oopari mîda? 4 Maa–e pùrã ¿nãga k'îsia bùk'ã? “Tachi Ak'õre audú t'ãri pia bairã, chooit'ee mùa ne–inaa k'achia ook'ãri.” ¿K'awa–e bùk'ã Tachi Ak'õre t'ãri pia bapari pù ome, k'inia bairã pùa p'ek'au k'achia oo amaamerã? 5 Mamîda pùa oo–e bù Ak'õrepa k'inia bùk'a, k'ùùrù k'isua bapari perã. Maperã Tachi Ak'õre ewari waibùa ewate irua pù audupùara miapiit'ee awaraa k'achia oopataarã k'ãyaara. Mãga ook'ãri, ne–inaa pia ooit'ee, Tachi Ak'õrepa ichita ne–inaa pia oopari perã. 6 Ma ewate Tachi Ak'õrepa ak'ùit'ee eperãarã jõmaarãpa oopatap'edaa jarait'ee pia wa k'achia. 7 Ichi truadee wãpiit'ee nãgee eperãarã: ne–inaa pia oopataarã, k'inia p'anadairã Tachi Ak'õrepa ãchi pia ak'ùmerã, mãik'aapa ichita p'ana k'inia p'anapataarã iru ome iru trua k'îra wãreede. 8 Jõdee nãgee eperãarã atuapiit'ee: audua p'anapataarã mãik'aapa ooda–e p'anùùrã Tachi Ak'õrepa wãarata jara pëidak'a, ma k'ãyaara ne–inaa k'achia oo k'inia p'anadairã. Mãùrãpa Tachi Ak'õre k'îraupipata. Mapa ma ewate irua ãchi k'achia ooit'ee. 9 Ma ewate jõmaweda p'ek'au k'achia oopataarã miadait'ee mãik'aapa chupùria chitoonadait'ee, naapùara judiorã, maap'eda judio–eerã. 10 Jõdee pia oopataarã k'ãiwee p'anadait'ee, Tachi Ak'õrepa ãchi pia ak'ùit'ee perã mãik'aapa ichi trua k'îra wãreedee wãpiit'ee perã. Mãga p'anadait'ee naapùara judiorã, maap'eda judio–eerã. 11 Tachi Ak'õrepa judiorãpa oopatap'edaa, judio–eerãpa oopatap'edaa auk'a ak'ùit'ee.12 Mùa mãga jara bù Ak'õrepa judio–eerã atuapiit'ee perã ãchia p'ek'au k'achia oopata k'aurepa, Moisepa p'ãda k'awada–e p'anù mîda. Jõdee judiorã auk'a atuapiit'ee ãchia p'ek'au k'achia oopata k'aurepa, Moisepa p'ãda k'awa p'anù mîda, ooda–e p'anadairã jõmaweda ma p'ãdade jara bùk'a. 13 Tachi Ak'õrepa Moisemaa ûraa p'ãpida ûrirutapapai, eperã p'ek'au k'achia wêe bee–e pai Tachi Ak'õre k'îrapite. Mamîda eperã p'ek'au k'achia wêe beei Tachi Ak'õre k'îrapite, ooru pùrã jõmaweda ma p'ãdade jara bùk'a. 14 K'awa p'anù judio–eerãpa ichiaba oodai Moisepa p'ãdade jara bùk'a, ma p'ãda k'awada–e p'anù mîda. Mãga oodai oodak'ãri Tachi Ak'õrepa k'îsia pia bëidak'a eperãarã t'ãride, ewaaweda eperãarã ook'ãri. 15 Mãgá pia oodak'ãri, jõmaarãmaa ak'ùpipata ãchi t'ãride bëida auk'a bee Ak'õrepa p'ãpida ome. Ma k'îsia pia bëida k'aurepa ne–inaa pia k'awapata. Mapa ne–inaa pia oodak'ãri, k'ãiwee p'anapata. Jõdee ne–inaa k'achia oodak'ãri, k'îsia p'ua p'anapata. 16 Tachi Ak'õrepa mù jùrùt'eraji jarateemerã ichi Warra Jesucristopa ooda eperãarã k'aripait'ee. Irua ak'ùit'ee eperãarãpa oopatap'edaa Ak'õre ewari waibùa ewate. Iruata k'awapari jõmaarãpa ãchi t'ãride oo k'inia p'anù, pia wa k'achia. Mapa k'await'ee chisãgùùrã wãpii Ak'õre truadee mãik'aapa chisãgùùrã atuapii.
Judiorãpa Moisepa p'ãda iru p'anù
17 Parãpa jarapata: “Tai judiorã.” Mamîda parã audua p'anù Tachi Ak'õrepa oopi k'inia bù eperãarãmaa k'awa p'anùda apata perã. Mãga jarapata pãchi auk'aarãpa Moisepa p'ãda iru p'anadairã. 18 Wãara Moisepa p'ãda k'aurepa k'awa p'anù sãga oodaipia bù mãik'aapa sãga oodaik'araa bù, Tachi Ak'õrepa parã pia ak'ù bamerã. Ma awara ijãa p'anù Ak'õre Ûraa p'ãdade jara bùk'a wãara oodaipia bù jõmaarãpa, ma p'ãdade jara bù ûraa pia bairã. 19 K'îsia p'anù paråpata Tachi Ak'õrepa oopi k'inia bù eperãarãmaa jarateedai Moisepa p'ãda k'awa–ee beerãmaa, ãchia Ak'õre Ûraa k'awada–e p'anadairã. 20 Parã–it'ee ãchi k'îsia k'awa–ee beerãk'a p'anù maa–e pùrã warra chak'eerãk'a p'anù. Parã judiorãpa ãchimaa jarateeda–e p'anù pùrã, ¿sãga k'awaadaima Ak'õrepa oopi k'inia bù ãchimaa? ¿Parãpa wãarata k'awa p'anù–ek'ã, Ak'õre Ûraa k'awa p'anapata perã? 21 Parãpa awaraarãmaa jarateepata Ak'õre Ûraa p'ãdade jara bùk'a oodaipia bù. ¿Mãga–ek'ã? Mamîda parãpa pida ooda–e p'anù ma p'ãdade jara bùk'a. Ûraapata awaraarãmaa nechùanaadamerã. Mamîda edaare parãpa mãga oopata. 22 Jarapata tachi wêra omepai k'ãiipia bù. Mamîda parãdepema ûk'uruurãpa chîara wêra jùrùpata, aù ome k'ãidait'ee. K'îra unuamaa iru p'anapatada apata ne–inaa k'îra t'ãdoo juapa ooda, aù k'îrapite ùt'aa t'âpata. Mamîda parãdepemaarã ûk'uru t'îupata mãgee ne–inaa iru p'anù tede nechùadait'ee. 23 Jara p'anù: “Táipata Tachi Ak'õre Ûraa k'awa p'anùda” apata. Mamîda wãara ooda–e p'anù Ak'õrepa jara bùk'a ma ûraade. Mapa parã k'aurepa awaraarãpa pedee k'achia jarapata Tachi Ak'õre ãpùte, 24 Ak'õre Ûraa p'ãdade nãga jara bùk'a:
‘Parã k'aurepa Tachi Ak'õrede ijãadak'aa beerãpa k'achia pedeepata iru ãpùte.’(Isaías 52.5)
25 Tachi Ak'õrepa oopidak'a chonaarãweda, tauchaa bùjida parãdepema ùmùk'îraarã k'ap'ùade, ak'ùpidait'ee parã Tachi Ak'õre eperãarã. Mamîda parãpa Tachi Ak'õre Ûraa p'ãdade jara bùk'a wãara ooda–e p'anù pùrã, auk'a p'aneepata tauchaa wêe beerã ome. 26 Jõdee, ma tauchaa wêe beerãpa wãara oo p'anù pùrã Ak'õre Ûraade jara bùk'a, Tachi Ak'õrepa ichideerã papiit'ee, tauchaa wêe p'anù mîda. 27 Mãgá Tachi Ak'õre k'îrapite mãùrã pipùara uchiadait'ee parã judiorã k'ãyaara. Ak'õrepa oopi bùk'a oo p'anùùpa ãrapa ak'ùpipata Ak'õrepa parã miapiipia bù, irua oopi bùk'a oo k'iniada–e p'anadairã. Mãga p'anapata, parã judiorãpa iru ley p'ãda k'awa p'anù mîda mãik'aapa pãchi k'ap'ùade tauchaa iru p'anù mîda. 28 Ma jõma jara aupadade k'îsiadak'ãri, k'awa p'anù Tachi Ak'õrepa ichideerã papi–e judiorãda apataarã, ne–inaa oopata perã irua ley p'ãdade jara bùk'a maa–e pùrã ãchi k'ap'ùade tauchaa bùpata perã. 29 Ma k'ãyaara ichideerã papipari chi t'ãripa irude wãara ijãapataarã. Jaradai ãchia tauchaa pùk'a iru p'anù ãchi t'ãride, k'ap'ùade iru p'anadai k'ãyaara. Mãgá t'ãripa wãara ijãadak'ãri, Ak'õre Jaure ãchi ome ba chepari. Mãgà pipùara bù Ak'õre Ûraa p'ãdade iru p'anadai k'ãyaara, iruata k'awapipari perã jõma Tachi Ak'õrepa oopi k'inia bù. Tachi Ak'õrepa mãgee wãara ijãapataarã pia ak'ùpari, awaraarãpa ãra mãgá ak'ùda–e p'anù mîda.