Tachi Ak'õrepa ichita oopari ichia jara bùk'a
3
1 Mãgara, ¿k'ãare–it'ee eperã k'ap'ùade tauchaa bùi judío pamerã? ¿Pipùara bù–ek'ã judio–ee bait'ee, judío pai k'ãyaara? 2 ¡Mãga–epù! Tachi Ak'õrepa judiorãta naapùara jùrùt'eraji ichia jarada jâadamerã mãik'aapa awaraarãmaa jarateedamerã. 3 Made Ak'õrepa ichi ûraa jaraji judiorãmaa. Mamîda ãchidepema ûk'uruurãpa ma ûraa ijãada–e p'anapachida. Maperã ooda–e paji irua oopi k'inia bùk'a. Ãrapa mãgá ijãada–e p'anadap'edaa perã, ¿Ak'õrepa oo amaa beejik'ã ichia jaradak'a ma ley p'ãdade? 4 ¡Mãga–e! Ak'õrepa seewa jarak'aa eperãarãk'a. Jîp'a oopari ichia jara bùk'a. Ichi ley p'ãdade chonaarãwedapema Rey David it'aideepa jaraji:‘Ak'õre, mùa ne–inaa k'achia oopata ak'ùp'eda, pùa wãarata jarapari “k'achia bùda” ak'ãri. Pù ùmùateepataarã ichita p'oyaapariit'ee, pùa aupaita ak'ùit'ee perã eperãarãpa oopata jarait'ee pia wa k'achia.’ (Salmos 51.4)
5 Mamîda tai judiorãpa ne–inaa k'achia oo p'anadak'ãri, ak'ùpipata Tachi Ak'õre pipùara bù eperãarã k'ãyaara, irua maarepida k'achia ook'aa perã. Mãgara ¿k'ãata jaradaima? “¿Tachi Ak'õre, tachi ooda t'ãri k'achia bùk'ã, k'achia oopataarã atuapiit'ee perã?” (Mùa mãga iidik'ãri parãmaa, pedeemaa bù eperã k'îsia k'awa–ee bùk'a.) 6 ¡Tachi Ak'õre t'ãri k'achia–epù! Mãga bada paara tachi ome, ¿sãga ak'ùk'ajima na p'ek'au eujãdepemaarãpa oopata jarait'ee pia wa k'achia?
7 Mùa mãga k'îsia bada paara, eperã k'îsia k'awa–ee bùpa jarak'ajik'a ichiaba mùa mãga jarai: “Mùa seewa jarak'ãri, ak'ùpimaa bù Tachi Ak'õre pipùara bù mù k'ãyaara, irua seewa jarak'aa perã.” Mãgara mùa k'îsiak'aji seewa jara bùpa jõmaarãpa Tachi Ak'õre pipùara ak'ùdait'ee, irua wãarata jarapari perã. Mãga pada paara ¿sãap'eda Ak'õrepa mù atuapiima ma seewa jarada k'aurepa? 8 Wãara judiorã ûk'uruurãpa mù ãpùte jara p'anùda a p'anù, mùa jarateepari ne–inaa k'achia oodaipia bù, jõmaarãpa Tachi Ak'õre pipùara ak'ùdamerã. ¡Mùa mãga jarateek'aapù! Ak'õrepa k'awa bù k'airãpa mãga jarateepata mãik'aapa ichia mãgùùrã miapiit'ee ma k'aurepa.
Jõmaarãpa p'ek'au k'achia oopata
9 Ma jõma jara aupadade k'îsiadak'ãri, k'awa p'anù tai judiorã pipùara p'anù–e judio–eerã k'ãyaara, Ak'õrepa ichi ley p'ãda tai ome bëida perã. Et'ewa mùa ak'ùpiji parãmaa tachi jõmaarãpa p'ek'au k'achia oopata, p'ek'au k'achia jua ek'ari p'anapata perã; judiorã, judio–eerã auk'a. 10 Ichiaba Tachi Ak'õre Ûraa p'ãdade jara bù:
‘Eperã apida p'ek'au k'achia wêe bù–e Tachi Ak'õre k'îrapite. 11 Eperã apidaapa wãara k'awa–e bù ne–inaa pia ooit'ee. Eperã apidaapa jùrù–e bù Tachi Ak'õre wãara k'awaait'ee. 12 Jõmaarãta o k'achiade p'anù ãchia oo k'iniata oo p'anapata perã. Apidaapa oodak'aa Tachi Ak'õrepa oopi k'inia bùk'a, ne–inaa pia wãara p'oyaa oodak'aa perã.’ (Salmos 14.1-3; 53.1-3)
13 ‘Nãga pùk'a p'anù. Ara piuda k'ap'ùa pia ùada–e pak'ãri, mik'ia uchiaparik'a ma ùadap'edaamãiipa, mãga pùk'a pedee k'achia uchiapari ãchi it'aideepa, t'ãri k'achia–idaa p'anapata perã. Ãchi it'aideepa seewa aupai uchiapari.’ (Salmos 5.9)
‘Ara taamapa neera merã iru baparik'a chi k'idade eperã k'aait'ee, mãga pùk'a ãchi imeraa pedeepa eperãarã k'ûrapata ne–inaa k'achia oopidait'ee.’ (Salmos 140.3)
14 ‘Ik'achia pedeepata t'ãri k'achia p'anapata perã.’ (Salmos 10.7)
15 ‘Chîara audú pee k'inia p'anapata. 16 Mãùrã wãrutamaa ne–inaa k'achia oo wãpata awaraarãmaa mãik'aapa awaraarã t'ãri p'uapipata. 17 K'ãiwee p'anadak'aa mãik'aapa k'awadak'aa awaraarã mãgá p'anapidait'ee.’ (Isaías 59.7-8)
18 ‘Tachi Ak'õre waaweedak'aa, irude ijãadak'aa perã.’ (Salmos 36.1)
19 Tachia k'awa p'anù Tachi Ak'õrepa p'ãpiji ma et'ewa pedeeda judiorã–it'ee, ichia bëida perã ichi ley p'ãda tai chonaarã ome. Ma ûraa p'ãpiji apidaapa jaranaadamerã “mùata ne–inaa k'achia oo–e” mãik'aapa jõmaweda na p'ek'au eujãdepemaarãpa k'awaadamerã ãchia p'ek'au k'achia oopata k'aurepa Tachi Ak'õrepa ãchi atuapiit'ee. 20 Maperã k'awa p'anù eperã apida p'ek'au k'achia wêe bait'ee Tachi Ak'õre k'îrapite Moisepa p'ãda k'awapari perã maa–e pùrã ma p'ãdade jara bùk'a oopari perã. Jîp'a ma ley p'ãda k'aurepa k'awapata tachia k'achia oopata.
Eperãarã o k'achiadeepa uchiapata Cristode ijãadak'ãri
21 Mamîda ârá eperãarãmaa Tachi Ak'õrepa ak'ùpimaa bù p'ek'au k'achia wêe p'aneedai iru k'îrapite, ooda–e p'anù mîda jõmaweda irua jara bùk'a ichi ley p'ãdade. Mãga k'awa p'anù irua mãga ak'ùpida perã tai chonaarãmaa, Moisepa p'ãdade mãik'aapa Ak'õre pedee jarapataarãpa p'ãdap'edaade. 22 Tachimaa ak'ùpimaa bù ichia naaweda k'îsia iru bada: jõmaarãta wãara Jesucristode ijãa p'anùùrã p'ek'au k'achia wêe p'anapata Tachi Ak'õre k'îrapite, judiorã mãik'aapa judio–eerã paara. 23 Jõmaarãpa p'ek'au k'achia oopata. Eperã apida wê–e wãara ne–inaa jõmaweda oopari Ak'õrepa oopi bùk'a. 24 Mamîda Tachi Ak'õre audú t'ãri pia bapari perã mãik'aapa eperãarã k'inia iru bapari perã, pëiji ichi warra Jesucristo p'ek'au k'achia oopataarã o k'achiadeepa k'aripa atamerã, p'ek'au k'achia wêe ichita p'anapataadamerã iru k'îrapite. 25 Jesucristopa eperãarã mãgá k'aripai Tachi Ak'õrepa iru piupida perã eperãarã pari. Chonaarãweda eperãarãpa p'ek'au k'achia oodak'ãri, Tachi Ak'õrepa choopachi mãik'aapa irua ma k'achia ãyaa bùpachi. Mamîda ma k'achia wêpapi–e paji. Jõdee eperãarã taide ichi warra kurusode piuk'ãri, iru waa bat'ada k'aurepa Tachi Ak'õrepa eperãarã p'ek'au k'achia jõmaweda wêpapiji, chonaarãpa chonaarãweda oopatap'edaa paara. 26 Mãga ooji ak'ùpiit'ee ichi wãara t'ãri pia bapari. Maperãpù eperã Cristode wãara ijãa bù p'ek'au k'achia wêe bapari Tachi Ak'õre k'îrapite.
27 Mamîda eperãpa jarai: “Tachi Ak'õrepa mùta pia ak'ù bapariit'ee mùa ne–inaa pia oopari perã”. Mamîda mãga–e. Tachi Ak'õrepa pia ak'ù bapariit'ee chi wãara Jesucristode ijãa bù aupai. 28 Ma jõma jara aupadade k'îsiadak'ãri, k'awa p'anù eperãarã p'ek'au k'achia wêe p'oyaa p'anadak'aa oo p'anadairã Tachi Ak'õre Ûraa p'ãdade jara bùk'a. Jîp'a p'ek'au k'achia wêe p'anadait'ee Tachi Ak'õre k'îrapite, Jesucristode ijãa p'anadairã.
29 Tachi Ak'õre jõmaarã Ak'õre Waibùa; judiorã Ak'õre Waibùa, ichiaba judio–eerã Ak'õre Waibùa. 30 Tachi Ak'õre apai. Maperã k'awa p'anù judiorã p'ek'au k'achia, judio–eerã p'ek'au k'achia auk'a wêpapipari, Cristode wãara ijãadak'ãri. 31 Mãga jaradak'ãri, ¿jara k'inia p'anùk'ã Ak'õre Ûraa p'ãda vale–ee pùk'a bù? ¡Mãga–e! Tachia Cristode wãara ijãadak'ãri, oopata ma ley p'ãdade jara bùk'a.