HECHOS
Jesucristopa Jùrùt'eradaarãpa Oodap'edaa
San Lucapa na historia p'ãji. Irua pedee pia p'ãda ome oodak'a p'ã pëiji ichi k'õp'ãyo Teofilomaa, nepùrù aupait'ee Jesús bapata mãik'aapa ichideerã p'anapatap'edaa iru ùt'aa wãda t'êepai. Na p'ãdade Lucapa jara bù Ak'õre Jaure chep'eda, sãga Jesude ijãapataarãpa iru ûraa jaratee wãpachida judiorãmaa mãik'aapa judio–eerãmaa paara. Audú jara bù Jesús ome nipapatap'edaarã p'anapata mãik'aapa Pablo bapata.
Naapùara jara bù Jesús ùt'aa wãda chi k'õp'ãyoorã taide mãik'aapa angeleerãpa iru waya cheit'eeda adap'edaa (cap. 1.1-11). Jara bù Matías jùrùt'eradap'edaa Judas Iscariote pari (cap. 1.12-26); Tachi Ak'õre Jaure ba cheda Jesude ijãapataarã ome mãik'aapa ãrapa jarateedap'edaa judiorã t'ãide (cap. 2); Pedro Juan ome jaratee nipapata (caps. 3.1--4.31); Cristode ijãapataarã p'anapatap'edaa (caps. 4.32--5.11) mãik'aapa irua jùrùt'eradaarã carcelde t'ù nâbùdap'edaa (cap. 5.12-42); siete k'aripapataarã bùdap'edaa (cap. 6.1-7); Esteban jita atadap'edaa mãik'aapa peedap'edaa (caps. 6.8--7.60); ijãapataarã erreudap'edaa Israel eujã jõmaade mãik'aapa Felipepa jaratee nipapata (cap. 8.1-40); Saulo Jesude ijãa beeda (cap. 9.1-31); Pedropa jaratee nipapata (caps. 9.32--11.18); judio–eerã chip'epatap'edaa Antioquía p'uurude (cap. 11.19-30); Herodepa ooda mãik'aapa piuda (cap. 12); Pablo naapùara wãda Jesús ûraa jarateede judio–eerãmaa (caps. 13.1--14.28); ijãapataarã poro waibùarã chip'edaidap'edaa Jerusalende (cap. 15.1-35); Pablo waya wãda judio–eerãmaa jarateede (caps. 15.36--18.22); Pablo t'êepai wãda judio–eerãmaa (caps. 18.23--21.16) mãik'aapa ijãadak'aa beerãpa Pablo carcelde t'ù nâbùdap'edaa Jesude ijãa bada k'aurepa (caps. 21.17--28.31).