Jesupa chi k'õp'ãyoorã ûk'uruurãmaa unupida
21
1 Ma t'êepai Jesupa ichi waya unupiji chi k'õp'ãyoorãmaa, Tiberíades Lago ik'aawa. Nãga paji. 2 Ma lago ik'aawa p'anajida Simón Pedro; Tomás ichiaba t'âjarapatap'edaa Me–iso; Natanael, Caná p'uurudepema Galilea eujãde bù; Zebedeo warrarã omé mãik'aapa Jesús k'õp'ãyoorã awaraarã omé. 3 Mama p'anùde Simón Pedropa mãgaji:—Mù to–ùanait'eeda aji.
Apemaarãpa p'anaujida:
—Tai jida wãdait'eeda ajida, pù ome.
Mãgá wãjida mãik'aapa barcode batauk'oodachida. Mamîda ma ewate p'ãrik'ua maarepida peeda–e paji. 4 Taujaaweda unujida Jesús bainâ bù lago ide. Mamîda iru k'awada–e paji. 5 Mãpai Jesupa iidiji:
—Warrarã, ¿Peeda–ek'ã? aji.
Ãchia p'anaujida:
—Maarepida peeda–eda ajida.
6 Mãpai Jesupa mãgaji:
—Barco juaraare t'ùrù t'aadapáde aji. Mãgara peedayada aji.
Irua jaradak'a oodak'ãri, ma t'ùrù p'oyaa jirada–e paji chik'o chùk'ùapa. 7 Mãpai mù, chi k'õp'ãyo Jesupa audú k'inia iru badapa Pedromaa mãgaji:
—¡Jãgà Tachi Waibùa!
Simón Pedropa “Tachi Waibùa” ûriruta, ichi ârùpema p'aru jâ beeji, ma p'aru êrapachi perã ma mimia ook'ãri. Mãpai toidú jâtùdachi. 8 Jõdee chi apemaarã k'õp'ãyoorã barcode chejida. T'ùrù jidiu aneejida chik'o ome, mak'ùara t'ùmùa–e bada perã lago ideepa; cien metropai baji. 9 Ipude bataudak'ãri, unujida ok'ok'îra urua nâbù chik'o ome mãik'aapa pan. 10 Mãpai Jesupa mãgaji:
—Chik'o ûk'uru anéetù parãpa et'ewa peedap'edaadepema.
11 Simón Pedro barcode bataudaip'eda, t'ùrù ipu idee jidiu aneeji. Aùde ciento cincuenta y tres chik'o waibùa bee p'aneejida. Mamîda ma t'ùrù jê–e paji. 12 Jesupa mãgaji:
—Nek'o chétù.
Chi k'õp'ãyoorã apidaapa iididak'aa paji k'aita iru, Jesuta k'awa p'anadap'edaa perã. 13 Mãpai Jesús ãra k'ait'aara cheji. Ma pan chik'o paada ome atap'eda, ãramaa jedet'aaji.
14 Ma Jesupa unupida õpee paji chi k'õp'ãyoorãmaa, iru chok'ai p'irabaida t'êepai.
Jesupa Simón Pedromaa iidida
15 Nek'odap'edaa t'êepai, Jesupa Simón Pedromaa iidiji:
—Simón, Juan warra, ¿pùa mù k'inia iru baparik'ã aji, apemaarãpa mù k'inia iru p'anapata k'ãyaara?
Pedropa p'anauji:
—Tachi Waibùa, pùata k'awa bù. Mùa pù k'inia iru bù.
Mãpai Jesupa mãgaji:
—Ewaa ijãa p'anùùrã ak'ùpariipáde aji, oveja ak'ùparipa oveja chak'eerã ak'ùparik'a.
16 Jesupa waya iidiji:
—Simón, Juan warra, ¿pùa mù k'inia iru baparik'ã? aji.
Pedropa p'anauji:
—Tachi Waibùa, pùata k'awa bù. Mùa pù k'inia iru bù.
Jesupa mãgaji:
—Mùde ijãapataarã ak'ùpariipáde aji, oveja ak'ùparipa ovejaarã ak'ùparik'a.
17 Waya iidida õpee iidiji:
—Simón, Juan warra, ¿pùa mù k'inia iru bùk'ã? aji.
Pedro k'îra pia–ee baji Jesupa iidida õpee mãgá iidida perã. P'anauji:
—Tachi Waibùa, pùa jõma k'awa bù. K'awa bùda aji, mùa pù k'inia iru bù.
Jesupa mãgaji:
—Mùde ijãapataarã ak'ùpariipáde aji, oveja ak'ùparipa ichi ovejaarã ak'ùparik'a. 18 Mùa wãarata jararu. Pù k'ûtrãa bak'ãri mãik'aapa ãyaa wãit'ee pak'ãri, pùchi p'aru pùchi juadoopa jâ beepachi. Mamîda pù chonaa pak'ãri, pùchi jua eratùit'ee mãik'aapa awaraapa pù p'aru jâ bùit'ee, maap'eda pù ateeit'ee pù wã k'inia–e bùmaa.
19 Jesupa mãga jarak'ãri, jara k'inia baji sãgá Pedro piuit'ee paji, mãga p'asak'ãri, eperãarãpa jaradamerã Tachi Ak'õre jõmaarã k'ãyaara waibùara bù. Mãga jarap'eda, Jesupa Pedromaa mãgaji:
—Mãga p'asait'ee mîda, mùde ijãaparíiji.a
Jesús k'õp'ãyo k'inia iru bada
20 Ãpùtee ak'ùk'ãri, Pedropa unuji mù, chi k'õp'ãyo Jesupa audú k'inia iru bada. (Pascua chik'o k'odak'ãri, mù Jesús ik'aawa baji iru k'õp'ãyoorã ome. Mù paji chi iidida: “Tachi Waibùa, ¿k'áipapù pù traicionaait'eema?” ada.)b 21 Pedropa mù unuk'ãri, Jesumaa iidiji:
—Tachi Waibùa, ¿k'ãata p'asait'eema aji, iru ome?
22 Jesupa p'anauji:
—Mùa k'inia bù pùrã iru chok'ai bamerã mù waya cherumaa, pù–it'ee p'ua–e bùda aji. Mùde ijãaparíiji.
23 Jesupa mãga jarada perã irude ijãapataarãpa k'îsiapachida mãgà k'õp'ãyo piu–e pait'ee. Mamîda Jesupa mãga jara–e paji. Jîp'a jaraji: “Mùa k'inia bù pùrã iru bamerã mù waya cherumaa, pù–it'ee p'ua–e bùda” aji.
24 Mãgà “k'õp'ãyo” et'ewa jarada mù, Juanpa nãgà pedee nepùrùmaa bù parãmaa. Na jõma mùa p'ãji. Mapa k'awa p'anù jõma nepùrùda na p'ãdade wãara.
25 Jesús na p'ek'au eujãde bak'ãri, awaraa ne–inaa chok'ara oopachi. Ma ne–inaa jõma aba–abaa p'ãdap'edaa paara, mùa k'îsia bù ma p'ãda jõmaweda araa–e pak'aji na eujãde.