Jesús chok'ai p'irabaida
(Mateo 28.1-10; Marcos 16.1-8; Lucas 24.1-12)
20
1 Tomia ewate tap'eweda, María Magdalena wãji Jesús k'ap'ùa ùadap'edaamaa. Panak'ãri, unuji chi mãu te uria t'ai mãupa t'ap'a bada awara ãi bù. 2 Mapa p'ira cheji Simón Pedromaa mãik'aapa mù, chi apema k'õp'ãyo Jesupa k'inia iru badamaa. Mãpai mãgaji:—¡Tachi Waibùa k'ap'ùa ateejidada! aji. ¡K'awada–e p'anù sãma ata bùnajida!
3 Mãga ûridak'ãri, Pedro mù ome araa wãjida ak'ùde. 4 Omeeweda auk'a p'ira wãjida. Mamîda mù Pedro k'ãyaara isapaira p'iradachi. Mapa naapùara panaji Jesús ùadap'edaamãi mãu te uriade. 5 Âjaabaik'ãri ak'ùit'ee edaa, chi p'aru aupai unuji. Mamîda t'îu–e paji. 6 Mãga nùde Simón Pedro pacheji mãik'aapa t'îuji edú. Ma lienzo ichiaba unuji. 7 Ma awara unuji Jesús poro pùra bada p'aru, bedap'eda awara ãi bù. 8 Mãpai mù auk'a t'îuji. Ak'ùk'ãri, ijãaji Jesús chok'ai p'irabaida, aù naaweda taipa ijãada–e paji mîda. 9 Waide k'awada–e paji Tachi Ak'õre Ûraa p'ãdade jara k'inia bù Jesús piup'eda, chok'ai p'irabaiit'eeda ak'ãri. 10 Maap'eda tai omeeweda temaa wãjida.
María Magdalenapa Jesús unuda
(Marcos 16.9-11)
11 Mamîda María beeji mãu te uria k'ait'a jêemaa. Mãgá jêe nâbùde âjaabaiji edaa ak'ùit'ee. 12 Unuji angeleerã omé p'aru t'o–t'oo jâ p'anù. Su–ak'ù p'anajida Jesús k'ap'ùa badamãi, aba chi poro bada eere, aba chi jîru bada eere. 13 Ãchia iidijida Mariamaa:
—Wêra, ¿sãap'eda jêemaa bùma? ajida.
Mãpai Mariapa mãgaji:
—Mùchi Waibùa k'ap'ùa ateejidada aji. K'awa–eda aji, sãmaapù bùnajida.
14 Mata ãpùtee ak'ùk'ãri, unuji Jesús mama bainâ bù. Mamîda iru k'îra k'awa–e paji. 15 Mãpai Jesupa iidiji:
—Wêra, ¿sãap'eda jêe nâbùma? aji. ¿K'aita jùrù bùma? aji.
Mariapa k'îsiaji ma eperã chi jãùradepema ne–uu ak'ùpari. Mapa mãgaji:
—Mù chupùria k'awáaji. Pùa Jesús k'ap'ùa ateeji pùrã, jaráji sãma iru bù. Mùa atanait'eeda aji.
16 Mãpai Jesupa mãgaji:
—¡María!
Ichi t'âjarak'ãri, waya ãpùtee ak'ùji mãik'aapa hebreo pedeede mãgaji:
—¡Rabuni! (Jara k'inia bù “Tachi Jarateepari”.)
17 Jesupa mãgaji:
—Mù k'ena pïiji waide mù Ak'õremaa wã–e bairã. Jaranapáde aji, mù k'õp'ãyoorãmaa: “Mù wãit'ee mù Ak'õremaa; iru ichiaba parã Ak'õre. Mù wãit'ee mù Ak'õre Waibùamaa; iru ichiaba parã Ak'õre Waibùa.”
18 Mãpai María Magdalena wãji Jesús k'õp'ãyoorãmaa nepùrùde ichia unuda mãik'aapa Jesupa jarada.
Jesús chi k'õp'ãyoorãmaa cheda
(Mateo 28.16-20; Marcos 16.14-18; Lucas 24.36-49)
19 Mãgà ewate tomia ewate paji. K'eupodopa Jesús k'õp'ãyoorã teeda p'anajida. Puerta jâa iru p'anajida judiorã poro waibùarã waidoopa. Mãga nùde Jesús ãra esajîak'a bainâ ba cheji mãik'aapa mãgaji:
—P'eranáatù. K'ãiwee p'anapatáatù.
20 Mãga jarap'eda, ãramaa ak'ùpiji ichi jua mãik'aapa ichi orro. Jesús k'awaadak'ãri, t'ãri o–îadachida. 21 Waya Jesupa mãgaji:
—¡K'ãiwee p'anapatáatù! Mù Ak'õrepa mù pëidak'a, mùa parã jida auk'a pëiru.
22 Mãga jarap'eda, jãrap'uaji ãchi ârù mãik'aapa mãgaji:
—Ak'õre Jaure auteebáitù, parã ome ba chemerã. 23 Eperãarãpa ãchia p'ek'au k'achia oopata oo amaaruta pùrã mùde ijãadait'ee, parãpa ãramaa jaradai: “Tachi Ak'õrepa pãchia p'ek'au k'achia oopata wêpapiit'ee,” mãik'aapa Ak'õrepa ooit'ee parãpa jaradap'edaak'a. Jõdee eperãarãpa mùde ijãadaamaaruta pùrã, parãpa ãramaa jaradai: “Tachi Ak'õrepa pãchia p'ek'au k'achia oopata wêpapi–e pait'ee,” mãik'aapa Ak'õrepa ooit'ee parãpa jaradap'edaak'a.
Tomapa Jesús unuda
24 Tomás, ichiaba t'âjarapatap'edaa Me–iso, Jesús k'õp'ãyoorã docedepema paji. Mamîda mãgà wê–e paji Jesús chek'ãri apemaarãmãi. 25 Mapa chi k'õp'ãyoorãpa irumaa mãgajida:
—Taipa Tachi Waibùa unujidada ajida.
Mãga ûrik'ãri, Tomapa mãgaji:
—Mùa unuk'ãri clavopa merap'edap'edaamãi iru juade mãik'aapa aùde mù jua k'â t'ùk'ãri, maap'eda iru orrode sudamãi mù jua t'ùk'ãri, ijãayada aji, Jesús chok'ai bù. Mãga–e pùrã, ijãa–eda aji.
26 Tomia abaamaa waya Jesús k'õp'ãyoorã ma tede p'anadak'ãri, Tomás jida baji. Puerta jâa baji mîda, Jesús ãchi t'ãide bainâ ba cheji mãik'aapa mãgaji:
—¡K'ãiwee p'anapatáatù!
27 Mãpai Tomamaa mãgaji:
—Ak'ù chéji mù jua, mãik'aapa pùchi jua k'â t'ùt'áaji. Ichiaba pùchi jua mù orrode t'ùt'áaji. ¡Ijãa–eda ai k'ãyaara, ijãa bùda aparíiji!
28 Mãpai Tomapa mãgaji:
—¡Mùchi Waibùa, ârá mùa ijãa bùpù. Pù Tachi Ak'õre Waibùa!
29 Mãpai Jesupa mãgaji:
—Pùa ijãa bù mù unuda perã. ¡T'ãri o–îa p'anù chi mùde ijãa p'anùùrã, mù unuda–e p'anù mîda!
Sãap'eda nãgà p'ãda
30 Wãara chi k'õp'ãyoorã taide Jesupa awaraa ne–inaa chok'ara ooji, ne–inaa eperãarãpa p'oyaa oodak'aa @ãchi juadoopa. Mùa na p'ãdade ma jõma p'ã–e paji. 31 Mamîda nãgà p'ãji parãpa ijãapataadamerã Jesús Tachi Ak'õre Warra; irua pëida eperãarã k'aripamerã. Jesude ijãa p'anù pùrã, ùt'aa wãdait'ee jai–idaadak'ãri.