19
1 Mãpai Pilatopa Jesús wùpiji soldaorãmaa. 2 Soldaorãpa poro jâra pak'uru jua ne–ùùrù–idaa bùdee oodap'eda, Jesús porode jâ bùjida mãik'aapa p'aru p'oree teesoo, k'îra p'ãimap'ãimaa bù, jâ bùjida. 3 Maap'eda irumaa chejida mãik'aapa mãgajida:—¡Ak'àtù Judiorã Rey!
Mãpai k'îramaa sîpachida.
4 Pilato waya tedeepa uchiak'ãri, mãgaji:
—Ak'àtù. Mùa iru nama aneeru parã taide. K'awapi k'inia bù parãmaa mùa maarepida ne–inaa k'achia unu–e na eperãde.
5 Jesús uchiak'ãri, ma poro jâra jâ baji mãik'aapa p'aru teesoo. Mãpai Pilatopa mãgaji:
—¡Nama bù chi eperã!
6 Jesús unu atadak'ãri, p'aareerã poroorãpa mãik'aapa Tachi Ak'õre te jâapataarãpa biapachida:
—¡Kurusode peepit'áaji! ¡Kurusode peepit'áaji!
Mamîda Pilatopa mãgaji:
—Mãgara pãchia @atadaidapáde aji, mãik'aapa peet'aanadapáde aji. Mùa maarepida unu–e bù ne–inaa k'achia ooda ma k'aurepa peepiit'ee.
7 Mamîda ma judiorã poro waibùarãpa p'anaujida:
—Tai ûraade jara bù eperãpa ichi Tachi Ak'õre Warrada aru pùrã, piuipia bù. Mãga ooji jãgà eperãpa.
—¿Pù, sãpemama? aji.
—¿Mù pedee p'anau–ek'ã? aji. ¿K'awa–e bùk'ã aji, mùa pù kurusode peepi k'inia bait'eera peepit'aai, maa–e pùrã peepi k'inia–e bait'eera k'ena pëi?
11 Mãpai Jesupa p'anauji:
—Pùa mùmaa maarepida oo–e pak'aji, ùt'ari baparipa pù eperãarã poro waibùa papi–e pada paara. Maperã chi eperã mù nama pëidapa ne–inaa k'achiara oo bùda aji, pù k'ãyaara.
12 Maadak'ãriipa Pilatopa k'îsiapachi sãga Jesús k'ena pëii. Mamîda judiorãpa biapachida:
—¡Jãgà eperã peepi–e pùrã, pù César k'õp'ãyo–eda! apachida. ¡Eperãpa ichi reyda a bù pùrã, mãgùpa César k'îra unuamaa iru bùda! ajida.
13 Pilatopa mãga ûrik'ãri, Jesús taawaa ateepiji mãik'aapa ichi su–ak'ù beeji charra su–ak'ù beeparimãi, hebreo pedeede Gabatá apatap'edaa, griego pedeede “Mãu Choma P'ep'edee Bùmãi”. 14 Mãgà ewate Pascua fiesta norema paji. Imat'ùpa Pilatopa mãgaji ma judiorã poro waibùarãmaa:
—¡Ak'àtù! ¡Nama bùda aji, pãchi rey!
15 Mamîda ãchia biapachida:
—¡Ãyaa ateepíji! ¡Ãyaa ateepíji! ¡Kurusode peepit'áaji!
Pilatopa iidiji:
—¿K'inia p'anùk'ã aji, mùa pãchi rey peepimerã?
P'aareerã poroorãpa p'anaujida:
—¡Taipa awaraa rey wêe p'anùda ajida, César awara!
16 Mãpai Pilatopa Jesús teeji ichi soldaorãmaa kurusode peet'aanadamerã.
Jesús peet'aadap'edaa
(Mateo 27.32-44; Marcos 15.21-32; Lucas 23.26-43)
17 Jesumaa kuruso ateepidap'eda, uchiajida p'uurudeepa taawaa wãdait'ee “Tachi Poro Bùùrù” apatap'edaamaa. (Hebreo pedeede Gólgota apachida.) 18 Mama merap'edap'eda, ma kurusode baijira bùjida piumerã. Iru ik'aawa bùjida awaraarã omé, aba juaraare, aba juabi eere.
19 Pilatopa letrero p'ãji Jesús kurusode bùdamerã. Nãga p'ãji: Jesús Nazaretdepema, Judiorã Rey. 20 Judiorã chok'araarãpa leejida ma p'ãda, Jesús peedap'edaamãi p'uuru k'ait'a bada perã. Ma p'ãda p'ã baji hebreo pedeede, latín pedeede mãik'aapa griego pedeede. 21 Ma p'ãda leedak'ãri, p'aareerã poroorãpa mãgajida Pilatomaa:
—P'ãnáaji Judiorã Rey. Ma k'ãyaara nãga p'ãpáde ajida. Na eperãpa jaraji ichita Judiorã Rey.
22 Mamîda Pilatopa p'anauji:
—Mùa p'ãda perã jãgá p'ã beeit'eeda aji.
23 Soldaorãpa Jesús kurusode baijira bùdap'eda mãik'aapa iru p'aru atadap'eda, ãchi k'îmariirãmaa jedet'aajida. Mamîda chi edupema p'aru teesoo baji, k'aat'ù–ee; jîp'a k'a baji. 24 Mapa mãgajida:
—Jênaadáma. Ma k'ãyaara suerte jemenedáma k'awaadait'ee k'áipata atait'ee.
Mãga oojida uchiamerã Tachi Ak'õre Ûraa p'ãdade jara bùk'a:
‘Mùchi p'aru jedejida mãik'aapa suerte jemenedak'ãri, mùchi p'aru jitajida’. (Salmos 22.18)
25 Soldaorãpa mãga oo p'anù misa, kuruso k'ait'a bainâ p'anajida Jesús nawe chi nawe âpewêra ome, awaraa María, mãgà Cleofás wêra pada, mãik'aapa María Magdalena. 26 Jesupa unuk'ãri chi nawe k'ait'a bainâ bù mù, chi k'õp'ãyo k'inia iru bada ome, chi nawemaa mãgaji:
—Nawe, jã pùchi warrapù.
27 Maap'eda mùmaa mãgaji:
—Jã pùchi nawepù.
Maadak'ãriipa mùa María iru bapachi mù tede mùchi nawek'a.
Jesús jai–idaada
(Mateo 27.45-56; Marcos 15.33-41; Lucas 23.44-49)
28 Ma t'êepai Jesupa k'awaak'ãri jõmaweda ichia ooit'ee bada auparu, mãgaji:
—‘Opisia nâbùda aji.’ (Salmos 69.21)
Mãga jaraji uchiamerã Tachi Ak'õre Ûraa p'ãdade jara bùk'a. 29 Mama iru p'anajida vino achuchua chok'ode. Aùde esponjak'a p'êesap'êesaa bù topa atadap'eda, jõi bùjida hisopo k'âde mãik'aapa it'aimãi t'ù atajida. 30 Sõp'eda, Jesupa mãgaji:
—Ârá jõma aupajida aji.
Mãpai ichi poro âjaabaip'eda, jai–idaaji.
Miasupa Jesús orro sudap'edaa
31 Ma ewate Pascua fiesta âipata ewate norema paji. Judiorãpa mãgà ewate ùapata perã, k'iniada–e p'anajida piuda k'ap'ùa kurusode p'aneedamerã. Maperã iidijida Pilatomaa kurusode p'anadap'edaarã jîru k'õrapik'oomerã, mãgá isapai piudamerã. Mãgá chi piuda k'ap'ùa kurusodeepa ùrabai atapidai. 32 Pilatopa ooji ãchia iididap'edaak'a. Romadepema soldaorã wãdap'eda, Jesús ik'aawa baijira p'anadap'edaarã jîru k'õrak'oonajida, waide piuda–e p'anadap'edaa perã. 33 Mamîda Jesús k'ait'a panadak'ãri, piu bù unujida. Maperã iru jîru k'õrada–e paji.
34 Ma k'ãyaara soldaopa Jesús orrode miasupa sut'aaji. Aramata uchiaji waa pania ome. 35 Mù, chi mãga unudapa nepùrùmaa bù mùa unuda. Mùa k'awa bù wãarata jara bù, mùa mãga unuda perã. Mùa nãga jara bù parãpa pida ichiaba ijãadamerã. 36 Mãga p'asaji uchiamerã Ak'õre Ûraa p'ãdade jara bùk'a:
‘Iru bùùrù apida bùada–e paji’.a (Salmos 34.20)
37 Ichiaba mãga p'asaji uchiamerã pedee awaraa Ak'õre Ûraa p'ãdade jara bùk'a:
‘Ak'ùdait'ee eperã ãchia sut'aadap'edaa’. (Sofonías 12.10)
Jesús ùadap'edaa
(Mateo 27.57-61; Marcos 15.42-47; Lucas 23.50-56)
38 Ma t'êepai Josepa Pilatomaa Jesús k'ap'ùa iidinaji, ichimaa ùapimerã. Ichi Arimatea p'uurudepema paji mãik'aapa Jesude ijãa bapachi. Mamîda judiorã poro waibùarã waidoopa, awaraarãmaa k'awapi–e paji. Pilatopa Josemaa jaraji Jesús k'ap'ùa atanamerã. 39 José ome cheji Nicodemo, chi naaweda Jesús ome p'ãrik'ua pedeenada. Mãgùpa aneeji treinta kilo mirra k'era áloe k'era ome p'oirada Jesús piuda k'ap'ùa ârù p'odait'ee. 40 Judiorãpa oopatak'a piuda ùadak'ãri, ãchia Jesús k'ap'ùa ma k'era ome pi–ia pùrat'aajida lienzode. 41 Jesús peedap'edaamãi ne–uu eujã k'ait'a baji. Mama baji mãu te uria ewaa k'orodap'edaa piuda ùadait'ee. Mamîda #aùde waide apida ùada–e p'anajida. 42 Jesús k'ap'ùa mama bùnajida, ma mãu te uria k'ait'a bada perã mãik'aapa judiorã âipata ewate ârù bada perã.