Jesús jita atapidap'edaa
(Mateo 26.47-56; Marcos 14.43-50; Lucas 22.47-53)
18
1 Mãgá ùt'aa t'âp'eda, Jesús chi k'õp'ãyoorã ome Cedrón to chak'e sîajida. Mama t'îujida olivo k'ãide.2 Judas, Jesús traicionaait'ee badapa k'awa baji ãra t'îudap'edaamãi, Jesús chi k'õp'ãyoorã ome mama chip'epatap'edaa perã. 3 Mapa Judapa mamaa ateeji Romadepema soldaorã chok'ara mãik'aapa Tachi Ak'õre te jâapataarã, judiorã p'aareerã poroorãpa pëidap'edaa; ichiaba fariseorãpa pëidap'edaa. Espadaa pak'uru ome, lámpara, îpirã paara anipajida. 4 Jesupa k'awa baji ichi p'asait'ee bada. Mapa mãùrã cheruta unu atak'ãri, uchiaji ma ne–uu k'ãideepa mãik'aapa iidiji:
—¿K'aita jùrù p'anùma? aji.
5 Ãchia p'anaujida:
—Jesús Nazaretdepema.
Jesupa mãgaji:
—Mùda aji.
Judas, chi traicionaait'ee bada mama bainâ baji ma chedap'edaarã ome. 6 Jesupa “mùda” ak'ãri, ãchi jõma ãpùtee jâtùjida mãik'aapa eujãde baainajida.
7 Mãpai Jesupa waya iidiji:
—¿K'aita jùrù p'anùma? aji.
Waya p'anaujida:
—Jesús Nazaretdepema.
8 Mãpai Jesupa mãgaji:
—Mùa jaraji mù Jesús Nazaretdepema. Mùta jùrù p'anù pùrã, mù ome p'anùùrã ichiak'au wãpítù.
9 Jesupa mãga jaraji p'asamerã ichia naaweda jaradak'a. “Pùa mù juade bùdaarã apida atuada–e pait'ee.”b 10 Mãpai Simón Pedropa espada iru bada êe atap'eda, t'uji mãùrãdepema aba, t'âjarapatap'edaa Malco. Mãgà k'ùùrù juaraarepema orp'et'aaji. Mãgà p'aareerã poro waibùa esclavo paji. 11 Mãpai Jesupa mãgaji Pedromaa:
—¡Pùchi espada ata bàji ichi badamãi! ¿Mùa choo–e paik'ã aji, mù Ak'õrepa miapiru?c
Jesús p'aareerã poro waibùa Anás k'îrapite bada
(Mateo 26.57-58; Marcos 14.53-54; Lucas 22.54)
12 Mãpai ma soldaorã see nâbada ãchi poro ome mãik'aapa judiorã, chi Tachi Ak'õre te jâapataarã paara, Jesús jita atadachida. Mãpai jâ nâbùjida. 13 Naapùara ateejida Anás temaa, ichi Caifás chãure pada perã. Aù naaweda Anás p'aareerã poro waibùa paji. Mamîda ma año Caifás ãchi poro waibùa paji. 14 Caifás paji chi jarada: “Piara bù eperã aba piumerã tachi judiorã p'uuru pidaarã pari.”d
Pedropa naapùara Jesús k'awa–e bùda ada
(Mateo 26.69-70; Marcos 14.66-68; Lucas 22.55-57)
15 Jesús jita atadak'ãri, Simón Pedro awaraa k'õp'ãyo ome ãra t'êe wãjida. P'aareerã poro waibùapa mãgà k'õp'ãyo k'awa bada perã, t'îupiji ma te t'ùak'au badamãi Jesús ome. 16 Mamîda Pedro taawa bainâ beeji puerta t'aide. Mapa chi apema k'õp'ãyoe Caifás k'awa badapa pedeenaji awêra puerta jâapari ome Pedro ichiaba t'îupimerã. Mãgá Pedro ichiaba t'îuji. 17 Ma puerta jâaparipa Pedromaa iidiji:
—¿Pù jã eperã k'õp'ãyo–ek'ã? aji.
Mãpai Pedropa p'anauji:
—Mù–eda aji.
18 Jîsua nâbada perã, p'aareerã poro waibùa mimiapataarãpa mãik'aapa te jâapataarãpa t'ùpù orojida mãik'aapa k'ara p'aimaa p'aneejida. Bainâ p'anùde t'ùpùtau ik'aawa, Pedro ichiaba ãchi ome k'ara p'aimaa beeji.
P'aareerã poro waibùapa Jesumaa iidida
(Mateo 26.59-66; Marcos 14.55-65; Lucas 22.66-71)
19 Mãùmisa p'aareerã poro waibùapa Jesumaa iidiji:
—¿K'áirãma aji, pù k'õp'ãyoorã? Pùa, ¿k'ãata jarateeparima? aji.
20 Jesupa p'anauji:
—Mù jîp'a pedeeparida aji, jõmaarã taide Tachi Ak'õre tede mãik'aapa Tachi Ak'õre Ûraa jarateepata te beede. Judiorã chepatamãi mùa jarateepari. Maarepida chîara ãpùte pedee–e bù. 21 ¿Sãap'eda mùmaa mãga iidi bùma? aji. Mù pedee ûridap'edaarãmaa iidináji. Ãrapa jaradaipù, k'awa p'anadairã mùa jarapari.
22 Jesupa mãga jarak'ãri, te jâaparipa iru k'îramaa sîji mãik'aapa mãgaji:
—¿Jãgata p'anauparik'ã aji, p'aareerã poro waibùamaa?
23 Jesupa mãgaji:
—Mùa pedee k'achia jaraji pùrã, jarapáde aji, k'ãare pedeeta k'achia baji. Mamîda mùa jarada wãara pùrã, ¿sãap'eda mù sîjima? aji.
24 Mãpai Anapa Jesús jua jâp'eda, Caifamaa pëiji. Maapai Caifás p'aareerã poro waibùa paji.
Pedropa waya Jesús k'awa–e bùda ada
(Mateo 26.71-75; Marcos 14.69-72; Lucas 22.58-62)
25 Mãùmisa taawa Simón Pedro bainâ baji t'ùpùtau ik'aawa k'ara p'aimaa. Arii p'anadap'edaarãpa iidijida:
—¿Pù jã eperã k'õp'ãyo–ek'ã? ajida.
Pedropa meraji:
—¡Mù iru k'õp'ãyo–eda! aji.
26 Mamîda awaraa eperãpa Pedro k'îra k'awa ataji. Mãgà p'aareerã poro waibùa mimiapari paji. Ëreerã paji Pedropa k'ùùrù orp'et'aada ome. Mãgùpa mãgaji:
—¿Pù–ek'ã mùa ne–uu k'ãide Jesús ome unuda?
27 Mãpai Pedropa waya meraji. Aramata et'erre k'ariji.
Jesús Pilato k'îrapite
(Mateo 27.1-2, 11-14; Marcos 15.1-5; Lucas 23.1-5)
28 Tap'edaweda judiorã poro waibùarãpa Jesús ateejida Caifás tedeepa Pilato palaciodee. Pascua fiesta ârù pada perã, aù tede t'îuda–e paji. K'awa p'anajida judio–eerã tede t'îudap'edaa paara, Pascua chik'o p'oyaa k'oda–e pak'aji. Mãga k'awajida ãchi ûraade jara bairã. 29 Maperã Pilato uchiaji pedeede ãchi ome:
—¿K'ãare k'aurépata na eperã nãgá iru p'anùma? aji.
30 P'anaujida:
—Na eperã t'ãri k'achia–idaa–e bada paara, pùmaa aneeda–e pak'ajida ajida.
31 Mãpai Pilatopa mãgaji:
—Mãgara pãchia atadarítù mãik'aapa iru ak'àtù pãchi ûraade jara bùk'a. Maap'eda óotù pãchia oo k'iniata.
Mamîda ma judiorãpa p'anaujida:
—Pãchi Romadepemaarã ûraade jara bù tai judiorãpa chîara peedaik'araa bù irua ne–inaa k'achia ooda k'aurepa.
32 Mãga jarajida uchiamerã Jesupa aù naaweda jaradak'a, irua jarak'ãri sãga ichi piuit'ee. 33 Pilato waya ichi palaciode t'îup'eda, Jesús t'â ataji mãik'aapa iidiji:
—¿Pùk'ã aji, Judiorã Rey?
34 Jesupa mãgaji:
—¿Pùchi k'îradoopapai mãga iidi bùk'ã, maa–e pùrã awaraarãpa pùmaa mãga jaradap'edaa perã?
35 Pilatopa p'anauji:
—¡Mù judio–epù! Pùchi auk'aaråpata mãik'aapa p'aareerã porooråpata pù mùmaa aneejida. ¿Pùa k'ãata oojima? aji.
36 Jesupa p'anauji:
—Mù rey–eda aji, na p'ek'au eujãdepema reyrãk'a. Ãchik'a pada paara, mù ome nipapataarã chõok'ajida, judiorã poro waibùarãpa mù jitapinaadamerã. Mamîda mù rey–e na p'ek'au eujãdepema reyrãk'a.
37 Mãpai Pilatopa iidiji:
—¿Wãara pù reyk'ã? aji.
Jesupa p'anauji:
—Pùchia jarajipù. Mù reypù. Ma–it'ee mù t'oji mãik'aapa cheji na p'ek'au eujãdee; Tachi Ak'õre wãarata jarait'ee. Wãarata k'awa k'inia p'anùùrã jõmaarãpa mù pedee ûripatada aji.
38 Mãpai Pilatopa mãgaji:
—¿K'aipa wãarata k'awayama? aji.
Jesús pëida peedamerã
(Mateo 27.15-31; Marcos 15.6-20; Lucas 23.13-25)
Mãga jarap'eda, Pilato taawaa uchiaji waya pedeede ma judiorã poro waibùarã ome:
—Mùa maarepida k'achia unu–eda aji, na eperãde. 39 Mamîda k'irãpátù año chaa Pascua fiestade mùa preso aba k'ena pëipari. Mapa ¿k'inia p'anùk'ã aji, mùa Judiorã Rey apata k'ena pëimerã?
40 Mãpai arii p'anadap'edaarã jõmaweda waya biajida:
—¡Jãgà k'ena pëináaji! ¡Barrabata k'ena pïiji!
Barrabás nechùayaa bapachi mãik'aapa chõoyaa bapachi Romadepemaarã ome, ãchi jua ek'ariipa uchia k'inia bada perã.