Jesús ichi pari ùt'aa t'âda
17
1 Ma pedee jarap'eda, Jesupa ùt'aa ak'ùji mãik'aapa mãgaji:—Ak'õre, mù ewari pajida aji. Ak'ùpíji mù wãara pùchi Warra, mãgá mùa ak'ùpimerã pù wãara jõmaarã k'ãyaara waibùara bù. 2 Pùa eperãarã jõmaweda bùji mù jua ek'ari, chi mùde ijãa p'anùùrã jõmaweda ichita p'anapataadamerã pù ome. 3 Mãgá @pù ome ichita p'anapataadait'ee, k'awaadak'ãri pù aupaita wãara Tachi Ak'õre mãik'aapa k'awaadak'ãri mù, Jesucristo, pùchia pëida eperãarã k'aripamerã.
4 +Na p'ek'au eujãde bù misa, mùa ak'ùpiji pù aupaita Tachi Ak'õre, ook'ãri pùa mùmaa oopidak'a. 5 Ârá Ak'õre, ak'ùpíji mù wãara pùchi Warra. Mù atéeji pùmaa bapariit'ee pùchi k'îra wãreede, na p'ek'au eujã bai naaweda badak'a.
Jesús ùt'aa t'âda chi k'õp'ãyoorã pari
6 —Mùa pù k'îra unupipachi mù ome nipapatap'edaarãmaa, ma–it'ee pùa ãra jùrùt'era atada perã na p'ek'au eujãdepemaarã t'ãideepa. Përé paji mãik'aapa pùa mùchideerã papiji. Pù ûraade ijãa p'anùpù. 7 Ârá ãrapa k'awa p'anù ne–inaa jõmaweda mùa k'awa bù pùata mùmaa k'awapida. 8 Mùa jõma jarateeji pùa jarapidak'a. Ãrapa ma pedee ijãajida, ijãa p'anadap'edaa perã wãara pùata mù pëida.
9 +Mùa chupùria iidimaa bù ãra pari. Na p'ek'au eujãdepemaarã jîp'aarã pari chupùria iidi–e bù. Pùa jùrùt'eradaarã mùde ijãadamerã, mãùrã párita chupùria iidimaa bù, ãra pùchideerã perã. 10 Mùchideerã pùchideerã auk'a. Ichiaba pùchideerã mùchideerã auk'a. Ãrapa ne–inaa oodak'ãri mùa oopi bùk'a, ak'ùpipata mù waibùara bù apemaarã k'ãyaara.
11 +Mù na p'ek'au eujãde waa ba–e pait'ee. Mamîda ãra p'aneedait'ee, mù pù ome banaru misa. Mapa Ak'õre, pù jõmaarã k'ãyaara t'ãri piara bairã, ãra ak'ù baparíiji pùchi juapa pùa mùmaa teeda juapa, ãra t'ãri a–ba, chik'inia p'anapataadamerã, pù mù ome baparik'a. 12 Mù na p'ek'au eujãde ãra ome bak'ãri, ãra ak'ù bapachi pù k'ap'ùa pari, apida atuanaadamerã. Aba chi atuait'ee bùta atuait'ee, p'asamerã pù ûraa chonaarãweda p'ãdade jaradak'a.
13 +Ârá mù wãit'ee pùmaa. Na p'ek'au eujãde bùde mùa nãgà pedee jara bù, ãrapa o–îa ûridamerã mãik'aapa t'ãri o–îadaidamerã, mù t'ãri o–îa bùk'a. 14 Mùa ãramaa pù ûraa jarateeji. Mùde ijãadak'ãri, na p'ek'au eujãdepema ijãadak'aa beerãpa ãra k'îra unuamaa iru p'aneejida, mùk'a mãùrã eere p'anù–e perã. 15 Mùa iidi–e bù pùa ãra na p'ek'au eujãdeepa uchia atamerã. Ma k'ãyaara iidi bù ãra @chi k'achia ooyaa @bù juadeepa k'aripa atamerã. 16 Mù mãgà jua ek'ari bak'aak'a, ãra jida mãgà jua ek'ari p'anada–e, iru eere p'anù–e perã. 17 Mapa ãra awara bàji pù wãarata bùde t'ãri pia p'anapataadamerã pù baparik'a. Mãga p'anapataadai pù ûraa k'awaadak'ãri, wãara bairã. 18 Pùa mù na p'ek'au eujãdee pëidak'a, mãgá ichiaba mùa ãra na p'ek'au eujãdepemaarãmaa pëiji. 19 Ãra k'aurepa mùa ne–inaa jõma oopari pùa oopi bùk'a, mùchi k'ap'ùa piuru pùjida mãga oo k'iniapa. Mùa mãga oopari ãrapa pida auk'a wãara ne–inaa jõma pùa oopi bùk'a oopataadamerã.
Jesús ùt'aa t'âda ichideerã jõmaarã pari
20 —Ãra–it'ee aupai mùa iidi–e bùda aji. Ichiaba iidimaa bù jõmaarã eperãarã pari, chi t'êepai mùde ijãadait'eerã ãrapa jarateepata k'aurepa. 21 Ak'õre, mùa iidi bù mãgà ijãapataarã ichiaba t'ãri a–ba, chik'inia p'anapataadamerã, pù mù ome t'ãri a–ba, chik'inia baparik'a. Mãgá p'anapataadak'ãri, jõmaarãpa ijãadait'ee wãara pùa mù pëiji na p'ek'au eujãdee. 22 Pùa mùmaa pia oodak'a mùa ichiaba ãramaa pia ooji, t'ãri a–ba p'anapataadamerã, pù mù ome t'ãri a–ba baparik'a. 23 Mù t'ãri a–ba bapari ãra ome, pù mù ome baparik'a, ãra mãgá t'ãri a–ba p'anapataadamerã ãchi k'õp'ãyoorã ome. Mãgapù na p'ek'au eujãdepemaarãpa k'awaadait'ee wãara pùa mù pëiji mãik'aapa pùa ãra auk'a k'inia iru bapari, mù k'inia iru baparik'a.
24 +Ak'õre, pùa ãra jùrùt'eraji mùde ijãapataadamerã. Mùa k'inia bù ãra p'ananadamerã mù ome, mù wãrumaa. Mãgá jõma mù k'îra wãree unudait'ee, pùa mùmaa teeda mù k'inia iru bapachi perã na p'ek'au eujã bai naaweda. 25 Ak'õre, pù jõmaarã k'ãyaara t'ãri piara bù. Na p'ek'au eujãdepemaarãpa pù k'awada–e p'anù mîda, mùa pù k'awa bù mãik'aapa nãgùùrãpa pida k'awa p'anù pùa mù pëida. 26 Mùa pù ãramaa k'awapiji mãik'aapa at'ãri k'awapiit'ee, mù ãra t'ãride bapariit'ee perã. Mãgá pùa mù k'inia iru baparik'a, ãra jida ichiaba k'inia iru bapariit'eeda aji, ãrapa jõdee awaraarã k'inia iru p'anapataadamerã.