16
1 +Mùa ma jõma jaraji parãpa mùde ijãapataadamerã. 2 Tachi Ak'õre Ûraa jarateepata tedeepa parã jëret'aapataadait'eeda aji. Ma awara parã peet'aadait'eeda aji. Mãga oodak'ãri, ãchia k'îsiadait'ee mãgata pia oomaa p'anù Tachi Ak'õre–it'ee. 3 Mãga oodait'ee mù, mù Ak'õre ome wãara k'awada–e p'anadairã. 4 Mapa ma jõma jaraji parãmaa, mãga p'asak'ãri, k'irãpadamerã. Naaweda mãga jara–e paji, parã ome bada perã.Tachi Ak'õre Jaurepa oo bù
5 —Ârá mù wãit'ee mù pëida baparimaa. Mamîda parãdepema apidaapa iidida–e p'anù mù sãmaa wãit'ee. 6 Ma k'ãyaara parã k'îra pia–ee p'anù, mùa mãga jarada perã. 7 Mùa wãarata jararu. Parã–it'ee piara bù mù wãmerã. Mù wã–e pùrã, Ak'õre Jaure, Tachi K'aripapari, che–e pait'ee parã ome bapariit'ee. Mamîda mù wãru pùrã, mùa iru pëiit'ee parãmaa. 8 Iru chek'ãri, na p'ek'au eujãdepemaarãmaa k'awapiit'ee ãchia p'ek'au k'achia oopata. Ichiaba ãchimaa k'awapiit'ee Tachi Ak'õredeerãpa ne–inaa pia oopata irua k'inia bùk'a. Ma awara k'awapiit'ee Tachi Ak'õre ewari waibùa ewate ichia ak'ùit'ee eperãarãpa oopata jarait'ee pia wa k'achia. 9 K'awapiit'ee eperãarãpa mùde ijãada–e p'anadak'ãri, k'achia oomaa p'anù. 10 K'awapiit'ee mùa oopachi Tachi Ak'õrepa k'inia bùk'a, mù irumaa wãru perã. Mãga ook'ãri, parãpa mù waa unuda–e pait'ee. 11 K'awapiit'ee Tachi Ak'õrepa pia ak'ù–e na p'ek'au eujãdepemaarã poro waibùapa oo bù. Mapa iru, iru eere p'anùùrã ome miapiit'ee.
12 +Mùa k'îsia chok'ara iru bùda aji, parãmaa jarait'ee. Mamîda ârá waa jara–e, parãpa ma jõma k'irãpada–e pai perã. 13 Mamîda Ak'õre Jaure chek'ãri, ne–inaa wãarata jõma k'awapiit'ee parãmaa, ichia wãara aupaita jarapari perã. Ichi k'îsiadoopa pedee–e pait'ee. Tachi Ak'õrepa jara bù ûrip'eda, mãga jarapariit'ee mãik'aapa jarapariit'ee ne–inaa waide p'asa–e bù. 14 Ak'ùpiit'ee mù apemaarã k'ãyaara waibùara bù, mùa ne–inaa k'awa bù parãmaa k'awapik'ãri. 15 Jõma mù Ak'õrepa k'awa bù mùa pida k'awa bù. Maperãpù mùa jaraji Ak'õre Jaurepa k'awapiit'ee jõma mùa ne–inaa k'awapi k'inia bù parãmaa.
16 +Na ewari mù waa unuda–e pait'ee. Mamîda aù t'êepai taarãpai waya unudait'eeda aji.
K'îra pia–ee p'anadap'eda, t'ãri o–îa p'aneedait'ee
17 Mãga ûridak'ãri, chi k'õp'ãyoorã ûk'uru ãchi pitapai pedee para beeji:
—¿K'ãata jara k'inia bùma, ajida, na pedee: “Na ewari mù unuda–e pait'ee, mamîda aù t'êepai waya unudait'ee”? ¿Ichiaba k'ãata jara k'inia bùma nãgà pedee: “mù Ak'õremaa wãru perã”? 18 ¿K'ãata jara k'inia bùma na pedee: “taarãpai”? K'awada–e p'anùda ajida, irua k'ãata jara k'inia bù.
19 Jesupa k'awaji chi k'õp'ãyoorãpa k'ãata iidi k'inia p'anù. Mapa mãgaji:
—Mùa jarajida aji, na ewari parumaa mù waa unuda–e pait'ee, mamîda aù t'êepai waya unudait'ee. ¿Mata parãpa iidi para bù–ek'ã? aji. 20 Mùa wãarata jararu. Parã jarajêedait'ee mãik'aapa t'ãri p'ua p'aneedait'ee. Jõdee na p'ek'au eujãdepema ijãadak'aa beerã o–îa p'aneedait'ee. Mamîda parã k'îra pia–ee p'anadap'eda, o–îa p'aneedait'eeda aji. 21 K'îsiadáma nãgùde. Wêra warra t'oit'ee pak'ãri, p'ua nâbeepari, t'oit'ee perã. Mamîda chi warra t'o atak'ãri, k'îra atuadaipari p'ua nâbada mãik'aapa o–îa nâbeepari warra chai t'o atada perã. 22 Mãga pùk'a bù parã ome. Ârá parã k'îra pia–ee p'anù mù wãru perã. Mamîda mùa parã waya unuit'ee. Maapai parã t'ãri o–îa p'aneedak'ãri, apidaapa ma o–îa wêpapida–e pait'ee.
23 +Maapai parãpa mùmaa maarepida iidida–e pait'ee. Mùa wãarata jararu. Mù t'âde mù Ak'õremaa ne–inaa iidiruta pùrã, irua parãpa iidi p'anù teepariit'ee, mùchideerã perã. 24 Waide mù t'âde parãpa maarepida ùt'aa iidida–e p'anù. Iidítù mù Ak'õrepa teemerã parãpa iidi p'anù. Mãgá parã wãara t'ãri o–îa p'anapataadait'ee.
25 +Ma et'ewa jarada mùa imeraa pùk'a jarateeji. Mapa parãpa pia k'awada–e paji. Mamîda na ewari mãgá jaratee–e pait'eeda aji. Jîp'a pedeeit'ee Ak'õre net'aa pia k'awaadamerã. 26 Maapai parãpa mù t'âde ùt'aa iididait'ee, mùchideerã perã. Mapa mùa jara–e chupùria iidiit'ee parã pari Tachi Ak'õremaa. 27 Ak'õrépata parã k'inia iru bapari parãpa mù k'inia iru p'anapata perã mãik'aapa ijãapata perã mù wãara cheji iru baparimãiipa. 28 Cheji na p'ek'au eujãdee eperã jîp'aak'a bapariit'ee. Ârá jõdee na p'ek'au eujã atabëiit'eeda aji, mãik'aapa waya irumaa wãit'ee.
29 Mãpai chi k'õp'ãyoorãpa mãgajida:
—Ârapù jîp'a pedee bùda ajida. Imeraa pùk'a jaratee–e bùda ajida. 30 Ârapù k'awa p'anù pùa ne–inaa jõmaata k'awa bù. Apidaapa pùmaa iidida–e pait'ee, taipa iididai naaweda, pùa k'awa bairã taipa iidi k'inia p'anù. Mapa ijãa p'anùda ajida, pù wãara cheji Tachi Ak'õre baparimãiipa.
31 Jesupa p'anauji:
—¿Mãgara ârá wãara ijãa p'anùk'ã? aji. 32 Ewari k'ait'a pa wã, parã jîchoodait'ee pãchi te chaa mãik'aapa mù ituaba atabëidait'ee. Mamîda wãara mù ituaba bù–eda aji, mù Ak'õre mù ome bairã. 33 Ma jõma jaraji parã t'ãridepai choodamerã mùde ijãa p'anùde mãik'aapa parã k'ãiwee p'anapataadamerã. Na p'ek'au eujãde p'anù misa, nepùrade baaidait'ee parã jùrùdait'ee perã. Mamîda sõcharra p'anapatáatù. Mùata na p'ek'au eujãdepema ijãadak'aa beerã ãchi poro waibùa ome p'oyaajida aji.