Jesús uva k'arrak'a bù
15
1 Uchiadai naaweda, Jesupa mãgaji:—Mù uva k'arrak'a pipùara bùda aji. Jõdee mù Ak'õre chi uva uuda ak'ùparik'a bù. 2 Mù k'arradepema jâk'ara chau–e bù pùrã, irua mãgà jâk'ara t'ùap'et'aapari. Jõdee chi jâk'ara chauparidepema jua chak'eerã jarit'aapari mãgà jâk'ara waapùara chaumerã. 3 Parã mãgà jâk'ara jaridák'ata p'anù mùa ûraa jarada ijãadap'edaa perã. 4 Mù ome araa p'anapatáatù mù parã ome araa baparik'a. Uva jâk'ara ichi itu chauk'aa chi k'arra ome araa ba–e pùrã. Mãga pùk'a pãchi k'îradoopa mùa oopi bùk'a p'oyaa ooda–e, mù ome araa p'anapataada–e pùrã.
5 +Mùda aji, uva k'arrak'a bù. Jõdee parã chi jâk'arák'ata p'anù. Uva jâk'ara pia chauparik'a araa bak'ãri chi k'arra ome, mãga pùk'a parã mù ome araa p'anapataadak'ãri, ne–inaa chok'ara mùa oopi bùk'a oopataadait'ee. Mamîda mù wêe parãpa maarepida ooda–e pai mùa oopi bùk'a. 6 Uva jâk'ara chauk'aa bak'ãri, t'ùap'ek'oodap'eda, p'e nâbùpata ak'õrejîrumaa p'ook'oodaimerã. Maap'eda t'ùpùtaude bat'ak'oopata paak'oodaimerã. Mãga pùk'a pait'ee chi mù wêe beerã ome.
7 +Mamîda parã araa p'anaruta pùrã mù ome mãik'aapa mù ûraade jara bùk'a ooruta pùrã, ùt'aa iidipatáatù pãchia iidi k'iniata. Mù Ak'õrepa ooit'ee parãpa iidi p'anùk'a. 8 Parãpa ne–inaa chok'ara mùa oopi bùk'a oodak'ãri, ak'ùpipata wãara mù k'õp'ãyoorã. Mãga unudak'ãri, awaraarãpa “Tachi Ak'õre jõmaarã k'ãyaara waibùara bùda” adait'ee. 9 Mù Ak'õrepa mù k'inia iru baparik'a, mùa auk'a parã k'inia iru bapari. Mù ome chik'inia p'anapatáatù. 10 Mù, mù Ak'õre ome chik'inia bapari, mùa oopari perã irua jara bùk'a. Mãgá parã mù ome chik'inia p'anapataadait'ee, mùa jara bùk'a ooruta pùrã.
11 +Mùa mãga jaraji mùk'a parã t'ãri o–îa p'anapataadamerã. K'inia bù parã t'ãri o–îa p'anapataadamerã. 12 Mùa nãga jara bù: Chik'inia p'anapatáatù, mùa parã k'inia iru baparik'a. 13 Eperãpa chi k'õp'ãyo audú k'inia iru bak'ãri, iru k'aripapari ma k'aurepa piuru pùjida. Ma k'ãyaara apidaapa awaraa eperã audupùara k'inia iru p'anada–e pai. 14 Parã wãara mù k'õp'ãyoorã@, mù ûraade jara bùk'a ooruta pùrã. 15 Waa mùa parã t'âjara–e “mimiapataarã”, mimiaparipa k'awa–e bairã ne–inaa jõmaweda chi poropa oo bù. Ma k'ãyaara t'âjara bù “mùchi k'õp'ãyoorã” mùa k'awapida perã jõmaweda mù Ak'õrepa mùmaa jarada. 16 Parãpa mù jùrùt'erada–e paji. Mùata parã jùrùt'eraji mãik'aapa awara bùji mù ûraa jarateenadamerã. Mãgá parã k'aurepa eperãarãpa ma ûraa ûridap'eda, mùde ijãadai mãik'aapa ichita p'anapataadai mù ome. Ma awara ma jarateenadap'edaa k'aurepa parãpa mù t'âde ne–inaa iididak'ãri mù Ak'õremaa mùchideerã perã, irua ooit'ee parãpa iidi p'anùk'a. 17 Waya mùa jara bù: chik'inia p'anapatáatù.
Ijãadak'aa beerãpa Jesús ichideerã ome<R>k'îra unuamaa iru p'anapata
18 —Mùde ijãadak'aa beerãpa parã k'îra unuamaa iru p'anù pùrã, k'irãpátù mùta naapùara k'îra unuamaa iru p'anapachida. 19 Parã p'anadap'edaa paara ãchi p'anapatak'a, ãchia parã k'inia iru p'anak'ajida ãchideerãk'a. Mamîda parã ãchideerã–e. Mùata parã jùrùt'eraji ãchi k'ãyaara awara p'anapataadamerã. Maperãpù ãchia parã k'îra unuamaa iru p'anapata. 20 K'irãpátù mùa jarada: “Mimiapari ichi poro waibùa k'ãyaara waibùara bù–e.” Mù jùrù nipapatap'edaak'a ichiaba parã jùrù nipapataadait'ee. Jõdee mùa jarateeda ijãajida pùrã, parãpa jaratee p'anù ichiaba ijãadait'ee. 21 Mamîda ma k'ãyaara audupùara parã jùrù nipapataadait'ee, mùchideerã perã. Mãga oodait'ee k'awada–e p'anadairã k'áipata mù pëiji.
22 +Mùa Ak'õre net'aa jara che–e pada paara, ãrapa k'îsiada–e p'anak'ajida ãchia p'ek'au k'achia oopata. Mamîda mù Ak'õrepa jara pëida jara cheji. Mapa ârá “taipa k'awada–e p'anùda” adaik'araa bù. 23 Mù k'îra unuamaa iru p'anùùrãpa mù Ak'õre jida k'îra unuamaa iru p'anù. 24 Unuda–e pada paara mùa ne–inaa ooda awaraarãpa p'oyaa oodak'aa, ãchia p'ek'au k'achia ooda–e pak'aji Tachi Ak'õre k'îrapite. Mamîda ãchia mãga unujida mîda, at'ãri mù, mù Ak'õre ome k'îra unuamaa iru p'anù. 25 P'asaji ãchi ley p'ãdade jara bùk'a:
‘Ãchi k'inia mù k'îra unuamaa iru p'anapachida.’ (Salmos 35.19)