SAN LUCAS
San Lucapa Pedee Pia P'ãda
San Lucapa na pedee pia p'ãji. Lucas judio–e paji. Macedonia eujãdepema médico paji. Jesucristopa jùrùt'erada Pablo k'õp'ãyo paji. Na pedee pia p'ã pëiji chi k'õp'ãyo Teofilomaa, auk'a Jesucristode ijãamerã. K'awapi k'inia baji Jesupa judio–eerã o k'achiadeepa ichiaba k'aripa atapari. Na pedee p'ãi naaweda, Lucapa pi–ia ak'ùji ne–inaa jõmaweda p'ã bada Jesudé. Pedeepachi Jesús bapata k'awadap'edaarã ome, Jesús nipapata pia nepùrù k'inia bada perã. Na p'ãdade audú jara bù chupùria beerãdé; ùt'aa t'âpatadé; Tachi Ak'õre Jauredé; Cristo piuda k'aurepa Ak'õrepa eperãarãpa p'ek'au k'achia oopata wêpapiparidé mãik'aapa wêraarã mimiadé Tachi Ak'õre–it'ee.
Naapùara Lucapa jara bù ichia k'awaada na pedee pia p'ãi naaweda (cap. 1.1-4). Mateopa p'ãda k'ãyaara pedee chok'araara jara bù Jesús t'odade (caps. 1.5--2.52) mãik'aapa Juan Bautistapa jarateedade (cap. 3.1-20). Awaraarãk'a Lucapa jara bù Jesús poro choodade mãik'aapa iru netuara ome unuda (caps. 3.21--4.13); irua jaratee nipada Galilea eujãde (caps. 4.14--9.9) mãik'aapa awaraa eujãde (cap. 9.10-50); iru Judea eujãdee wãda (caps. 9.51--13.21) mãik'aapa irua jarateeda Perea eujãde (caps. 13.22--19.27). Ma jõmaade Lucapa pedee chok'araara jara bù, awaraa pedee pia p'ãdap'edaarã k'ãyaara. T'êepai jara bù Jesús peedap'edaa (caps. 19.28--23.56); iru chok'ai p'irabaida; chi k'õp'ãyoorãmaa unupida mãik'aapa ãra taide ùt'aa wãda (cap. 24).