Jesús chok'ai p'irabaida
(Mateo 28.1-10; Lucas 24.1-12; Juan 20.1-10)
16
1 Âipata ewate wãyaap'eda, p'ãrik'ua María Magdalena, María (Santiago nawe) mãik'aapa Salomepa neto atajida k'era Jesús k'ap'ùade p'urudait'ee. 2 Tomia ewate,a tap'edaweda ak'õrejîru uchiaruta wãjida iru k'ap'ùa ùadap'edaamaa. 3 Pedee wãjida:—¿K'aipa ãyaa ata bùyama ajida, mãu choma chi t'aide jâa bù?
4 Mamîda t'ùmùweda ak'ùnadak'ãri, unujida mãu pùradai bù awara ãi. 5 Mãu te uriade edú t'îudak'ãri, ununajida k'ûtrãa su–ak'ù bù ãchi juaraare. Chi p'aru jâ bada t'o–t'oo teesoo baji. Mãgà ángel Tachi Ak'õre truadepema paji. Ma wêraarãpa mãga unudak'ãri, p'eradachida. 6 Mamîda mãgùpa mãgaji:
—P'eranáatù. Parãpa jùrù p'anù Jesús Nazaretdepema kurusode baijira bùdap'edaa. ¡Iru nama wê–e! ¡Chok'ai p'irabaijipù! Pùchá, ak'ù chétù iru ùadap'edaamãi. 7 Wåtù jarade Pedromaa ichiaba chi apemaarã k'õp'ãyoorãmaa: “Iru wãit'ee Galilea eujãdee parã naa. Mama iru unudait'ee irua jaradak'a.”
8 Mãpai wêraarã k'îra k'awa–ee pùk'adachida p'era jõnadap'edaa perã. P'ira uchiajida Jesús k'ap'ùa ùadap'edaamãiipa. K'ap'ùa wëree jõnajida waaweepa. Mapa maarepida p'oyaa jarada–e paji.
Jesupa María Magdalenamaa chok'ai unupida
(Juan 20.11-18)
9 [Tomia ewate Jesús chok'ai p'irabaiji. Naapùara unupiji María Magdalenamaa. Ma wêra naaweda netuara siete merãtùa baji ichi k'ap'ùade. Mamîda Jesupa jõmaweda ãyaa uchiapik'ooji. 10 Jesús unup'eda, María Magdalenapa jaranaji iru ome nipapatap'edaarãmaa. Ãra k'îsia paraa jarajêe p'anajida Jesús k'ap'ùa–it'ee. 11 Mãga nùde Mariapa jara cheji:
—¡Mùa Jesús chok'ai unujida! aji.
Mamîda ãrapa mãga ûridak'ãri, ijãada–e paji.
Jesupa awaraa k'õp'ãyoorã omeemaa chok'ai unupida
(Lucas 24.13-35)
12 T'êepai, Jesupa k'îra awara unupiji chi k'õp'ãyoorã omeemaa ode nidade. 13 Ãchia iru k'awa atadak'ãri, aramata ãpùtee nepùrùde wãjida apemaarãmaa. Mamîda ãrapa pida ijãada–e paji.
Jesupa chi k'õp'ãyoorãmaa chok'ai unupida
(Mateo 18.16-20; Lucas 24.36-49; Juan 20.19-23)
14 T'êepai, Jesupa chok'ai unupiji chi k'õp'ãyoorã oncemaa, nek'omaa p'anùde. Iru chok'ai bù pia ijãadak'aa paji k'ùùrù k'isua p'anadap'edaa perã. Ma awara apemaarãpa mãga nepùrùdap'edaa jida ijãada–e paji. Mapa irua ik'âatù pedeeji. 15 Ichiaba jaraji ãramaa:
—Wåtù na p'ek'au eujã eperãarã paraamaa mãik'aapa jaratéetù Tachi Ak'õre pedee pia mùa k'awapida parãmaa. 16 Apidaapa ma ûraa chiwidide ijãa bù pùrã, poro choopiipia bù k'awapiit'ee mù ome araa bù. Mãgá ùt'aa wãit'ee ichi piuk'ãri. Jõdee mùde ijãa–e pùrã, tok'arradee mianait'ee ichia p'ek'au k'achia ooda k'aurepa. 17 Mùde ijãa p'anùùrãpa oodak'ãri ne–inaa eperãarãpa p'oyaa oodak'aa, awaraarãpa k'awaadait'ee Tachi Ak'õre ãchi ome bù. Mù t'âde netuara uchiapidait'ee; awaraa pedee k'awada–e p'anù mîda, Ak'õre Jaurepa pedeepiit'ee; 18 taama k'achia jitadait'ee ãchi juapa; mãik'aapa neera k'achia todait'ee. Mamîda mãgee ne–inaapa ãchi maarepida k'achia ooda–e pait'ee. Jõdee ãchi juapa k'ayaa beerã t'õbaidak'ãri, k'ayaa jùpadait'ee.
Jesús Tachi Ak'õre eujãdee wãda
(Lucas 24.50-53)
19 Tachi Waibùa Jesús pedeep'eda chi k'õp'ãyoorã ome, Tachi Ak'õrepa iru ùt'aa ateeji ichi eujãdee. Mama su–ak'ù beeji Ak'õre juaraare, ijãapataarã poro waibùa perã. 20 Mãpai chi k'õp'ãyoorãpa Ak'õre Ûraa chiwidi o–îa jarateenajida awara ãi eperãarã paraamaa. Jesupa ne–inaa pia oopachi ãchi k'ap'ùa pari. Mãgá ãchia ne–inaa eperãarãpa oodak'aa oodak'ãri, awaraarãpa k'awaajida Jesús ûraa wãara.]