SAN MATEO
San Mateopa Pedee Pia P'ãda
San Mateopa na pedee pia p'ãji. Ichiaba t'âjarapachida Leví. Judío paji. Jesucristo ome nipapachi. Na pedee pia p'ãdade Mateopa jara bù Jesús Tachi Ak'õrepa pëida eperãarã o k'achiadeepa k'aripa atamerã Tachi Ak'õrepa jaradak'a judiorã chonaarãmaa Antiguo Testamento apatade. Audú jara bù Jesupa jarateepatade. Irua eperãarãmaa ûraapachi; chi k'õp'ãyoorãmaa jarateepachi; nepùrùpachi ne–inaa jarateeit'ee mãik'aapa jarapachi sãga p'anapataadaipia bù Tachi Ak'õre jua ek'ari p'anapataarã.
Naapùara Mateopa jara bù Jesús chonaarãwedapema judiorã ëreerãdeepa uchiada; iru t'oda mãik'aapa treinta año wãyaap'eda, Juan Bautistapa irudé jarateeda (caps. 1.1--3.12). Jara bù Juanpa Jesús poro chooda; Jesús unuda netuara ome eujã pania wêe bùde mãik'aapa Jesús ewaa jaratee beek'ãri (caps. 3.13--4.25). Jara bù Jesupa jarateepata Galilea eujãde: ûraa jarateeda ee bide nipak'ãri (caps. 5--7); ne–inaa ooda eperãarãpa p'oyaa oodak'aa ãchi juadoopa (caps. 8--9); ichi k'õp'ãyoorã doce jùrùt'erada (cap. 10); awaraa ûraa jarateeda Galileade (caps. 11--12); awaraa nepùrùda jarateeit'ee (cap. 13) mãik'aapa Rey Herodepa ooda Jesupa jarateepatade ûrik'ãri (cap. 14.1-12). Jara bù Jesús nipapata awaraa eujãde (caps. 14.13--17.20); ichia t'êe ooda Galilea eujãde (caps. 17.21--18.35) mãik'aapa wãda Jerusalendee (caps. 19--20); ichia mama ooda mãik'aapa jarateeda (caps. 21.1--26.13). Jara bù iru jita atadap'eda, ateedap'edaa judiorã poroorã k'îrapite mãik'aapa iru peet'aadap'edaa (caps. 26.14--27.66). T'êepai jara bù iru chok'ai p'irabaida mãik'aapa pedee t'êe jarada ijãapataarãpa iru ûraa jarateenadamerã na p'ek'au eujã jõmaade (cap. 28).