SAN MATEO
San Mateopa Pedee Pia P'ãda
Jesucristo ëreerã t'â p'ãda
(Lucas 3.23-38)
1
1 Jesucristo uchiaji chonaarãwedapema Rey Daviddeepa mãik'aapa Abrahamdeepa. Chonaarãwedapemaarãpa iru ëreerã t'â p'ãjida ichi t'êepemaarãpa k'awaadamerã k'airãdeepa uchiaji.2 Abraham Isaac ak'õre paji. Isaac Jacob ak'õre paji. Jacob Judá ak'õre paji mãik'aapa Judá âpemaarãde ichiaba.
3 Judá Fares mãik'aapa Zera ak'õre paji. Ãchi nawe Tamar paji. Fares Jezrón ak'õre paji. Jezrón Aram ak'õre paji.
4 Aram Aminadab ak'õre paji. Aminadab Hajásón ak'õre paji. Hajásón Salmón ak'õre paji.
5 Salmón Booz ak'õre paji mãik'aapa Rajab Booz nawe paji. Booz Obed ak'õre paji mãik'aapa Rut Obed nawe paji. Obed Isaí ak'õre paji.
6 Isaí Rey David ak'õre paji. Rey David Salomón ak'õre paji mãik'aapa Urías wêra pada Salomón nawe paji.
7 Salomón Reboán ak'õre paji. Reboán Abías ak'õre paji. Abías Asá ak'õre paji.
8 Asá Josafat ak'õre paji. Josafat Jorán ak'õre paji. Jorán Ozías ak'õre paji.
9 Ozías Jotán ak'õre paji. Jotán Acaz ak'õre paji. Acaz Ezequías ak'õre paji.
10 Ezequías Manasés ak'õre paji. Manasés Amón ak'õre paji. Amón Josías ak'õre paji.
11 Josías Jeconías, chi âpemaarã ome ak'õre paji. Mãùrã p'anapachida Babilonia p'uurudepemaarãpa israelitaarã p'oyaadap'eda, presok'a ateedak'ãri ãchi eujãdee.
12 Ma Babilonia p'uurudee wãdap'edaa, Jeconías Salatiel ak'õre paji. Salatiel Zorobabel ak'õre paji.
13 Zorobabel Abiud ak'õre paji. Abiud Eliaquín ak'õre paji. Eliaquín Azor ak'õre paji.
14 Azor Sadoc ak'õre paji. Sadoc Aquín ak'õre paji. Aquín Eliud ak'õre paji.
15 Eliud Eleazar ak'õre paji. Eleazar Matán ak'õre paji. Matán Jacob ak'õre paji.
16 Jacob José ak'õre paji. José María ùmùk'îra paji. María Jesús nawe paji. Ma Jesús ichiaba t'âjarapachida Cristo; jara k'inia bù Tachi Ak'õrepa pëida eperãarã rey pamerã.
17 Abrahamdeepa uchiada catorce uchiadap'edaarã uchiajida Rey David parumaa. Daviddeepa ichiaba uchiada catorce uchiadap'edaarã uchiajida israelitaarã ateerutamaa Babilonia p'uurudee. Ichiaba madeepa uchiada catorce uchiadap'edaarã uchiajida Jesucristo t'orumaa.
Jesucristo t'oda
(Lucas 2.1-7)
18 Jesucristo t'oda nãga paji. Iru nawe, María, pedeetee baji José ome miak'ãidait'ee. Mamîda araa padai naaweda, Tachi Ak'õre Jaurepa biak'oopiji. 19 Josepa biak'oo bù unuk'ãri, miak'ãi–e pait'ee paji iru ome. Mamîda José t'ãri pia bada perã, María k'îra nejasiapiamaapa k'îup'ee amaat'aait'ee paji, awaraarãpa k'awaanaadamerã. 20 Mãga k'îsia bùde, k'ãimok'araaji ùt'aripema ángel ome. Mãgùpa mãgaji:
—José, Rey Daviddeepa uchiada, waaweenáaji María ome miak'ãiit'ee, Ak'õre Jaurépata ma warra oopida perã. 21 Mariapa ùmùk'îra warra t'oit'ee. T'â bùit'eeda aji, Jesús, irua eperãarã k'aripait'ee perã atuanaadamerã ãchia p'ek'au k'achia oopata k'aurepa.
22 Mãga paji Tachi Ak'õrepa jarapidak'a chonaarãweda ichi pedee jarapari it'aideepa:
23 ‘Awêra ùmùk'îra ome k'ãi–ee bùta biak'ooit'ee mãik'aapa ùmùk'îra warra t'oit'ee. Iru t'âjaradait'ee Emanuel.’ (Isaías 7.14)
Mãgà t'â jara k'inia bù: “Tachi Ak'õre tachi ome bapari.”