K'îsia k'awaa beerã chedap'edaa Jesús ak'ùde
2
1 Jesús t'oji Belén p'uurude.a Mãgà p'uuru Judea eujãde bù. T'ok'ãri, Herodes Judea eujãdepema rey paji. Maapai k'îsia k'awaa beerã ak'õrejîru uchiapari eereepa Jerusalénb p'uurudee chejida. Ãchia lucero ak'ùpachida k'awaadait'ee ne–inaa p'asait'ee bù. 2 Pachedak'ãri, eperãarãmaa iidijida:—¿Sãma bùma ajida, Judiorã Rey t'oda? Iru lucero uchiak'ãri ak'õrejîru uchiapari eere, rey waibùa t'oda k'awaajida. Mapa ma lucero t'êe chejida parã rey jùrùde. Irumaa ùt'aa t'âde chejidada ajida.
3 Rey Herodepa mãga ûrik'ãri, p'era pùk'a nâbeeji, Jerusalén p'uuru pidaarã ichiaba. 4 Mãpai Herodepa t'â pëiji p'aareerã poroorã mãik'aapa Moisepa p'ãda jarateepataarã. Iidiji sãmata Tachi Ak'õrepa pëiit'ee bada t'oit'ee paji. 5 Mãpai p'anaujida:
—Belén p'uurude, Judea eujãde t'oit'ee. Chonaarãweda Ak'õre pedee jaraparipa nãga p'ãji:
6 ‘Belén p'uuru apema Judea eujãdepema p'uuru k'ãyaara ek'ariara bù–e, ma p'uurude eperãarã poro waibùa t'oit'ee perã. Irua israelitaarã ak'ùit'ee mù pari.’ (Miqueas 5.2)
7 Herodepa mãga ûrik'ãri, ma k'îsia k'awaa beerã merã t'â pëiji iidiit'ee sãaweda ma lucero unujida. 8 Maap'eda ãchi Belendee pëiji. Mamîda mãgaji:
—Wåtù ma warra jùrùde. Pia iididapáde aji, ma warra pari. Unu atadak'ãri, mùmaa jara chedapáde aji, mù jida ichiaba irumaa ùt'aa t'âde wã k'inia bairã.
9 Mãpai k'îsia k'awaa beerã wãjida. Ma lucero ãchi naa wãpachi. Mata ak'ùnâ banaji ma warra badamãi. 10 Mãga unudak'ãri, o–îadachida. 11 Teeda t'îudak'ãri, unujida ma warra chi nawe María ome. Mãpai bedabaidap'eda, ùt'aa t'âjida ma warra k'îrapite mãik'aapa ãchi net'aa aneedap'edaa ewat'ùdak'ãri, teejida nêe, ne–inaa t'ûa bapari bajûbak'a mãik'aapa k'era pia t'âjarapatap'edaa mirra. 12 Maap'eda k'ãimok'araade Tachi Ak'õrepa jaraji waa wãnaadamerã Herodemaa. Mapa awaraa ode wãjida ãchi eujãdee.
María José ome Egipto eujãdee mirudap'edaa
13 K'îsia k'awaa beerã wãdap'edaa t'êepai, k'ãimok'araade ùt'aripema angelpa Josemaa mãgaji:
—P'irabáiji mãik'aapa wåji Egipto eujãdee pùchi wêra iru warra ome. Mama p'ananadapáde aji, mùa jararumaa, Herodepa na warra jùrùpiit'ee perã peepiit'ee.
14 Aramãgá José p'irabaiji. María mãik'aapa chi warra atap'eda, p'ãrik'ua Egiptodee wãjida. 15 Mama p'aneejida Herodes piurumaa. Mãga paji Tachi Ak'õrepa jaradak'a, ichi pedee jarapari it'aideepa:
‘Egipto eujãdeepa mù warra t'â pëiji chemerã.’ (Oseas 11.1)
Herodepa ùmùk'îra warrarã peepida
16 Herodepa k'awaak'ãri ma k'îsia k'awaa beerãpa ichi k'ûrat'aadap'edaa, k'îraudachi. Ãchia jaradade k'îsiap'eda, ichi soldaorã pëiji Belén p'uurudee mãik'aapa p'uuru k'ait'a p'anadap'edaamaa, warrarã año omeedeepa edaa peek'oodamerã. 17 Mãgá Tachi Ak'õre pedee jarapari Jeremiapac jaradak'a uchiaji:
18 ‘Ramá p'uurude jêepi ororoo ûrijida. Jêepi chupùria ûrijida. Raquel jêe nâbaji ichi warrarã–it'ee. Apidaapa ichi t'ãri o–î–îapidak'aa paji, chi warrarã k'iniidaidap'edaa perã.’ (Jeremías 31.15)
19 Herodes piuda t'êepai, Egiptode at'ãri p'anùde k'ãimok'araade angelpa jaraji Josemaa:
20 —Wãpáde aji, Israel eujãdee pùchi wêra, chi warra ome, warra pee k'inia p'anadap'edaarã piudap'edaa perã.
21 Mãgá wãjida Ak'õrepa jara pëidak'a. 22 Mamîda Josepa k'awaak'ãri Arquelao rey bù chi ak'õre Herodes pari Judea eujãde, waawee baji mama banait'ee. Mãga nùde k'ãimok'araade Tachi Ak'õrepa jaraji Galilea eujãdee wãdamerã. 23 Mama panadak'ãri, Nazaret p'uuruded p'ananajida. Mãga paji Ak'õre pedee jarapataarãpa jaradap'edaak'a: “Eperãarãpa Jesús t'âjarapataadait'ee Nazaret pida.”e