Juan Bautistapa jarateeda
(Marcos 1.1-8; Lucas 3.1-9, 15-17; Juan 1.19-28)
3
1 Ma t'êepai eperã t'âjarapatap'edaa Juan Bautistaa Tachi Ak'õrepa jara pëida jara cheji Judea eujãde, eujã pania wêe bùmãi. 2 Mãgaji:—¡P'ek'au k'achia oo amáatù mãik'aapa Tachi Ak'õrede ijãapatáatù! Taarã–e nùde Tachi Ak'õrepa eperãarã p'e bùit'eeda aji, ichi jua ek'ari, ichideerã p'aneedamerã.
3 Chonaarãweda Tachi Ak'õre pedee jarapari Isaiapa jaraji:
‘Eujã pania wêe bùde eperã bia bù: “O pi–ia oopatak'a poro waibùa chei naaweda, mãga pùk'a p'ek'au k'achia oo amáatù Tachi Waibùa chei naaweda.” ’ (Isaías 40.3)
4 Mãgà eperã Juan paji. P'aru camello k'aradee k'ada jâpachi. Chi k'ùrrùde jâpari ne–edee ooda paji. K'opachi sisi mãik'aapa topachi jùrrù miéle. 5 Eperãarã Jerusalén p'uurude p'anadap'edaarã awaraa Judea eujãdepemaarã ome mãik'aapa Jordán to k'ait'a p'anadap'edaarã ome chejida Juan pedee ûride. 6 Tachi Ak'õremaa chupùria iidi chejida ãchia p'ek'au k'achia oopatap'edaa k'aurepa. Mãpai Juanpa ãchi poro choo wãpachi Jordán to jãde.
7 Fariseorã saduceorã ome chok'ara ichiaba chejida Juanmaa poro choopide. Mamîda Juanpa mãgaji:
—¡Parã k'achia–idaa beerãdeepa uchiadap'edaarã! ¡Taamák'apù p'anù! ¿Poro choopi chejida–ek'ã Tachi Ak'õre juapa mia k'iniada–e p'anadairã? 8 Mãga pùrã, p'ek'au k'achia oo amáatù mãik'aapa p'anapatáatù Tachi Ak'õrepa k'inia bùk'a. 9 K'îsianáatù Tachi Ak'õrepa parãta miapi–e pait'ee Abrahamdeepa uchiadap'edaa perã. Mùa jara bù: Na mãudeepa Tachi Ak'õrepa Abrahamdeepa uchiadap'edaarã oo atai. 10 Ara chaarapa nejõ bùùrù chauk'aa bù t'upeet'aapatak'a t'ùpùtaude bat'at'aadait'ee paa jõmerã, mãga pùk'a taarã–e Tachi Ak'õrepa jõpiit'ee parã, chi oodaamaa p'anapataarã irua k'inia bùk'a. 11 Mùa parã poro choopari paniapa, ak'ùpidamerã pãchia p'ek'au k'achia oopata oodaamaa p'anù mãik'aapa wãara Tachi Ak'õrede ijãa p'anù. Mamîda eperã mù t'êe cheru mù k'ãyaara waibùara bù. Mùa iru chancla ateeik'araa bù, mù iru k'ãyaara ek'ariara bairã. Irua eperãarã nãgá poro chooit'ee. Tachi Ak'õre Jaure ba chepiit'ee parã k'ap'ùade. Mamîda ichide ijãadak'aa beerã t'ùpùtaude jõpiit'ee. 12 Ooit'ee trigo ewaparipa ooparik'a. Mãgùpa pala aneek'ãri, trigo ewada ùt'aa jira bat'apari chi tau uchiamerã mãik'aapa nãupa chi e ãyaa ateemerã. Maap'eda ma trigo tau ùa bùpari chi–ùapatamãi. Mamîda chi e beeda t'ùpùtaude bat'at'aapari. Mãgà t'ùpùtau k'îik'aada aji.
Jesús poro chooda
(Marcos 1.9-11; Lucas 3.21-22)
13 Maapai Jesús wãji Galilea eujãdeepa Jordán todee, Juan badamaa poro choopide. 14 Ewaaweda Juanpa iru poro choo–e pait'ee paji. Mapa mãgaji:
—Pùata mù poro chooipia bù. ¿Sãap'eda mùmaa cheruma aji, pù poro choopide?
15 Mamîda Jesupa p'anauji:
—Mù poro choopáde aji, Tachi Ak'õrepa jara bùk'a uchiamerã.
Mãpai Juanpa poro chooji. 16 Poro choop'eda, Jesús toiduupa uchiak'ãri, pajã ewadachi mãik'aapa irua unuji Tachi Ak'õre Jaure ichi ârù palomak'a baai cheru. 17 Mãpai ûriji ùt'ariipa nãga pedeeru:
—Nata mù Warra k'inia. Irua mù t'ãri o–îapipari.