Netuara Poro Waibùapa Jesús k'achiade baaipiit'ee pada
(Marcos 1.12-13; Lucas 4.1-13)
4
1 Maap'eda Tachi Ak'õre Jaurepa Jesús wãpiji eujã pania wêe bùmaa, Netuara Poro Waibùapa irumaa ne–inaa k'achia oopi k'inia bada perã.2 Mama k'ãima cuarenta nek'o–ee baji. Mapa jarrapisia nâbeeji. 3 Mãga nùde Netuara Poro Waibùapa ne–inaa k'achia oopide cheji mãik'aapa mãgaji:
—Wãara pù Tachi Ak'õre Warra pùrã, na mãu pan papit'aapáde aji.
4 Jesupa p'anauji:
—¡Oo–eda! aji. Tachi Ak'õre Ûraa p'ãdade jara bù:
‘Eperã chik'o k'o bùpapai chok'ai bak'aa. Tachi Ak'õre pedee k'awa bùpa ichita chok'ai bapari.’ (Deuteronomio 8.3)
5 T'êepai Netuara Poro Waibùapa iru ateeji Jerusalendee, Tachi Ak'õrepa jùrùt'erada p'uurudee. Mama Tachi Ak'õre te ek'arra ârù ùt'à ateeji 6 mãik'aapa mãgaji:
—Wãara pù Tachi Ak'õre Warra pùrã, namãik'aapa jâtùdaipáde aji, Tachi Ak'õre Ûraa p'ãdade jara bairã:
‘Ak'õrepa ichi angeleerã pëiit'ee pù k'aripadamerã. Ãchia pù jita atadait'ee mãik'aapa pù t'ùdùk'adait'ee, pùchi bùùrù pida mãumaa p'u oopiamaapa.’ (Salmos 91.11-12)
7 Jesupa p'anauji:
—¡Jâtù–eda! aji. Ichiaba Tachi Ak'õre Ûraa p'ãdade jara bù:
‘Ne–inaa pariatua oonáaji k'awaait'ee wãara Tachi Ak'õre Waibùapa tachi ak'ùpari wa mãga–e.’ (Deuteronomio 6.16)
8 Maap'eda Netuara Poro Waibùapa iru ee ùt'ùara bù nok'ode ateeji. Mama ak'ùpiji jõmaweda na p'ek'au eujãdepema p'uuru, net'aa pi–ia ome. 9 Mãpai mãgaji:
—Pùta mù k'îrapite bedabaip'eda, mùmaa ùt'aa t'ârura, mãgara na jõmaweda përé payada aji.
10 Jesupa p'anauji:
—¡Oo–eda! aji. Ãyaa wãpáde aji, Satanás.
Tachi Ak'õre Ûraa p'ãdade jara bù:
‘Tachi Ak'õre Waibùamaa aupai ùt'aa t'âpatáatù mãik'aapa jîp'a oopatáatù irua jara bùk'a.’ (Deuteronomio 6.13)
11 Mãpai Netuara Poro Waibùa ãyaa wãji. Mãga nùde angeleerã chejida Jesús k'aripade.
Jesupa naapùara jaratee beeda
(Marcos 1.14-15; Lucas 4.14-15)
12 Jesupa ûrik'ãri Juan Bautista carcelde t'ù nâbùdap'edaa, wãji Galilea eujãdee. 13 Mamîda Nazaret p'uurude bana–e paji. Ma k'ãyaara banaji Capernaum p'uurude, lago ik'aawa bù Zabulondeepa uchiadap'edaarã mãik'aapa Neftalideepa uchiadap'edaarã eujãde. 14 Mãgá uchiaji Tachi Ak'õre pedee jarapari Isaiapa p'ãdak'a:
15 ‘Zabulondeepa uchiadap'edaarã eujãde mãik'aapa Neftalideepa uchiadap'edaarã eujãde, Jordán to k'îraik'a eere p'usadee o wãparide, Galilea apata eujãde israelitaarã–eerã p'anapachida. 16 Mãpemaarã p'ãriu pùk'a bùde p'anapatap'edaa, âdaa pi–ia unudait'ee. Tachi Ak'õrepa ma âdaa pëiit'ee chi p'ãriu pùk'a bùde p'anùùrãmaa atuanaadamerã.’ (Isaías 9.1-2)
17 Maadak'ãriipa Jesupa jarateemaa beeji:
—P'ek'au k'achia oo amáatù mãik'aapa Tachi Ak'õrede ijãapatáatù. Taarã–e nùde Tachi Ak'õrepa eperãarã bù k'inia bù ichi jua ek'ari, ichideerã p'aneedamerã.
Jesupa to–ùapataarã k'îmari jùrùt'erada
(Marcos 1.16-20; Lucas 5.1-11)
18 Ewari aba Jesús Galilea Lago ide nipak'ãri, unuji âpemaarã omé: Simón; ichiaba t'âjarapatap'edaa Pedro mãik'aapa Andrés. To–ùapataarã paji. Mapa t'ùrù t'aamaa p'anajida. 19 Ãra unuk'ãri, Jesupa mãgaji:
—Mù ome nipapatáatù mãik'aapa óotù mùa ooparik'a. Idideepa eperãarã jùrùdait'ee Tachi Ak'õre–it'ee, to–ùapataarãpa chik'o jùrùpatak'a.
20 Aramata ãchi t'ùrù atabëijida mãik'aapa wãjida iru ome.
21 Ipu nok'ode Jesupa awaraa âpemaarã omé unuji: Santiago mãik'aapa Juan. Zebedeo warrarã paji. Barcode t'ùrù pi–ia p'e bùmaa p'anajida chi ak'õre ome. Mãga oomaa p'anùde Jesupa ãchi t'âji ichi ome wãdamerã. 22 Aramata chi ak'õre atabëijida barcode mãik'aapa wãjida Jesús ome.
Jesupa eperãarã chok'araarãmaa jarateeda
(Lucas 6.17-19)
23 Maapai Jesús Galilea eujã jõmaade nipaji. Tachi Ak'õre pedee jaratee nipapachi judiorã Tachi Ak'õre Ûraa jarateepata te bee chaa. Pedee pia jarateepachi k'awaadamerã taarã–e Tachi Ak'õrepa eperãarã p'e bùit'ee ichi jua ek'ari, ichideerã p'aneedamerã. Ma awara k'ayaa jõmaweda jùpa nipapachi. 24 Siria eujãdepemaarãpa mãga ûridak'ãri, irumaa aneejida k'ayaa beerã k'îra t'ãdoo: k'ap'ùa p'ira–idaa beerã; netuara k'ap'ùade merãtùa beerã; wawa beerã; k'ap'ùa chiwa beerã. Ma k'ayaa jõmaweda Jesupa jùpapachi.
25 Eperãarã chok'ara iru ome nipapachida: Galilea eujãdepemaarã; Decápolis eujãdepemaarã; Jerusalén p'uurudepemaarã, awaraa Judea eujãdepemaarã ome mãik'aapa Jordán to ak'õrejîru uchiapari eerepemaarã.