Jesús Pilato k'îrapite
(Mateo 27.1-2, 11-14; Lucas 23.1-5; Juan 18.28-38)
15
1 Tap'edaweda p'aareerã poroorã, judiorã poro waibùarã mãik'aapa Moisepa p'ãda jarateepataarã, mãgà Junta Supremadepemaarã chip'edaidap'eda, pedeeteejida k'awaadait'ee k'ãata oodait'ee Jesús ome. Jesús jua jâ atapidap'eda, teenajida Pilato temaa. Ichi Romadepemaarã poro waibùa paji.2 Pilatopa iidiji Jesumaa:
—¿Pùk'ã aji, Judiorã Rey?
Jesupa p'anauji:
—Mùda aji, pùa jara bùk'a.
—¿Maarepida p'anau–ek'ã aji, ùmùatee jõnùta?
5 Mamîda Jesupa maarepida p'anauk'aa paji. Mapa Pilatopa k'awa–e paji k'ãata ooit'ee.
Pilatopa Jesús peepida
(Mateo 27.15-26; Lucas 23.13-25; Juan 18.38--19.16)
6 Ma fiestade Pilatopa preso aba k'ena pëipachi, eperãarãpa iidirutata. 7 Eperã t'âjarapatap'edaa Barrabás carcelde baji awaraa k'õp'ãyoorã ome, Roma pidaarã juadeepa uchia k'iniapa chîara pee p'anadap'edaa perã. 8 Eperãarãpa iidinadak'ãri Pilatomaa preso k'ena pëimerã ichia ooparik'a, 9 irua p'anauji:
—¿K'inia p'anùk'ã aji, mùa Judiorã Rey apata k'ena pëimerã?
10 Mãga iidiji k'awa bada perã judiorã p'aareerã poroorãpa Jesús k'îra unuamaa iru p'anadap'edaa. 11 Mamîda p'aareerã poroorãpa eperãarãmaa jarajida iididamerã Pilatopa Barrabata k'ena pëipimerã. 12 Mapa Pilatopa iidiji:
—¿Sãga oopi k'inia p'anùma aji, parãpa Judiorã Reyda a p'anù ome?
13 Mãpai biajida:
—¡Kurusode peepit'áaji!
14 Pilatopa mãgaji:
—¿K'ãare k'achiata oojima? aji.
Mamîda waya eperãarãpa biajida:
—¡Kurusode peepit'áaji!
15 Pilato pia bee k'inia bada perã eperãarã ome, Barrabata k'ena pëiji. Jesús soopa wùpip'eda, pëiji kurusode baijira bùdamerã piurumaa.
Soldaorãpa Jesús oo iru p'anadap'edaa
(Mateo 27.27-31; Juan 19.2-3)
16 Soldaorãpa Jesús ateejida Pilato palaciode, t'âjarapatap'edaa pretorio. Mama tuda soldaorã chok'araara seedachida. 17 Oo iru p'anapachida. Rey p'aruk'a p'oree k'îra p'ãimap'ãimaa jâ bùdap'eda, poro jâra pak'uru jua ne–ùùrù–idaa bùdee oojida mãik'aapa jâ bùjida. 18 Maap'eda bia ëipachida:
—¡Ak'àtù Judiorã Rey!
19 Poromaa wùpachida pak'urupa. Idupachida mãik'aapa bedabaidaipachida iru k'îrapite ùt'aa t'â pùk'adait'ee. 20 Mãgá oo iru p'anadap'eda, ma p'aru p'oree êrat'aajida mãik'aapa ichi p'aru waya jâ bùjida. Maap'eda ateejida kurusode baijira bùdait'ee.
Cirene p'uurudepemamaa<R>Jesús kuruso ateepidap'edaa
(Mateo 27.32-44; Lucas 23.26-43; Juan 19.17-27)
21 Uchia wãdak'ãri Jerusalendeepa, unujida eperã Cirene p'uurudepema t'âjarapatap'edaa Simón. Ewaa p'uurude panaji. Mãgà eperã Alejandro mãik'aapa Rufo ak'õre paji. Simón ik'aawa wãyaa wãdak'ãri, soldaorãpa kuruso ateepijida Jesús pari.
Jesús kurusode baijira bùdap'edaa
22 Jesús ateejida Gólgota apatap'edaamaa. (Gólgota jara k'inia bù: “Tachi Poro Bùùrù”.) 23 Maap'eda teejida vino mirraa ome p'oirada, mamîda Jesupa to–e paji. 24 Mãpai soldaorãpa Jesús jua mãik'aapa chi bùùrù merap'ejida mãik'aapa kurusode baijira bùjida piumerã. Mãgùùrãpa suerte jemenejida k'awaadait'ee k'áipata iru p'aru atait'ee.
25 Mãga oojida tap'eweda, las nueve. 26 Soldaopa iru poro ùt'aik'a eere kurusode letrero merap'eji, jarait'ee k'ãare–it'ee kurusode baijira bùjida piumerã. P'ã baji: Judiorã Rey. 27 Mama ichiaba nechùapataarã omé kurusode baijira bùjida, aba Jesús juaraare, chi apema juabi eere. 28 [Mãga p'asaji Tachi Ak'õre Ûraa jaraparipa p'ãdak'a chonaarãweda:
‘Iru p'ek'au k'achia oopataarã ome auk'a ata bùjida.’] (Isaías 53.12)
29 Chi arii wãyaa wã nipadap'edaarãpa irumaa ik'achia jarajida. Ãchi poro p'ùrap'ùraa mãgapachida:b
—¡Aai, pùa Tachi Ak'õre te jõmaweda t'eet'aait'ee paji mãik'aapa waya oo atait'ee paji ewari õpeemaa! 30 Pùa jarada wãara pùrã, ¡jãmãik'aapa ùrabáiji piunaamerã!
31 Ichiaba mãgá oo iru p'anapachida p'aareerã poroorãpa Moisepa p'ãda jarateepataarã ome:
—¡Awaraarã k'aripajida ajida. Mamîda ichi itu nadeepa p'oyaa uchia–e! 32 ¡Ak'àtù! ¿Jãgà Tachi Ak'õrepa pëida tachi k'aripamerã, israelitaarã Rey poro waibùak'ã? ¡Jãmãik'aapa ùrabáiji âraweda tai k'îrapite! Mãga ooru pùrã, taipa ichiaba pùde ijãadait'eepù.
Kurusode iru ik'aawa baijira p'anadap'edaarãpa ichiaba irumaa ik'achia jarapachida.
Jesús jai–idaada
(Mateo 27.45-56; Lucas 23.44-49; Juan 19.28-30)
33 Imat'ùpa ak'õrejîru k'iat'ùdachi. Na eujã jõma p'ãriudachi las tres parumaa. 34 Ma hora Jesupa golpe biaji:
—‘Eloí, Eloí, ¿lemá sabactani?’ (Ma pedee jara k'inia bù: ‘Mù Ak'õre, Mù Ak'õre, ¿K'ãare–it'ee mù atabëijima?’) (Salmos 22.1)
35 Ûk'uru arii p'anadap'edaarãpa ûridak'ãri, maajida:
—¡Ûrítù! Elías, chonaarãwedapema Ak'õre pedee jarapari t'âmaa bùda ajida.
36 Eperã p'ira wãji mãik'aapa esponjak'a p'êesap'êesaa bù topa ataji vino achuchuade.c Sia k'âde jõi bùp'eda, Jesús it'aimãi t'ù atanaji sõmerã, opisia bù jîak'aapa mãik'aapa maaji:
—Ârá, ichiak'au bùdait'ee. Unu k'inia p'anù Elías cheru pùrã ichi ùrabai atade.
37 Mamîda Jesús golpe biaji mãik'aapa jai–idaaji. 38 Mãùmisa Jerusalende Tachi Ak'õre tede chi edupùara bù cuarto t'îupatamãi p'aru teesoo eebai jira bada esajîak'a jêdachi ùt'ùùpa edaa. 39 Jesús k'îrapite ak'ù nâbada soldaorã poropa iru mãgá piu wã unuk'ãri, mãgaji:
—¡Wãara, na eperã Tachi Ak'õre Warra paji!
40 T'ùmùùpapai ûk'uru wêraarã p'anadap'edaarãpa ak'ù p'anajida: María Magdalena; María, Santiago (chi t'êepema)d mãik'aapa José nawe; ichiaba Salomé.e 41 Jesús Galilea eujãde nipak'ãri, ma wêraarãpa iru chi k'õp'ãyoorã ome k'aripa nipapachida. Mama ichiaba wêraarã chok'ara p'anajida iru ome Jerusalendee chedap'edaarã.
Jesús ùadap'edaa
(Mateo 27.57-61; Lucas 23.50-56; Juan 19.38-42)
42 Ma ewate p'ãriupodopa jõmaweda ne–inaa aupa jêra bait'ee paji âipata ewate pai naaweda.f 43 José Arimatea p'uurudepema waawee–ee wãji Pilatomaa Jesús k'ap'ùa piuda iidide ùait'ee. Mãgà Junta Supremadepema paji mãik'aapa apemaarã judiorãpa iru pia ak'ùpachida. Ma awara irua unu k'inia baji Tachi K'aripaparipa ichita eperãarã pia ak'ùpari. 44 Pilatopa Jesús piuda k'awaak'ãri, p'eraji isapai piuda perã. Mapa soldaorã poro t'â ataji mãik'aapa iidiji:
—¿Wãara piujik'ã? aji.
45 Mãpai Jesús piu bùda ak'ãri, Pilatopa teeji iru k'ap'ùa Josemaa. 46 Mãpai Josepa neto ataji p'aru lienzodee mãik'aapa Jesús k'ap'ùa kurusodeepa ùrabai atap'eda, aùde pùra bùji. Maap'eda bùnaji mãu te uria k'oro iru p'anadap'edaade mãik'aapa chi t'ai t'ap'a bëiji mãu choma bùpa. 47 María (José nawe), María Magdalena ome ak'ù p'anajida sãma ùaruta.