SAN LUCAS
San Lucapa Pedee Pia P'ãda
Teofilomaa naapùara p'ãda
1
1 Eperãarã poro waibùa Teófilo, mù naa awaraarãpa p'ãjida ne–inaa p'asada tachi t'ãide. 2 P'ãjida Jesús ãchi taupa unudap'edaa mãik'aapa tachimaa irudé nepùrùdap'edaa. Tachi Ak'õrepa ãra jùrùt'eraji mãgá irua ooda jarateepataadamerã. 3 Mùa ma p'ãdap'edaa pia ak'ùji. Ma awara ãramaa mãik'aapa Jesús unudap'edaarã awaraarãmaa iidi wãji. Mãgá Jesús t'odadeepa p'asada pia k'awaaji. Eperãarã poro waibùa Teófilo, 4 ma jõmaade k'îsiap'eda, mùa nãga p'ã bù, pùa ma wãara pedee jarateedap'edaa pipùara k'awaamerã.Tachi Ak'õrepa jara pëida Juan Bautista t'oit'ee
5 Jesús t'oi naaweda Herodes rey paji Judea eujãde. Mama bapachi p'aare t'âjarapatap'edaa Zacarías. Iru p'aare Abías eere p'anadap'edaarãdepema paji. Chi wêra, Isabel, ichiaba chonaarãwedapema p'aareerã poro waibùa Aarondeepa uchiada paji. 6 Zacarías chi wêra ome k'achia wêe p'anapachida Tachi Ak'õre k'îrapite, iru ûraade jara bùk'a oopachida perã. Maperã apidaapa ãra p'oyaa ùmùateedak'aa paji. 7 Mamîda ãra warra wêe p'anajida, Isabel warra t'ok'aa pada perã. Ma awara ãchi omeeweda audú chonaa p'anajida warra oodait'ee.
8 Ewari aba p'aareerã poroorãpa jarajida Abías eerepema #p'aareerã mimia #oo p'aneedamerã Tachi Ak'õre tede. 9 P'aareerãpa oopatak'a suerte jemenejida k'awaadait'ee k'aita t'îuit'ee Tachi Ak'õre te edupema cuartode ne–inaa t'ûa bapari paade. Mãgá Zacariata uchiaji. 10 T'îuji ma ne–inaa t'ûa bapari paade. Mãga oomaa bù misa, eperãarã jõmaweda taawa ùt'aa t'â para baji. 11 Zacarías mama te jãde bùde ùt'aripema angelpa ichi unupiji. Bainâ baji ma ne–inaa t'ûa bapari paapata altar juaraare. 12 Zacariapa mãga unuk'ãri, p'eradachi. 13 Mamîda ma angelpa mãgaji:
—Zacarías, waaweenaapáde aji. Tachi Ak'õrepa pùa ùt'aa iidida ûrijipù. Pù wêra Isabelpa warra t'oit'ee. T'â bùit'eeda aji, Juan. 14 Parã o–î–îa p'anadait'ee iru ome. Ichiaba eperãarã chok'ara o–îa p'anadait'ee iru t'oda k'awaadak'ãri. 15 Pù warra waibùa pait'ee Tachi Ak'õre k'îrapite. Maarepida it'ua, vino jida tok'aa pait'ee. Iru t'oi naaweda, Tachi Ak'õre Jaure bapariit'ee iru ome. 16 Irua israelitaarãa chok'araarãmaa waya ijãapiit'ee Tachi Ak'õrede. 17 Na Juanpa Ak'õre pedee jaranait'ee, Tachi Waibùa chei naaweda. Audú Ak'õrede ijãapariit'ee. Ne–inaa ooit'ee Tachi Ak'õre juapa mãik'aapa sõcharra bait'ee Ak'õre pedee jarapari Elías chonaarãweda bapatak'a. Ak'õreerãmaa k'îsiapiit'ee ãchi t'ãri auk'a bùdamerã ãchi warrarã ome. T'ãri k'achia beerãmaa jarateeit'ee oo k'awaa wãdamerã Ak'õrepa oopi bùk'a. Mãga oo bùpa israelitaarã k'aripait'ee Tachi Waibùa k'awaadamerã mãik'aapa irude ijãapataadamerã.
18 Mãga ûrik'ãri, Zacariapa ma angelmaa iidiji:
—¿Sãga mùa pù pedee ijãayama? aji. Mù audú chonaa bùda aji, warra ooit'ee; mù wêra jida.
19 Mãpai angelpa mãgaji:
—Mù Gabrielda aji. Tachi Ak'õrepa jararuk'a mùa ooparida aji. Irua mù pëiji pù ome pedeede mãik'aapa pùmaa ma pedee pia jarade. 20 Mamîda pùa mù pedee ijãa–e pada perã, âraweda pù p'oyaa pedee–ee beeit'eeda aji, mùa jaradak'a parumaa.
21 Zacarías mãgá edú bù misa, eperãarã taawa ùt'aa t'â para badaarãpa k'îsia p'aneejida: “¿Sãgap'edapù taarãruma?” apachida. 22 Zacarías uchiak'ãri, p'oyaa pedeek'aa paji. Jîp'a juapa jarapachi. Mapa ma eperãarãpa k'awaajida irua k'ãimok'araa pùk'a bùde ne–inaa unuda Tachi Ak'õre tede.
23 Zacariapa ichi mimia Tachi Ak'õre tede aupak'ãri, ichi temaa wãji. 24 T'êepai chi wêra Isabel biak'oo beeji. Atane joisomaa wãyaaru misa, uchia–e paji ichi tedeepa. 25 K'îsiaji: “Tachi Ak'õrepa mùmaa ne–inaa pia ooji. Mù k'îra nejasia bapachi, biak'ook'aa pada perã. Mamîda irua mù chupùria k'awaada perã, ârá mù biak'oo bùda” aji.
Tachi Ak'õrepa jara pëida Jesús t'oit'ee
26 Atane seismaa Isabel biak'ooda, Tachi Ak'õrepa ichi ángel Gabriel pëiji Galilea eujãdepema p'uuru Nazaretdee. 27 Mama bapachi awêra waide ùmùk'îra ome k'ãi–ee. T'âjarapachida María. Mama ichiaba bapachi ùmùk'îra t'âjarapatap'edaa José. Ichi chonaarãwedapema Rey Daviddeepa uchiada paji. María José ome pedeetee p'anajida miak'ãidait'ee. 28 Gabriel cheji Mariamaa mãik'aapa mãgaji:
—¡Pia baparíiji! Tachi Ak'õrepa pù piara ak'ùpari awaraarã k'ãyaara. Iru pù ome bùda aji.
29 Mãga ûrik'ãri, María p'era pùk'a beeji mãik'aapa k'îsiaji: “¿Sãap'edata mùmaa mãga jara cheruma?” aji. 30 Mãpai Gabrielpa mãgaji:
—María, waaweenaapáde aji. Tachi Ak'õrepa pù jùrùt'eraji k'inia iru bairã. 31 Pù biak'oo beeit'ee mãik'aapa ùmùk'îra warra t'oit'ee. T'â bùit'ee Jesús. 32 Iru Tachi Waibùa pait'ee. Tachi Ak'õre Warrada adait'ee. Tachi Ak'õre Waibùapa iru rey papiit'ee, iru chonaarãwedapema Rey Davidk'a. 33 Iru ichita Jacobdeepa uchiadap'edaarã rey pait'ee, na p'ek'au eujã jõru pùjida.
34 Mãpai Mariapa iidiji ma angelmaa:
—Mamîda, ¿sãga biak'ooyama aji, mù ùmùk'îra ome k'ãi–ee bùta?
35 Gabrielpa p'anauji:
—Pù biak'oo–e pait'ee awaraa wêraarãk'a. Ak'õre Jaure pù ome bait'ee. Tachi Ak'õrepa ne–inaa jõmaata oopari. Iru Jaurepa pù aneu pùk'a cheit'ee jâararak'a. Mãgá ùmùk'îra wêe bù mîda, biak'oo beeit'ee. Ak'õrepa mãga ooit'ee perã, pù warra k'achia wêe bapariit'ee. Iru Tachi Ak'õre Warrada apataadait'ee. 36 Ma awara pùchi ëreerã Isabel, chõtrãa k'ùrù mîda, atane seis iru bù biak'ooda. Iru warra t'ok'aada apachida mîda, ùmùk'îra warrata t'oit'eeda aji. 37 Tachi Ak'õrepa mãga ooi, wê–e perã ne–inaa irua p'oyaa oo–e pai.
38 Mãpai Mariapa mãgaji:
—Mù Tachi Ak'õre jua ek'ari bapari. Irua jara bùk'a ooipia bùda aji, mù ome.
Maap'eda Gabriel wãji.
María Isabelmaa wãda
39 Ma t'êepai María wãji Isabel bada p'uurudee ee jêra bùmãi Judea eujãde. 40 Zacarías temãi panak'ãri, Mariapa Isabelmaa saludaaji. 41 Isabelpa María pedee ûrik'ãri, chi chai o–îapa jâtù jira beeji iru bide. Mãpai Tachi Ak'õre Jaure ba cheji Isabel ome. 42 Mapa golpe pedeeji:
—Tachi Ak'õrepa pùta pipùara ak'ù bùda aji, awaraa wêraarã k'ãyaara. Irua pù warra bide bù pia ak'ù bapariit'eeda aji. 43 Mù ek'ariara bù mîda Tachi Ak'õre k'îrapite, mù o–îa bù, pù, Mùchi Waibùa nawepa mù ak'ù cheda perã. 44 Pù salude ûriruta mù warra o–îapa jâtù jira beeji mù bide. 45 ¡Pù o–îa bù ijãada perã Tachi Ak'õrepa ooit'ee ichia jara pëidak'a!
Mariapa pedee pia jarada Tachi Ak'õrede
46 Mãpai Mariapa mãgaji:
—T'ãripa mùa jara bù: Tachi Ak'õre jõmaarã k'ãyaara waibùara bù.
47 Mùchi t'ãride o–îa nâbù, Tachi Ak'õrepa mù o k'achiadeepa k'aripa atapari perã.
48 Mù chupùria k'ùrù mîda iru esclavak'a, irua mù jùrùt'eraji mãik'aapa t'ãri o–îapiji. Mapa âraweda jõmaarãpa mù t'âjaradait'ee chi Tachi Ak'õrepa t'ãri o–îapida.
49 ¡Tachi Ak'õre Waibùa t'âjarapata Chi K'achia Wêe Bapari! Iruata ne–inaa pi–ia ooji mù ome.
50 Tachi Ak'õrepa chupùria k'awaapari ichide ijãapataarã; ãchi warrarã; ãichak'eerã paara.
51 Ne–inaa pi–ia oodoo ichi juapa. T'ãride audua beerã jërek'ooji.
52 Reyrã uchiapiji ãchi mimiadeepa mãik'aapa ãra k'ãyaara audua–ee beerã poro waibùarã papiji.
53 Jarrapisia beerã irumaa chedak'ãri, ne–inaa pia teeji k'ãiwee nipadamerã ichi ode. Jõdee net'aa piara iru p'anadap'edaarã arajãgaa wãpiji ãchi ode.
54 Tachi israelitaarã, ichi eperãarã k'aripapachi ichia oopi bùk'a oopatap'edaa perã. Ãra ichita chupùria k'awaaji 55 mãga ooit'eeda ada perã tachi chonaarãmaa; Abrahammaa mãik'aapa irudeepa uchiadait'eerãmaa.b
56 María Isabelmãi atane õpee beeji. Maap'eda cheji ichi temaa.
Juan Bautista t'oda
57 Isabel warra t'ok'ãri, ùmùk'îra warrata t'o ataji. 58 Ãchi te k'ait'a p'anapatap'edaarãpa mãik'aapa ãchideerãpa k'awaadak'ãri Tachi Ak'õrepa mãgá ãchi k'aripada, ãramaa chejida pedee pia jarade. 59 Warra t'op'eda, k'ãima ocho pak'ãri, iru k'ap'ùade tauchaa bùpijida. Arii p'anadap'edaarãpa t'â bùdait'ee paji Zacarías, chi ak'õrek'a. 60 Mamîda chi nawepa mãgaji:
—Mãga–e. Iru t'â bùdait'ee Juan.
61 Mãpai mãgajida:
—Parãdeerã apidaamaa ma t'â bùda–e paji.
62 Mãpai juapa jarajida chi ak'õremaa, chi warra t'â k'awaadait'ee. 63 Mãpai Zacariapa juapa jaraji ichi–it'ee tabla pite aneedamerã mãik'aapa aùde p'ãji: Iru t'â bùit'ee Juan. Mãga unudak'ãri, eperãarã jõmaweda ak'ùtrua para beeji. 64 Aramata Zacarías pedee uchiaji mãik'aapa Tachi Ak'õrede pia pedeeji. 65 Jõmaweda iru k'ait'a p'anapatap'edaarã ak'ùtrua para beeji mãik'aapa mãgà p'asada pia t'opachida jõmaweda eperãarã eede p'anapataarãmãi Judea eujãde. 66 Mãga ûridak'ãri, jõmaarãpa k'îsia p'anapachida ãchi t'ãridepai: “¿K'ãata ooit'eepaama ajida, ma warrapa?” ¿Chonaa pak'ãri, eperã waibùa pait'ee–epaa? ¿Wãara Tachi Ak'õre iru ome bapariit'ee–epaa?
Zacariapa Tachi Ak'õremaa jarada
67 Mãpai Tachi Ak'õre Jaure ba cheji Zacarías ome. Mapa mãgaji:
68 —¡Tachi Ak'õre, tachi israelitaarã Ak'õre Waibùa t'ãri pia bapari, ichi eperãarã k'aripa cheda perã!
69 Ichi mimiapari Daviddeepa uchiada pëiji Tachi K'aripa Atapari bamerã. Mãgà jõmaarã k'ãyaara waibùara bù.
70 Chonaarãweda mãgùde pedeepachi ichi pedee jarapataarã k'ap'ùa pari.
71 Jaraji mãgùpa tachi k'aripa atait'ee tachi k'îra unuamaa iru p'anapataarã juadeepa.
72 Ichiaba jaraji mãgùpa tachi chonaarã chupùria k'awaait'ee mãik'aapa ooit'ee irua jaradak'a ãra poro waibùarãmaa.
73 K'irãpaji ichi pedee jarada ichi t'â waibùade tachi ak'õchona Abrahammaa:
74 K'aripait'ee tachi k'îra unuamaa iru p'anapataarã juadeepa, waawee–ee oopataadamerã irua oopi bùk'a iru jua ek'ari p'anùde.
75 K'aripait'ee chok'ai p'anùde k'achia wêe p'anapataadamerã iru k'îrapite.c
76 Mamîda warra, pù t'âjaradait'eeda aji, Ak'õre Waibùa pedee jarapari. Tachi Waibùa naa jarateenait'ee, eperãarãpa iru pedee ûri k'inia p'anapataadamerã.
77 Jarait'ee Tachi Ak'õrepa eperãarãpa p'ek'au k'achia oopata wêpapipari mãik'aapa ãra o k'achiadeepa k'aripa atapari atuanaadamerã.
78 Tachi Ak'õrepa tachi chupùria k'awaapari perã, aba ak'õrejîruk'a urua bù ùt'ariipa pëiit'ee.
79 Mãgà âdaa pùk'a bait'ee na p'ek'au eujãdepema p'ãriu pùk'a p'anùùrã atuadait'eerã t'ãide. Tachi Ak'õre o ak'ùpiit'ee, aùde tachi nipapataadamerã mãik'aapa k'ãiwee p'anapataadamerã.
80 Zacarías warra wari wãji mãik'aapa audú ijãa beeji Tachi Ak'õrede. K'ûtrãa pak'ãri, banaji eujã pania wêe bùde israelitaarãmaa jarateemaa beerumaa.