Jesús t'oda
(Mateo 1.18-25)
2
1-2 Juan at'ãri ma–ãri bak'ãri, César Augusto Romadepema reyrã poro waibùa paji Romadepemaarã eujãde, ichiaba awaraa eujã iru jua ek'ari badade. Cirenio ichi jua ek'ari baji. Mãgùpa Siria eujã ak'ùpachi. Maapai irua* eperãarã ichi truadepema jõmaweda t'â p'ãpiji k'awaait'ee jõmasaa p'anù. Mãgà chi naapema t'â p'ãpida paji. 3 Mãgá eperãarã juasiadak'ãri, jõmaweda wãpijida ãchi chonaarã p'uurudee t'â p'ãpide.4 Maperã José uchiaji Galilea eujãdepema Nazaret p'uurudeepa wãit'ee Judea eujãdee. Ichi chonaarãwedapema Rey Daviddeepa uchiada perã, wãji David t'oda p'uuru Belendee. 5 Mamaa wãji ichi t'â p'ãpide María ome, ichi wêra pait'ee bada perã. Uchiadak'ãri, María warra t'oyama baji. 6 Belende panadak'ãri, María bi p'ira nâbeeji chi warra t'oit'ee. 7 Mamîda te unuda–e paji, araada–e pada perã jõmaweda t'â p'ãpi chedap'edaarã–it'ee. Mapa mama Belende chi warra naapema t'oji, ne–animalaarã nek'opata tede. Chi warra p'arude pùra atap'eda, bùji ne–animalaarã nek'opatade k'ãimerã.
Angelpa oveja ak'ùpataarãmaa unupida
8 Ma p'ãrik'ua Beléna k'ait'a p'ûajara paraamãi eperãarãpa ãchi ovejaarã ak'ùmaa p'anajida. 9 Mãga nùde angelpa ichi unupiji mãik'aapa Tachi Ak'õre k'îra wãree âdaadachi ãchi ik'aawa. Mapa p'eradachida. 10 Mamîda ma angelpa mãgaji:
—P'eranaadapáde aji, mùa pedee pia jara cheru perã. Mùa nepùrùru k'aurepa eperãarã jõmaweda audú o–îa p'aneedait'ee. 11 Idi p'ãrik'ua Rey David t'oda p'uurude t'oji eperãarã o k'achiadeepa k'aripa atapari. Iru Tachi Waibùa, Tachi Ak'õrepa pëida eperãarã rey pamerã. 12 Jùrùnadapáde aji. Ununadak'ãri ùmùk'îra warra p'arude pùra bù ne–animalaarã nek'opatade, k'awadayada aji, mùa wãarata jarada.
13 Aramata unujida ùt'aripema angeleerã cho–k'ara chi apema ik'aawa para bù. Jõmaarãpa o–îa ùt'aa t'â para beeji. Mãgapachida:
14 —¡Tachi Ak'õre ùt'ari bùta jõmaarã k'ãyaara waibùara bù! ¡Irua pia ak'ù bùùrã t'ãri o–îa p'anapata mãik'aapa k'ãiwee p'anapata!
15 Ma angeleerã jõmaweda wãdak'ãri Ak'õre eujãdee, ma oveja ak'ùpataarãpa mãga jõnapachida:
—Wãdáma apachida Belendee, Ak'õrepa jara pëida ak'ùde.
16 Mãpai isapai wãjida. Wãara ununajida María José ome mãik'aapa María warra k'ãi bù ne–animalaarã nek'opatade. 17 Mãga unudap'eda, nepùrùnajida ma angelpa jarada ma warradé. 18 Jõmaweda ãra pedee ûridap'edaarã ak'ùtrua para beeji. 19 Mamîda ma jõmaade Mariapa ichi t'ãridepai k'îsiaji. K'îra atuak'aa paji ãrapa jaradap'edaa. 20 Jõdee ma oveja ak'ùpataarã o–îa wãjida ãchi p'anadap'edaamaa. Wãk'ãtù wãdapa mãgapachida:
—Tachi Ak'õre jõmaarã k'ãyaara waibùara bù. Iru t'ãri pia bù. Jõma unujida irua jara pëidak'a.
Jesús ak'õreerãpa iru ateedap'edaa Tachi Ak'õre tede
21 Ma warra t'op'eda, ewari ochomaa iru k'ap'ùade tauchaa bùjida mãik'aapa t'â bùjida Jesús, María biak'oo beei naaweda, angelpa jaradak'a.
22-24 Ewari cuarenta wãyaak'ãri, wãjida Jerusalendee oodait'ee Moisepa p'ãdade jara bùk'a, t'îu pia p'aneedait'ee Tachi Ak'õre tede. María k'ap'ùa pari oojida Ak'õre Ûraa p'ãdade jara bùk'a wêraarãpa oodamerã warra t'op'eda:
‘Peepidap'eda, paapidaipia bù tortola omé maa–e pùrã paloma chak'eerã omé.’(Levítico 12.6-8)
Ichiaba chi warra awara bùjida Tachi Ak'õre–it'ee Moisepa p'ãdade jara bùk'a:
‘Israelitaarãpa ãchi warrarã naapemaarã awara bùdaipia bù Tachi Ak'õre–it'ee.’(Éxodo 13.2, 12)
25 Maapai Jerusalende bapachi chonaa aba t'âjarapatap'edaa Simeón. Iru Tachi Ak'õrede ijãapachi mãik'aapa oopachi irua oopi bùk'a. Ijãapachi Tachi Ak'õrepa israelitaarã k'aripait'ee ãchi k'îra unuamaa iru p'anapatap'edaarã juadeepa. Tachi Ak'õre Jaure bapachi Simeón ome. 26 Iruata k'awapiji Simeón piu–e pait'ee unui naaweda Cristo, Tachi Ak'õrepa pëida eperãarã rey pamerã. 27 Ma ewate Ak'õre Jaurepa iru wãpiji Tachi Ak'õre tedee. Mãga nùde Jesús ak'õreerã wãjida mamaa. Oomaa p'anajida Moisepa p'ãdade jara bùk'a oodamerã ãchi warra ewaa t'oda ome. 28 Simeonpa ãra unuk'ãri, ma warra chai jira ataji mãik'aapa t'ãri o–îa mãgaji Tachi Ak'õremaa:
29 —Ak'õre, jõmaarã Ak'õre Waibùa, ârá mù, pù mimiapari, k'ãiwee piuit'ee, pùa eperã jaradak'a unuru perã.
30 Mùchi taupa unuru Tachi K'aripapari.
31 Pùa na ùmùk'îra warra pëiji pù o ak'ùpimerã na p'ek'au eujãdepemaarãmaa.
32 Iru âdaa pùk'a bù k'aurepa judio–eerãpa paara pù o k'awaadait'ee mãik'aapa iru k'aurepa eperãarãpa israelitaarã t'o p'anadait'ee.
33 Simeón pedee ûridak'ãri, Jesús ak'õreerã p'era pùk'a p'aneejida. 34 Mãpai Simeonpa iidiji Ak'õrepa ãra pia ak'ù bapariimerã mãik'aapa Mariamaa mãgaji:
—Pù warra k'aurepa Israel eujãdepemaarã chok'ara ùt'aa wãdait'ee mãik'aapa chok'ara atuadait'ee. Ichiaba chok'araarãpa jaradait'ee Tachi Ak'õrepa iru pëi–e paji. 35 Mãgá Tachi Ak'õrepa k'awaapiit'ee eperãarãpa k'îsiapata ãchi t'ãridepai; wãara irude ijãa p'anù maa–e pùrã ijãada–e p'anù. Mamîda ma jõmaade pù t'ãri p'ua nâbait'ee, espadapab pù t'ãride su atarutak'a.
36 P'êtrãa t'âjarapatap'edaa Ana ichiaba mama baji. Tachi Ak'õre pedee jarapari paji. Chi ak'õre Aserdeepa uchiada paji. T'âjarapachida Penuel. Awêraweda Ana miak'ãiji. Mamîda siete añopai baji chi ùmùk'îra ome. 37 Mamãik'aapa p'êtrãa beeji ochenta y cuatro año parumaa. Tachi Ak'õre tede bapachi. Ewari chaa ùt'aa t'âpachi. Edaare nek'ok'aa paji ùt'aa t'â k'iniapa. 38 Simeón pedee auparude Ana uchiaji. José mãik'aapa María unuk'ãri ma warra ome, Tachi Ak'õremaa gracias jaraji iru pari. Mãpai arii p'anadap'edaarãmaa jarapachi:
—Na warrata tachi Jerusalénc pidaarãpa nù p'anù tachi k'aripait'ee.
Waya chedap'edaa Nazaret p'uurudee
39 José María ome ne–inaa jõma oo aupadak'ãri Moisepa p'ãdade jara bùk'a, waya chejida Galilea eujãdee ãchi p'uuru Nazaretde. 40 Ãchi warra juatau chaareera wari wãpachi mãik'aapa k'îsia k'awaara wãpachi. Ichiaba Tachi Ak'õre o–îa baji iru ome.
Jesús warraweda Tachi Ak'õre tede
41 Año chaa Jesús ak'õreerã wãpachida Jerusalén p'uurudee Pascua fiesta oode. 42 Jesús doce año iru bak'ãri, mãga oojida mãik'aapa iru auk'a wãji ãra ome. 43 Ma fiesta jõdaik'ãri, eperãarã erreujida ãchi te chaa. Mamîda Jesús Jerusalende beeji, chi ak'õreerãpa k'awada–ee. 44 Ode wãdade chi ak'õreerãpa k'awada–e paji, chok'ara cheepuru wãdap'edaa perã. K'îsia p'anajida Jesús cheru apemaarã ome. Mapa k'ewara iidipachida ãchi ëreerãmaa mãik'aapa k'îra k'awaarãmaa. 45 Mamîda unuda–e pak'ãri, ãpùtee jùrùnajida Jerusalende.
46 K'ãima õpeemaa ãchi warra unu atajida Tachi Ak'õre tede. Su–ak'ù baji Moisepa p'ãda jarateepataarã esajîak'a. Mãùrãpa jaratee p'anù ûrii bap'eda, iidipachi. 47 Arii p'anadap'edaarã jõmaarãpa iru pedee ûridak'ãri, ak'ùtrua para beepachi, poro wêsaa bada perã mãik'aapa pia p'anaupata perã. 48 Mamîda chi ak'õreerãpa iru mãgá unudak'ãri, p'era pùk'a p'aneejida. Mãpai chi nawepa mãgaji:
—Warra, ¿sãap'eda nãga oojima? aji. Taipa pù unuda–e pak'ãri, k'îsia p'ua jõnajida.
49 Mãpai Jesupa mãgaji:
—¿Sãap'eda mù jùrù p'anùma? aji. ¿K'awada–eta p'anùk'ã aji, mù Ak'õre tede ichita bait'ee?
50 Mamîda ãrapa k'awada–e paji ma pedee k'ãata jara k'inia baji.
51 Mãpai iru wãji ãra ome Nazaret p'uurudee. Mama ãra ome chok'ek'ee bapachi. Mamîda Mariapa irua ooda k'îra atuak'aa paji. Ichi t'ãridepai ma ne–inaa jõmaweda audú k'îsiapachi. 52 Mãgá Jesús wari wãpachi. Ichiaba k'îsia k'awaapùara wãpachi, Tachi Ak'õrepa iru pia ak'ù bada perã, eperãarãpa pida ichiaba.