Juan Bautistapa jarateeda
(Mateo 3.1-12; Marcos 1.1-8; Juan 1.19-28)
3
1 César Tiberio quince año rey bùde, ichi ek'ari bada Poncio Pilato Judea eujã ak'ùpari paji. Jõdee judiorã Tiberio ek'ari reyrãk'a p'anadap'edaarãpa eujã awara–awaraa ak'ùpachida. Herodepa Galilea eujã ak'ùpachi. Chi âpema Filipopa Iturea mãik'aapa Traconite eujã ak'ùpachi. Jõdee Lisaniapa Abilene eujã ak'ùpachi. 2 Anás mãik'aapa Caifás p'aareerã poro waibùarã paji. Maapai Tachi Ak'õrepa ichi pedee jara cheji Zacarías warra Juanmaa eujã pania wêe bùde. 3 Maap'eda Juanpa Tachi Ak'õre pedee jaratee nipapachi jõma Jordán tode. Jarateepachi eperãarãpa ichimaa poro choopidamerã ak'ùpidait'ee ãchia p'ek'au k'achia oopata oodaamaa p'anù mãik'aapa wãara Tachi Ak'õrede ijãa p'anù. Mãgá ijãadak'ãri, Tachi Ak'õrepa ãchia p'ek'au k'achia oopata wêpapii. 4 Mãga p'asaji Ak'õre pedee jarapari Isaiapa chonaarãweda jaradak'a:‘Eujã pania wêe bùde eperã bia bù: “O pi–ia oopatak'a poro waibùa chei naaweda, mãga pùk'a p'ek'au k'achia oo amáatù Tachi Waibùa chei naaweda. 5 Iru k'aurepa eujã joobai beeda jewedaa beeit'ee mãik'aapa ee nok'o jida jewedaak'oodariit'ee. O jõmaweda jîp'a beeit'ee mãik'aapa eujã mãu–idaa bù k'ak'ayaa beeit'ee. 6 Maapai jõmaarãpa k'awaadait'ee iru k'aurepa Ak'õrepa eperãarã k'aripait'ee atuanaadamerã.” ’(Isaías 40.3-5)
7 Juanpa mãgá jaratee bùde eperãarã chok'ara chejida irua poro choomerã. Mamîda Juanpa ãramaa mãgaji:
—¡Parã k'achia–idaa beerãdeepa uchiadap'edaarã! ¡Taamák'apù p'anù! ¿Poro choopi chejida–ek'ã, Tachi Ak'õre juapa mia k'iniada–e p'anadairã? 8 Mãga pùrã, p'ek'au k'achia oo amáatù mãik'aapa p'anapatáatù Tachi Ak'õrepa k'inia bùk'a. K'îsianáatù Tachi Ak'õrepa parã miapi–e pait'ee Abrahamdeepa uchiadap'edaa perã. Mùa jara bù: Na mãudeepa Tachi Ak'õrepa Abrahamdeepa uchiadap'edaarã oo atai. 9 Ara chaarapa nejõ bùùrù chauk'aa bù t'upeet'aapatak'a t'ùpùtaude bat'at'aadait'ee paa jõmerã, mãga pùk'a taarã–e Tachi Ak'õrepa jõpiit'ee parã, chi oodaamaa p'anapataarã irua k'inia bùk'a.
10 Mãga ûridak'ãri, eperãarãpa Juanmaa iidipachida:
—Mãgara, ¿k'ãata oodaipia bùma apachida, ak'ùpidait'ee tai Ak'õre ode nipapata?
11 Juanpa p'anauji:
—Chi p'aru omé iru bùpa aba chi wêe bùmaa teeipia bùda aji. Auk'a chik'o jedek'odaipia bùda aji, chi wêe beerã ome.
12 Cesar–it'ee impuesto p'epataarã ichiaba chejida poro choopide. Mãgajida:
—Tachi Jarateepari, ¿k'ãata oodaipia bùma ajida, ak'ùpidait'ee taipa p'ek'au k'achia oopata oo amaa k'inia p'anù?
13 Juanpa p'anauji:
—P'aapináatù Romadepemaarãpa jarapata impuesto ârù.
14 Soldaorãpa ichiaba iidijida:
—¿Mãgara taipárama? ajida. ¿K'ãata oodaipia bùma taipa ak'ùpidait'ee p'ek'au k'achia oopata oo amaa k'inia p'anù?
Juanpa p'anauji:
—Ichi k'inia chîara p'arat'a jãri atanáatù mãik'aapa seewa jaranáatù chîara k'achiade baaipidait'ee. K'ãiwee p'anapatáatù parãmaa p'arat'a p'aapata ome pãchi mimiapata pari.
15 Eperãarãpa Juanpa jarateeda ûridak'ãri, ãchi t'ãridepai k'îsia p'aneejida: “¿Juan Cristopaa ajida, Tachi Ak'õrepa pëida tachi rey pamerã?” 16 Mamîda Juanpa jõmaarãmaa mãgaji:
—Mùa wãara parã poro chooparida aji, paniapa. Mamîda eperã mù t'êe cheru mù k'ãyaara waibùara bù. Mùa iru chancla jida êraik'araa bù, iru k'ãyaara ek'ariara bairã. Irua eperãarã nãgá poro chooit'ee. Tachi Ak'õre Jaure ba chepiit'ee parã k'ap'ùade. Mamîda ichide ijãadak'aa beerã jõpiit'ee t'ùpùtaupa. 17 Ooit'ee trigo ewaparipa ooparik'a. Mãgùpa pala aneek'ãri, trigo ewada ùt'aa jira bat'apari, chi tau uchiamerã mãik'aapa nãupa chi e ãyaa ateemerã. Maap'eda ma trigo tau ùa bùpari chi trigo ùapatamãi. Mamîda chi e beeda t'ùpùtaude bat'at'aapari. Mãgà t'ùpùtau k'îik'aada aji.
18 Mãgá awaraa ûraa chok'ara ome, Juanpa jarateepachi Ak'õrepa pedee pia jara pëida. 19 Mamîda mãgá jaratee ni misa, ùtrùaji Romadepemaarãpa rey bùdap'edaa, Herodes. Mãga ooji Herodepa chi âpema wêra Herodías iru bada perã ichi wêrak'a mãik'aapa awaraa ne–inaa k'achia k'îra t'ãdoo oopachi perã. 20 Ma t'êepai Herodepa awaraa ne–inaa k'achia ooji. Juan carcelde t'ù nâbùpiji.
Jesús poro chooda
(Mateo 3.13-17; Marcos 1.9-11)
21 Mamîda aù naaweda, Juanpa at'ãri eperãarã poro choomaa bùde ichiaba Jesús poro chooji. Poro choopip'eda, Jesús ùt'aa t'âk'ãri, pajã ewadachi 22 mãik'aapa Tachi Ak'õre Jaure iru ârù palomak'a baai cheji. Mãga nùde ùt'ariipa Tachi Ak'õrepa jaraji:
—Pùda aji, mù Warra k'inia, mùa jùrùt'erada. Pùa mù t'ãri o–îapipari.
Jesucristo ëreerã t'â p'ãda
(Mateo 1.1-17)
23 Jesupa mãgá ne–inaa oo beek'ãri eperãarã taide, treinta año iru baji. Eperãarãpa jîp'a k'îsia p'anapachida iru José warra.
José ak'õre paji Elí.
24 Elí ak'õre paji Matat. Matat ak'õre paji Leví. Leví ak'õre paji Melquí. Melquí ak'õre paji Janay. Janay ak'õre paji José.
25 José ak'õre paji Matatías. Matatías ak'õre paji Amós. Amós ak'õre paji Nahúm. Nahúm ak'õre paji Eslí. Eslí ak'õre paji Nagay.
26 Nagay ak'õre paji Máat. Máat ak'õre paji Matatías. Matatías ak'õre paji Semeí. Semeí ak'õre paji Josec. Josec ak'õre paji Joiadá.
27 Joiadá ak'õre paji Johanán. Johanán ak'õre paji Resa. Resa ak'õre paji Zorobabel. Zorobabel ak'õre paji Salatiel. Salatiel ak'õre paji Neri.
28 Neri ak'õre paji Melquí. Melquí ak'õre paji Adí. Adí ak'õre paji Cosam. Cosam ak'õre paji Elmadam. Elmadam ak'õre paji Er.
29 Er ak'õre paji Jesús. Jesús ak'õre paji Eliezer. Eliezer ak'õre paji Jorín. Jorín ak'õre paji Matat.
30 Matat ak'õre paji Leví. Leví ak'õre paji Simeón. Simeón ak'õre paji Judá. Judá ak'õre paji José. José ak'õre paji Jonán. Jonán ak'õre paji Eliaquín.
31 Eliaquín ak'õre paji Meleá. Meleá ak'õre paji Mená. Mená ak'õre paji Matatá. Matatá ak'õre paji Natán.
32 Natán ak'õre paji David. David ak'õre paji Isaí. Isaí ak'õre paji Obed. Obed ak'õre paji Booz. Booz ak'õre paji Salmón. Salmón ak'õre paji Hajásón.
33 Hajásón ak'õre paji Aminadab. Aminadab ak'õre paji Admín. Admín ak'õre paji Arní. Arní ak'õre paji Jezrón. Jezrón ak'õre paji Fares. Fares ak'õre paji Judá.
34 Judá ak'õre paji Jacob. Jacob ak'õre paji Isaac. Isaac ak'õre paji Abraham. Abraham ak'õre paji Téraj. Téraj ak'õre paji Najor.
35 Najor ak'õre paji Serug. Serug ak'õre paji Ragau. Ragau ak'õre paji Péleg. Péleg ak'õre paji Éber. Éber ak'õre paji Selaj.
36 Selaj ak'õre paji Cainán. Cainán ak'õre paji Arfaxad. Arfaxad ak'õre paji Sem. Sem ak'õre paji Noé. Noé ak'õre paji Lamec.
37 Lamec ak'õre paji Matusalén. Matusalén ak'õre paji Enoc. Enoc ak'õre paji Jared. Jared ak'õre paji Malalel. Mahalaleel ak'õre paji Cainán.
38 Cainán ak'õre paji Enós. Enós ak'õre paji Set. Set ak'õre paji Adán mãik'aapa Adán ak'õre paji Tachi Ak'õre.