SAN JUAN
San Juanpa Pedee Pia P'ãda
Juan, Zebedeo warrapa na pedee pia p'ãji. Judío paji. Nipapachi Jesucristo ome. Na p'ãdade Juanpa jara bù Jesupa jarada mãik'aapa ooda, mak'ùara uchia–e bù awaraarãpa p'ãdade. Na p'ãdade chi Jesús k'õp'ãyo k'iniara iru bùda apachi. Jesús ome nipapachi perã pia k'awaji iru bapata. Na p'ãdade k'awapi k'inia baji k'aita paji Jesús; Tachi Ak'õre na eujãdee cheda. Jara bù Jesús pank'a bù; âdaa pùk'a bù; puertak'a bù; ovejaarã ak'ùparik'a bù; uva k'arrak'a bù; eperãarã chok'ai p'anapipari; piudap'edaarã chok'ai p'irabaipipari; Tachi Ak'õre o ak'ùpipari; wãarata jarapari; chi ichita bapari.
Naapùara Juanpa jara bù Jesús Tachi Ak'õre pedee, na p'ek'au eujãdee cheda (cap. 1.1-18). Jara bù Juan Bautistapa jarateeda mãik'aapa Jesupa k'õp'ãyoorã ûk'uru jùrùt'erada (cap. 1.19-51). Mamîda mak'ùara jara–e bù Jesús nipada Galilea eujãde. Ma k'ãyaara jara bù irua ooda mãik'aapa jarateeda Judea eujãde bak'ãri mãik'aapa judiorã fiesta awara–awaraade bak'ãri (caps. 2.1--10.42). Jara bù Jesupa Lázaro chok'ai p'irabaipida (cap. 11) mãik'aapa Mariapa Jesús bùùrù ârù k'erapa weeda (cap. 12.1-11). Ichiaba jara bù Jesús p'asada Jerusalendee wãk'ãri (cap. 12.12-50). Jara bù Jesupa jarada nek'ok'ãri chi k'õp'ãyoorã ome (caps. 13.1--14.14); irua jarateeda Tachi Ak'õre Jauredé (caps. 14.15--16.33) mãik'aapa irua ùt'aa t'âda ijãapataarã pari (cap. 17); iru jita atadap'edaa mãik'aapa ateedap'edaa poro waibùarã k'îrapite (caps. 18.1--19.16). Jara bù Jesús piuda mãik'aapa chok'ai p'irabaida (caps. 19.17--21.14). Juanpa t'êepai Pedrode p'ãda uchia–e awaraarãpa pedee pia p'ãdade (cap. 21.15-25). Maperã jara p'anù Juanpa pedee pia p'ãda awara uchiaji apemaarãpa p'ãdap'edaa k'ãyaara.