JHN 1

SAN JUAN

San Juanpa Pedee Pia P'ãda

Jesús na p'ek'au eujãdee cheda

1 Na p'ek'au eujã bai naaweda Jesucristo, Tachi Ak'õre Pedee apata, bapachi. Mãgà bapachi Tachi Ak'õre ome. Iru ichita Tachi Ak'õre bapari. 2 Tachi Ak'õre ome bapachi. 3 Iru k'ap'ùa pari Tachi Ak'õrepa ne–inaa jõmaweda ooji. Iru wêe Tachi Ak'õrepa ne–inaa maarepida oo–e paji. 4 Irua chok'ai bapipachi ne–inaa jõmaweda chok'ai bù. Âdaa pùk'a bapachi eperãarã t'ãide, ma k'aurepa eperãarãpa Tachi Ak'õre k'awapataadamerã. 5 At'ãri irua Tachi Ak'õre k'awapimaa bù eperãarãmaa. Apidaapa p'oyaa jarada–e irua mãga oonaamerã.

6 Bapachi eperã, t'âjarapatap'edaa Juan Bautista. 7 Tachi Ak'õrepa mãgà eperã jùrùt'eraji jaramerã ma âdaa pùk'a bùde, jõmaarãpa Ak'õrede ijãadamerã ma jarateeda k'aurepa. 8 Juan âdaa pùk'a ba–e paji. Jîp'a cheji jarateede 9 ma wãara âdaa pùk'a bù na p'ek'au eujãdee cheji, Tachi Ak'õre eperãarãmaa k'awapiit'ee.

10 Mãgà Pedee, Jesucristo ba cheji na p'ek'au eujãde, ichia eujã oodade. Mamîda na p'ek'au eujãdepemaarãpa k'awada–e paji iru Tachi Ak'õre Warra. 11 Cheji mîda ichi auk'aarã t'ãide, ãchia auteebaida–e paji. 12 Mamîda eperãarã ûk'uruurãpa iru auteebaijida mãik'aapa irude wãara ijãajida. Irua mãgùùrã Tachi Ak'õre warrarã papiji. 13 Mãgá Tachi Ak'õre warrarã padait'ee, mãgà eperãarã t'oda–e paji warra jîp'aarã t'opatak'a, eperãpa warra oo k'inia ooparik'a. Ma k'ãyaara Tachi Ak'õrépata mãgùùrã ichi warrarã papiji, irude ijãa p'aneedap'edaa perã.

14 Mãgà Pedee, Jesucristo Tachi Ak'õrepa pëida. T'oji eperã k'ap'ùade mãik'aapa tachi t'ãide bapachi. Iru Tachi Ak'õre Warra pada perã, Tachi Ak'õre k'îra wãree unupiji tachimaa. Eperãarã k'inia iru bapachi mãik'aapa Tachi Ak'õre wãarata ãchimaa k'awapipachi.

15 Juan Bautistapa k'awaji mãgà Pedee Tachi Ak'õrepa pëida. Mapa jarapachi:

—Nãgùde mùa jara baji jarak'ãri eperã mù t'êepai cheru mù k'ãyaara waibùara bù, mù t'oi naaweda iru bapachi perã.

16 Ma eperã t'ãri pia bapari tachi jõmaarã ome mãik'aapa tachi ichita k'aripapari. 17 Tachi Ak'õrepa ichi ûraa k'awapiji eperãarãmaa Moisés k'ap'ùa pari. Mamîda eperãarã k'inia iru baji mãik'aapa ichi wãarata k'awapiji ãramaa Jesucristo k'ap'ùa pari. 18 Eperã apidaapa Tachi Ak'õre unuda–e p'anù. Mamîda Jesucristo, iru Warra apai iru bù, iru ome auk'a bairã, @iru eperãarãmaa k'awapiji.

Juan Bautistapa Jesucristode jarada

(Mateo 3.11-12; Marcos 1.7-8; Lucas 3.15-17)

19 Judiorã poroorãpa Jerusalendeepa pëijida p'aareerã Levideepa uchiadap'edaarã ome, mãùrãpa Juanmaa iididamerã:

—¿Pù k'aima? ajida.

20 Juan Bautistapa wãarata p'anauji:

—Mù Tachi Ak'õrepa pëida–epù, eperãarã rey pamerã.

21 Mãpai iidijida:

—Mãgara, ¿pù Tachi Ak'õre pedee jarapari Eliak'ã? ajida.

—Mãga–eda aji.

Mamîda waya iidijida:

—¿Pù Tachi Ak'õre pedee jaraparik'ã ajida, tachia nù p'anù?

—Mãga–eda aji.

22 Mãpai mãgajida:

—Mãgara, ¿pù k'aima? Jarapáde ajida. Tai pëidap'edaarãmaa jaranadait'ee. ¿K'ãata jara pëiit'eema? ajida.

23 Juanpa p'anauji Tachi Ak'õre pedee jarapari Isaiapa chonaarãweda p'ãdade jara bùk'a:

—Mù ni eujã pania wêe bùde mãik'aapa bia bù:

‘O pi–ia oopatak'a poro waibùa chei naaweda, mãga pùk'a p'ek'au k'achia oo amáatù Tachi Waibùa chei naaweda.’ (Isaías 40.3)

24 Ma fariseorãpa pëidap'edaarãpa 25 Juanmaa iidijida:

—Pù Tachi Ak'õrepa pëida–e pùrã eperãarã rey pamerã, Elia–e pùrã wa Tachi Ak'õre pedee jarapari–e pùrã, ¿k'ãare–it'ee eperãarã poro chooparima? ajida.

26 Juanpa mãgaji:

—Mùa parã poro choopari paniapa. Mamîda pãchi t'ãide bùda aji, awaraa eperã, parãpa k'awada–e p'anù. 27 Mãgà mù t'êepai parãmaa jaratee cheru. Iru mù k'ãyaara waibùara bù. Mùa iru chancla jida êraik'araa bùda aji, mù iru k'ãyaara ek'ariara bairã.

28 Mãga p'asaji Betania p'uurude Jordán to k'îraik'a eere, Juanpa poro choomaa badamãi.

Jesús Tachi Ak'õrepa pëida eperãarã pari piumerã

29 Aù norema Juanpa unuk'ãri Jesús ichi k'ait'a cheru, mãgaji:

—¡Ak'àtù! Nãgà eperã oveja chak'ek'a bù, Tachi Ak'õrepa pëida @perã piumerã eperãarã pari. Nãgùpa wêpapiit'ee eperãarãpa p'ek'au k'achia oopata. 30 Nãgà eperãde mùa pedee baji nãga jarak'ãri: “Eperã mù t'êepai cheru mù k'ãyaara waibùara bù, iru mù t'oi naaweda bapachi perã.” 31 Aù naaweda mùa pida k'awa–e baji iru Tachi Ak'õrepa pëida tachi k'aripamerã. Mamîda ma–it'ee mùa eperãarã poro choo cheji; mãgá israelitaarãpa iru k'awadamerã.

32 Mãpai Juanpa jaraji ichia unuda:

—Mùa Tachi Ak'õre Jaure unuji iru ârù palomak'a baai chek'ãri. 33 Mùa k'awa–e bak'aji iru Tachi Ak'õre Warra. Mamîda aù naaweda mù pëidapa eperãarã paniapa poro choomerã, mùmaa jaraji: “Pùa unuit'eeda aji, mù Jaure baai cheru eperã ârù, ichita iru ome bapariit'ee. Mãgà eperãpa mù Jaure ba chepiit'eeda aji, eperãarã ome.” 34 Tachi Ak'õrepa jaradak'a mùa mãga unuji. Maperãpù mùa parãmaa jara bù: Nãgà Jesús, Tachi Ak'õre Warra.

Jesús ome nipapatap'edaarã

35 Aù norema Juan Bautista waya mama baji chi k'õp'ãyoorã omeerã ome. 36 Jesús wãyaa wã unuk'ãri, mãgaji:

—¡Ak'àtù! Jãgùta chi oveja chak'ek'a bù, Tachi Ak'õrepa pëida.

37 Chi k'õp'ãyo omeerãpa mãga ûridak'ãri, Jesús t'êe wãjida. 38 Jesús ãpùtee p'ùrrabaik'ãri, unuji ichi t'êe cheruta mãik'aapa mãgaji:

—¿K'ãata k'inia p'anùma? aji.

Mãgajida:

—Rabuni (jara k'inia bù Tachi Jarateepari), ¿pù, sãma baparima? ajida.

39 Jesupa p'anauji:

—Chétù k'awaadamerã.

Mãgá wãjida iru baparimaa mãik'aapa ma ewate p'aneejida iru ome k'ewara las cuatro pada perã.

40 K'õp'ãyo abaapa Juan pedee ûrida mãik'aapa Jesús t'êe wãda Andrés paji. Iru Simón Pedro âpema paji. 41 Mãgà Jesús ome bap'eda, ne–inaa awaraa ooi naaweda, isapai wãji chi âpema jùrùde. Unu atak'ãri, mãgaji:

—Mesías unujidada aji. (Mãgà t'â jara k'inia bù Cristo, Tachi Ak'õrepa pëida eperãarã rey pamerã.)

42 Mãpai Andrepa chi âpema aneeji Jesumaa. Jesupa iru unuk'ãri, mãgaji:

—Pù Simón, Juan warra. Mamîda pù t'âjaradait'eeda aji, Cefas. (Mãgà t'â griego pedeede jara k'inia bù Pedro.)

Jesupa Felipe Natanael ome jùrùt'erada

43 Aù norema Jesús wãji Galilea eujãdee. Mama unuji eperã t'âjarapatap'edaa Felipe. Mãpai mãgaji:

—Mù ome nipaparíiji.

44 Mãgà Felipe, Andrés mãik'aapa Pedro Betsaida p'uurudepemaarã paji. 45 Felipepa Natanael jùrùnaji mãik'aapa unu atak'ãri, mãgaji:

—Unujidada aji, eperã Moisepa jarada Tachi Ak'õre Ûraa p'ãdade. Mãgà ichiaba Tachi Ak'õre pedee jarapataarãpa chonaarãweda ãchi p'ãdap'edaade jaradap'edaa. Mãgà eperã José warra; t'âjarapata Jesús Nazaretdepema.

46 Natanaelpa mãgaji:

—¡Nazaretdepema! ¿Nazaret p'uurudeepa eperã pia uchiaik'ã? aji.

Felipepa mãgaji:

—Wãdáma aji, ak'ùde.

47 Jesupa Natanael ichi k'ait'a cheru unuk'ãri, mãgaji:

—Na Israelita wãara t'ãri pia bapari. Apida k'ûrak'aa.

48 Natanaelpa Jesumaa iidiji:

—¿Sãga pùa mù k'awa bùma? aji.

Jesupa p'anauji:

—Felipepa pù atanai naaweda, mùa pù unuji higuera k'arra ek'ari.

49 Mãpai Natanaelpa mãgaji:

—Tachi Jarateepari, pù Tachi Ak'õre Warra. Pù israelitaarã Rey, chi cheit'ee bada.

50 Jesupa mãgaji:

—¿Ijãa bù–ek'ã aji, mùa jarada perã pù unuji ma pak'uru ek'ari? Pùa unuit'ee ne–inaa awara ma k'ãyaara pi–iara. 51 Mùa wãarata jararu. Parãpa unudait'ee Tachi Ak'õre eujã ewaraa k'obù mãik'aapa angeleerã ùt'aa wãruta mãik'aapa edaa cheruta mù, chi Eperã Ak'õre Truadepema, k'aripade.