Caná p'uurude miak'ãidak'ãri, fiesta oodap'edaa
2
1 Natanael ome pedeep'eda, k'ãima õpeemaa miak'ãipata fiesta oojida Caná p'uurude. Mãgà p'uuru Galilea eujãde bù. Jesús nawe mama baji. 2 Jesús chi k'õp'ãyoorã ome ichiaba t'â pëijida chedamerã ma fiestade. 3 Mama p'anùde vino jõdachi. Maperã Jesús nawepa mãgaji:—Vino jõdachida aji.
4 Mãpai Jesupa mãgaji:
—Nawe, ¿sãap'eda pùa mùmaa mãga jara bùma? aji. Waide ewari pa–eeta mùa Ak'õre jua ak'ùpimerã.
5 Mãpai chi nawepa mãgaji vino jedepataarãmaa:
—Óotù jõma irua jara bùk'a.
6 Mama bainâ p'anajida chok'o seis, mãudee ooda. Judiorãpa mãgee chok'o iru p'anapachida aùde pania t'ùdait'ee. Mãgá sùùdai ãchi jua, bùùrù maa–e pùrã net'aa Tachi Ak'õre Ûraa p'ãdade jaradak'a. Chok'o abaade cincuenta wa setenta litro araapachi. 7 Jesupa vino jedepataarãmaa mãgaji:
—Paniapa na chok'o ipuruk'óotù.
—Ârá ma–ãri joi atadapáde aji, mãik'aapa teepáde aji, na fiesta chiparimaa.
Mãga oojida. 9 Ma fiesta chiparipa pania vino padai bada tok'ãri, k'awa–e paji sãmãik'aapa uchiaji ma vino. Ma vino jedepataarãpapai k'awajida, ãchia ma vino chok'odeepa joidap'edaa perã. Mãgá top'eda, ma fiesta chiparipa chi ùmùk'îra miak'ãiit'ee bada t'â ataji 10 mãik'aapa mãgaji:
—Fiesta oodak'ãri, jõmaarãpa naapùara vino piara bùta jedepata. Maap'eda, waibùa to p'anadap'eda, jedepata chi vino mak'ùara pia–e bù. Mamîda pùa ùa nâbùjida aji, chi vino piara bùta âraweda todamerã.
11 @Mãgà ooda Jesupa Galilea eujãdepema Caná p'uurude paji irua naapùara ooda eperãarãpa p'oyaa oodak'aa ãchi juadoopa. Mãga ook'ãri, unupiji ichi wãara Tachi Ak'õrepa pëida. Ma ooda unudak'ãri, chi k'õp'ãyoorãpa audupùara irude ijãa p'aneejida.
12 Ma t'êepai Jesús wãji Capernaum p'uurudee chi nawe ome, chi âpemaarã ome mãik'aapa chi k'õp'ãyoorã ome. K'ãima chok'ara–ee mama p'anajida.
Jesupa ne–inaa netopataarã jërek'ooda Tachi Ak'õre tedeepa
(Mateo 21.12-13; Marcos 11.15-18; Lucas 19.45-46)
13 Judiorã Pascua fiesta ârù pa wãda perã, Jesús wãji Jerusalendee. 14 Mama Tachi Ak'õre te ãuk'idaa t'ùak'au bùde ununaji p'ak'a netopataarã, oveja netopataarã mãik'aapa paloma netopataarã. Ichiaba unuji p'arat'a tau t'erabaipataarã mama su–ak'ù p'anù. 15 Mãga unuk'ãri, Jesupa soo oo ataji mãik'aapa ma jõmaweda taawaa jërek'ooji ãchi p'ak'a, oveja ome. Ma p'arat'a tau t'erabaipataarã mesa eujãde sîa bat'ak'oop'eda, ãchi p'arat'a eujãde p'ok'ooji 16 mãik'aapa paloma netopataarãmaa mãgaji:
—¡Pãchi net'aa atéetù namãik'aapa! ¡Mù Ak'õre te net'aa netopata tek'a papináatù!
17 Jesupa mãga oo bùde chi k'õp'ãyoorãpa k'irãpajida Tachi Ak'õre Ûraa p'ãdade jara bù:
‘Mùa pù te k'inia iru bapari perã, mù peet'aadait'ee.’ (Salmos 69.9a)
18 Mãpai judiorã poroorã, arii p'anadap'edaarãpa mãgajida Jesumaa:
—Wãara Tachi Ak'õrepa nãga oopiru pùrã pùmaa, ¿k'ãata ooit'eema ajida, taipa ijãadamerã wãara Ak'õrepa pù pëida?
19 Jesupa p'anauji:
—Na te t'eet'aaruta pùrã, ewari õpeemaa mùa waya baik'o bùit'eeda aji.
20 Mãpai judiorãpa mãgajida:
—Cuarenta y seis año mimiajidada ajida, na te oodait'ee. ¿T'eep'eda pùa ewari õpeede baik'o bùit'eek'ã? ajida.
21 Mamîda Jesupa “na te” ak'ãri, jara k'inia baji ichi k'ap'ùa. 22 Mapa aù t'êepai, iru piup'eda, chok'ai p'irabaik'ãri, chi k'õp'ãyoorãpa k'irãpajida irua ma ewate jarada. Mãpai wãara ijãajida Tachi Ak'õre Ûraa p'ãdade jarada mãik'aapa Jesupa jarada.
Jesupa jõmaarã t'ãri k'awapari
23 Jesús Jerusalende bùde Pascua fiesta wãyaaru misa, eperãarã chok'araarãpa irude ijãajida, unudak'ãri irua ne–inaa oomaa bù eperãarãpa p'oyaa oodak'aa ãchi juadoopa. 24 Mamîda Jesupa k'awaji wãara ijãada–e p'anajida, ãchi t'ãri pia k'awada perã. 25 Faltak'aa paji apidaapa eperãarã k'îsia k'awaapidamerã irumaa, irua eperãarã t'ãri k'awa bada perã.