HECHOS
Jesucristopa Jùrùt'eradaarãpa Oodap'edaa
Tachi Ak'õrepa jarada ichi Jaure pëiit'ee
1
1 Teófilo, naapùara k'art'a p'ãdade pùmaa mùa p'ãji Jesupa ne–inaa ooda mãik'aapa jarateeda ùt'aa wãrumaa. 2 Wãi naaweda, Ak'õre Jaure k'ap'ùa pari jaraji ichia jùrùt'eradaarãmaa k'ãata oopataadait'ee. 3 Piuda t'êepai chi k'õp'ãyoorãmaa cheji mãik'aapa unupiji wãara ichi chok'ai bù. K'ãima cuarenta wãyaaru misa, ichi k'ap'ùa unupipachi mãik'aapa jarateepachi Tachi Ak'õrepa oopi k'inia bù ichide ijãapataarãmaa.4 Ewari aba chi k'õp'ãyoorã ome bak'ãri, mãgaji:
—Wãnaadapáde aji, Jerusalendeepa awara ãyaa. Nùdapáde aji, mù Ak'õrepa jarada oorumaa, mùa parãmaa jaradak'a ooit'ee perã. 5 Juan Bautistapaa poro choopachi paniapa. Mamîda taarã–e Tachi Ak'õrepa ichi Jaure ba chepiit'ee parã k'ap'ùade.
Jesús ùt'aa wãda
6 Ma t'êepai Olivo Eede p'anadak'ãri, Jesús k'õp'ãyoorãpa iidijida:
—Tachi Waibùa, ¿âraweda israelitaarã p'uuru waibùa papiit'eek'ã ajida, aù naawedapemak'a, chîara jua ek'ari p'anada–ee?
7 Irua p'anauji:
—Parãpa k'awadaik'araa bùda aji, sãapai Tachi Ak'õrepa ne–inaa ooit'ee, parã–it'ee–e perã. Irua aupaita mãgee net'aa k'awa bù. 8 Mamîda Tachi Ak'õre Jaure parã ome ba chek'ãri, ichia k'aripait'ee nejõmaata oodamerã Ak'õrepa oopi k'inia bùk'a. K'awapiit'eeda aji, jõmaweda mùa ooda eperãarã k'aripait'ee, parãpa jarateenadamerã Jerusalén p'uurude, Judea eujãde, Samaria eujãde, awaraa eujã t'ùmà beede paara.
9 Mãga jarap'eda, Tachi Ak'õrepa iru ùt'aa ateeji. Ãchia ak'ù jõnùde jâararade t'îudachi mãik'aapa waa unuda–e paji.
10 Mãgá ùt'aa ak'ù jõnù misa, angeleerã omé ãchi ik'aawa bainâ p'ana chejida. P'aru t'o–t'oo jâ p'anajida. 11 Mãùrãpa mãgajida:
—Galilea pidaarã, ¿sãap'eda ùt'aa ak'ù jõnùma? ajida. Jãgà Jesús parã ome bada mãik'aapa ùt'aa wãda waya cheit'eeda ajida, parãpa iru ùt'aa wãru unudap'edaak'a.
Matías jùrùt'eradap'edaa Judas Iscariote pari
12 Maap'eda Olivo Eedeepa Jesús ome nipapatap'edaarã waya chejida Jerusalendee. Âipata ewate paji mãik'aapa ãchi ûraade jara bù ma ewate t'ùmà wãdaik'araa bù. Mamîda t'ùmùa–e bada perã, chejida. 13 P'uurude panadak'ãri, wãjida ãchi p'anapatap'edaamaa ùt'ùpema pisode. Ma chedap'edaarã paji Pedro, Juan, Santiago, Andrés, Felipe, Tomás, Bartolomé, Mateo, Alfeo warra Santiago, Simón Celote apatap'edaa mãik'aapa Santiago warra Judas. 14 Mama ãchi ùt'aa t'âpachida Jesús âpemaarã ome mãik'aapa Jesús nawe María ome, ichiaba awaraa wêraarã ome.
15 Ewari aba Jesucristode ijãapataarã ciento veinte see nâbùde Pedro bainâ beeji mãik'aapa mãgaji:
16 —Âpemaarã Cristo k'aurepa, chonaarãweda Ak'õre Jaurepa jarajida aji, Rey David it'aideepa eperã abaapa Jesús peepiit'ee. Mãga jara bù Tachi Ak'õre Ûraa p'ãdade. Ârá Davidpa jaradak'a uchiaji Judas ome. 17 Judas tachi k'õp'ãyo paji mãik'aapa tachi ome auk'a mimiapachi. 18 Mamîda k'achia ooda pari p'arat'a p'aadap'edaapa irua eujã neto ataji. Mama iru baaidachi mãik'aapa chi jâsi chedachi. 19 Jerusalende p'anapatap'edaarãpa iru piuda k'awaadak'ãri, ma eujã t'â bùjida Hacéldama, ãchi pedeede jara k'inia bù “Waa Eujã”. 20 Mãga p'asada perã Judas ome, awaraa jùrùdaipia bù iru mimia oomerã. Mãga oodaipia bù Tachi Ak'õre Ûraa p'ãdadepema Salmode jara bairã:
‘Pù tede apida p'anada–e. Mapa ichita te tuma bait'ee.’ (Salmos 69.25)
mãik'aapa awara ãi ichiaba jara bairã:
‘Awaraapa pù mimia atait'ee.’ (Salmos 109.8)
21 +Nama p'anùda aji, eperãarã tachi ome nipapatap'edaarã, Jesús tachi ome niparu weda. 22 Juan Bautistapa iru poro choodak'ãriipa ùt'aa wãrumaa mãgá nipapachida. Judas pari ãchidepema jùrùdaipia bù aba tachi ome auk'a Jesús unuda chok'ai p'irabaip'eda.
23 Mãpai madepema omé jùrùjida aba jùrùt'eradait'ee. Aba paji José. Mãgà ichiaba t'âjarapachida Barsabás, maa–e pùrã Justo. Chi apema t'âjarapachida Matías. 24 Ma omé jùrùdap'eda, ùt'aa t'âjida:
—Tachi Waibùa, pùa jõmaarã t'ãri k'awa bùda ajida. Maperã k'awapíji na omeedepema k'aita pùa k'inia bù. 25 Mãgùpa pù ûraa jarateenait'eeda ajida, Judas pari, irua k'achia ooda k'aurepa ichi wãit'ee padamaa wãda perã.
26 Mãga ùt'aa t'âdap'eda, suerte jemenejida jùrùt'eradait'ee. Mãpai Matiata uchiaji. Ma ewate weda apemaarã once Cristopa jùrùt'eradaarã ome mimiamaa beeji.