Tachi Ak'õre Jaure cheda
2
1 Jerusalén p'uurude Pentecostés fiesta ewate pak'ãri, jõmaweda Cristode ijãapataarã abaamaa see nâbaji. 2 Mãga nùde nãumia pururua jîwaaparik'a ûrijida ùt'ariipa cheru ãchimaa. 3 Mãpai unujida t'ùpùtauk'a jêrajêraa cheru ãchi ârù. Maap'eda ãchi chaachaa ârù urua jêrajêraa nâbeeji. 4 Jõmaweda Ak'õre Jaure ome p'aneejida mãik'aapa Ak'õre Jaurepa pedeepiji ichia k'inia badak'a. Pedeepachida ãchia aù naaweda k'awada–e p'anadap'edaa pedeede.5 Maapai Jerusalende p'anajida judiorã Tachi Ak'õrede ijãapataarã fiesta–it'ee chedap'edaarã awara ãiipa. 6 Ãchia mãgà nãu pururua jîwaaparik'a ûridak'ãri, jõmaweda seedachida ma ciento veinte ijãapataarã p'anadap'edaamãi. K'awadak'aa paji k'ãata k'îsiadai, ûripachida perã ãchi t'odap'edaa pedeede. 7 Mapa ãchi ak'ùtrua para beeji mãik'aapa mãgapachida:
—¿Jõmaweda na eperãarã pedee para bù Galileadepemaarã–ek'ã? 8 ¿Sãgapù k'îra t'ãdoo pedee para bùma ajida, eperãarã nama para bù pedee chaa? 9 Nama eperãarã p'anù Partia, Media, Elam, Mesopotamia, Judea, Capadocia, Ponto mãik'aapa Ásia eujãdepemaarã. 10 Ma awara chejida Frigiadepemaarã, Panfiliadepemaarã, Egiptodepemaarã, ichiaba Libiadepemaarã Cirene p'uuru k'ait'a p'anapataarã. Ichiaba Roma p'uurudepemaarã ûk'uru chejida. 11 Judiorã ûk'uru mãga t'odap'edaa perã mãik'aapa ûk'uru judiorã pak'oodaidaarã, judiorã ûraade ijãadap'edaa perã. Ichiaba chejida Creta isladepemaarã mãik'aapa Arabia eujãdepemaarã. Nãgùùrã Galilea eujãdepemaarã mîda, tachi chaachaa t'odap'edaa pedeede tachia ûri p'anùda ajida. Ãchia pedee para bùda ajida, jaradait'ee Tachi Ak'õrepa ne–inaa pia ooda.
12 Mãgá ãchi t'odap'edaa pedeede ûridap'edaa perã, jõmaarãta ak'ùtrua para beeji mãik'aapa k'awadak'aa paji k'ãata k'îsiadai. Ãchi pitapai mãgapachida:
—Na ¿k'ãata jara k'inia bùma? apachida.
13 Mamîda ûk'uru, chîara oo k'iniapa, mãgapachida:
—¡Vinopata piu para bù! ¡Mapa pariatua pedee p'anùda! apachida.
Pedropa jarada Jerusalende p'anadap'edaarãmaa
14 Mãpai Pedro, ùt'a ak'ùnâ beep'eda chi k'õp'ãyoorã once ome, golpe pedeeji:
—Tachi auk'aarã mãik'aapa jõmaweda nama Jerusalende p'anùùrã, mùa jararu pia ûrítù. 15 At'ãri tap'eda nâbairã tai vinopa piuda–e p'anùda aji, parãpa k'îsia p'anùk'a. Parãpa pia k'awa p'anù tai judiorã tap'edaweda todak'aa. 16 Parãpa nama unu p'anù chonaarãwedapema Ak'õre pedee jarapari Joelpa nãga jaradak'a:
17 ‘Tachi Ak'õrepa jara bù: Na ewari na eujã jõi naaweda, eperãarã chok'araarãmaa mù Jaure pëiit'eeda aji. Parã warrarã mãik'aapa parã k'aurãpa jaradait'ee mùa jarapiruk'a. K'ûtrãarãpa k'ãimok'araa pùk'a bùde mùa ooru unudait'ee mãik'aapa chonaarã k'ãimok'araadait'ee mù ome. 18 Wãara, maapai mùa oopi bùk'a oopataarãmaa mù Jaure pëiit'ee; ùmùk'îraarãmaa, wêraarãmaa auk'a. Mùa ooru ãrapa jarapataadait'ee. 19 Pajãde mãik'aapa eujãde ne–inaa eperãarãpa waide unudak'aa unupiit'ee: waa, t'ùpùtau mãik'aapa nari jârak'awaa nâbù. 20 Ak'õrejîru k'îidariit'ee mãik'aapa atane k'îra p'oree waak'a padariit'ee. Mãgá pait'ee Ak'õre ewari waibùa ewate, na eujã jõi naaweda. 21 Mamîda aù naaweda Tachi Ak'õrepa ichimaa chupùria iidirutaarã k'aripa atait'eeda aji, atuanaadamerã.’(Joel 2.28-32)
22 Mãpai Pedropa mãgaji:
—K'awa p'anùda aji, Joelpa jaradak'a wãara uchiaru idi, Tachi Ak'õrepa ichi Jaure taimaa pëida perã. Israelitaarã, ûrítù mùa jararu. Tachi Ak'õrepa Jesús Nazaretdepema pëiji tachi t'ãide. Mãga k'awa p'anù Tachi Ak'õrepa irumaa ne–inaa eperãarãpa p'oyaa oodak'aa oopipachi perã. 23 Mamîda Tachi Ak'õrepa k'îsia iru badak'a, parãpa iru jita atadachida, maap'eda ijãadak'aa beerãmaa peepijida. Mãùrãpa kurusode baijira bùjida mama piumerã. 24 Mamîda Tachi Ak'õrepa chok'ai p'irabai ataji. Mãgá chok'ai p'irabai atada perã, waa piu–e; ichita chok'ai bait'ee. 25 Chonaarãweda Tachi Ak'õrepa Jesús ome ooit'ee bada jaraji Rey David it'aideepa:
‘Ichita mù Ak'õre Waibùa unupachida aji, mù k'îrapite. Ichi mù ome bairã, maarepida mù waawee–e. 26 Mapa mù t'ãri o–îa nâbù, mãik'aapa k'ari k'inia bù, k'awa bairã Tachi Ak'õrepa mù k'aripapari. 27 Ak'õre, pùa mù k'ap'ùa beraupi–e pait'ee mù ùarutamãi, mùa oopari perã pùa oopi bùk'a. 28 Ak'õre eujãdee wãpari o mùmaa ak'ùpiji. Mapa mù pù k'îrapite o–îa bait'eeda’ aji. (Salmos 16.8-11)
29 Maap'eda Pedropa mãgaji:
—Tachi auk'aarã nama see nâbù, ûrítù. Tachi chonaarãwedapema Rey David jai–idaaji mãik'aapa ùajida. Iru k'ap'ùa at'ãri jãùrade bù tachi t'ãide. 30 K'awa p'anù David chok'ai bak'ãri, Ak'õre pedee jarapari paji. Mapa irua k'awa baji Tachi Ak'õrepa jarada irumaa, irudeepa rey uchiapiit'ee.a 31 Mãgá, wãara Davidpa unu pùk'aji mãik'aapa jaraji sãga Cristo p'irabaiit'ee iru ùadap'edaamãiipa mãik'aapa iru k'ap'ùa berau–e pait'ee.b 32 K'awa p'anù na pedee Jesudeta jara bù, Tachi Ak'õrepa iru p'irabai atada perã mãik'aapa taipa unudap'edaa perã. 33 Tachi Ak'õrepa iru ùt'aa ateeji ichi juaraare ak'ù banamerã. Maap'eda ichia jaradak'a ichi Jaure teeji Jesumaa, irua pëimerã irude ijãapataarãmaa. Mãgùta parãpa et'ewa unujida mãik'aapa ûrijida. 34 Tachi Ak'õrepa Rey David k'ap'ùa piuda chok'ai p'irabaipi–e paji ùt'aa ateeit'ee. Mamîda Davidpa jaraji:
‘Tachi Ak'õrepa jaraji Tachi Waibùamaa: “Pù mù ome auk'a waibùa bairã, su–ak'ù beepáde aji, mù juaraare, 35 mùa pù k'îra unuamaa iru p'anapataarã p'oyaaru misa.” ’ (Salmos 110.1)
36 +Israelitaarã, pia k'awáatù mãgà Jesús parãpa kurusode peepidap'edaa Tachi Ak'õrepa Tachi Waibùa papiji. Iruta Tachi Ak'õrepa pëijida aji, tachi rey pamerã.
37 Mãga ûridak'ãri, arii p'anadap'edaarã k'îsia p'uadachida. Mapa iidijida Pedromaa mãik'aapa chi k'õp'ãyoorãmaa:
—¿Taipa k'ãata oodayama? ajida.
38 Pedropa p'anauji:
—P'ek'au k'achia oo amáatù, Tachi Ak'õrepa parã p'ek'au k'achia wêpapik'oomerã mãik'aapa Jesucristo t'âde poro choopítù. Mãga ooruta pùrã, Ak'õrepa ichi Jaure pëiit'ee parã ome bapariimerã. 39 Mãgà jarada parã–it'ee aupai–eda aji; ichiaba pãchi warrarã–it'ee mãik'aapa t'ùmà p'anùùrã–it'ee; pia jarait'eera, Tachi Ak'õre Waibùapa ichi odee atee k'inia bùùrã–it'ee.
40 Mãgà pedee jõma jarap'eda, Pedropa ûraaji:
—P'ananáatù Jesús peedap'edaarãk'a; jîp'a ijåatù mãik'aapa óotù Tachi Ak'õrepa oopi bùk'a.
41 Ma ewateweda Pedro pedee ijãadap'edaarãpa poro choopijida mãik'aapa apemaarã Cristode ijãapataarã ome t'îujida. Ma ijãadap'edaarã Pedro k'aurepa eperãarã tres mil paji. 42 Mamãik'aapa ãchia ûri k'inia p'anapachida Cristopa jùrùt'eradaarãpa jarateepata mãik'aapa jedepachida ãchia ne–inaa iru bee. Ichiaba jõmaweda cheepurupachida ùt'aa t'âdait'ee mãik'aapa ne–inaa jedek'odait'ee, mãgá k'irãpadait'ee Cristo piuda ãchi pari.
Chi naa ijãadap'edaarã
43 Maapai eperãarã p'era pùk'a para bapachi, Tachi Ak'õrepa oopipachi perã Cristopa jùrùt'eradaarãmaa ne–inaa eperãarãpa p'oyaa oodak'aa. 44 Ma awara Cristode ijãapataarã chik'inia para bapachi mãik'aapa chi wêe beerãmaa ãchi ne–inaa jedepachida. 45 Pia jarait'eera, netopachida ãchi net'aa iru p'anù mãik'aapa ma p'arat'a t'oopachida teedait'ee chi wêe beerãmaa. 46 Ewari chaa cheepurupachida Tachi Ak'õre tede ùt'aa t'âdait'ee mãik'aapa t'ãri o–îapa ne–inaa jedek'opachida ãchi tede. 47 Ak'õremaa ùt'aa t'âpachida jaradait'ee iru t'ãri pia bù. Jerusalén pidaarãpa pia pedeepachida ãra ãpùte. Maperã ewari chaa chok'araara o k'achiadeepa uchiapachida ãchi k'aurepa.