Pedropa eperã chiwa bù jùpada
3
1 Ewari aba Pedro Juan ome wãjida Tachi Ak'õre tedee a las tres, ma hora judiorã ùt'aa t'âpatap'edaa hora pada perã. 2 Mama Tachi Ak'õre tede baji eperã chiwa bù, ichi t'oruweda. Ewari chaa eperãarãpa mãgà ateepachida mãik'aapa bùnapachida Ak'õre tede chi T'îupata Pi–ia apatamãi, p'arat'a iidipariimerã chi mama t'îurutaarãmaa. 3 Mãgà eperãpa unuk'ãri Pedro mãik'aapa Juan Ak'õre tede t'îu wãda, p'arat'a iidiji. 4 Mãpai ãchia ak'ùjida irumaa mãik'aapa Pedropa mãgaji:—Taimaa ak'ùpáde aji.
—Mùa wêe bùda aji, p'arat'a, nêe jida. Mamîda mùa pù k'aripait'ee. Jesucristo Nazaretdepemapa mùmaa nãga oopi bairã, iru t'âde mùa jararu: p'irabáiji mãik'aapa wåji.
7 Mãga jararuta, Pedropa juaraarepema juade jitap'eda, p'irabai ataji. Aramata ma chiwa bada bùùrù pia beeji 8 mãik'aapa p'inajâtù bainâ beeji. Maap'eda p'ùrrùa beeji. Ma t'êepai ichi bùùrùpa t'îuji Ak'õre tede ãchi ome. Jâtùjâtùa wãji mãik'aapa o–îapa ùt'aa t'â wãji Ak'õremaa. 9 Mãga unudak'ãri, jõmaweda arii p'anadap'edaarã 10 p'era pùk'a para beeji. Mãgá p'anajida aù naaweda ãchia unupatap'edaa perã ma eperã su–ak'ù bù p'arat'a iidimaa Ak'õre tede, chi T'îupata Pi–ia apatamãi.
Pedropa jarada Tachi Ak'õre tede p'anadap'edaarãmaa
11 Mãgà chiwa bada jùpa beeda perã, Pedro mãik'aapa Juan ik'aawaapa ãyaa wãk'aa paji. Ãchi p'anajida Tachi Ak'õre te ãuk'idaa, Salomón Pórtico apatap'edaamãi. Ãchimaa eperãarã jõmaweda p'era pùk'a p'ira erreujida. 12 Pedropa mãga unuk'ãri, mãgaji:
—Israelitaarã, ¿sãap'eda parã p'era para bùma? aji. ¿Sãap'eda tai k'îra ak'ù jõnùma? ¿Parãpa k'îsia p'anùk'ã taipa tachi juadoopa na eperã jùpajida? 13 Tachi chonaarã Abraham, Isaac mãik'aapa Jacob ijãadap'edaa Ak'õre Waibùapa ichi Warra Jesús waibùara papiji jõmaarã k'ãyaara, ichia oopi badak'a oopachi perã. Mamîda parãpa mãgà Jesús jita atadap'eda, charraarãmaa teenajida. Maap'eda Pilatopa uchia pëiit'ee pak'ãri, parãpa k'iniada–e paji. 14 Eperã t'ãri pia bù p'ek'au k'achia wêe k'ena pëidai k'ãyaara, chîara peeparita parãpa uchiapit'aajida. 15 Mãgá peepit'aajida Tachi Ak'õre o ak'ùpipari. Mamîda parãpa peepidap'eda, Tachi Ak'õrepa chok'ai p'irabai ataji. Taipa mãga unujida tachi taupa. 16 Nãgà eperã jùpa beeji ichia ijãada perã Jesupa jùpai. Maperãpù jùpa beeji, parãpa unu p'anùk'a. Jesús jõmaarã k'ãyaara waibùara bairã, k'ayaa beerã jùpai.
17 +Mùchi auk'aarã, mùa k'awa bù pãchi poroorãpa mãik'aapa parãpa Jesús peepidak'ãri, k'awada–e paji iru Tachi Ak'õrepa pëida tachi k'aripamerã. 18 Mamîda parãpa mãga oo p'anùùpa Tachi Ak'õrepa uchiapiji ichia jaradak'a, ichi pedee jarapataarã it'aideepa: ichia pëida piuit'ee. 19 Mãpai Tachi Ak'õrepa k'îsia iru badade pia k'îsiadap'eda, k'achia oo amáatù mãik'aapa irude ijåatù, irua pãchi p'ek'au k'achia wêpapik'oomerã. 20 Mãga ooruta pùrã, Ak'õrepa parã k'ãiwee p'anapiit'ee mãik'aapa pëiit'ee Jesucristo, ichia jùrùt'erada parã k'aripapariimerã. 21 Mamîda Jesús at'ãri Ak'õre eujãde bait'ee, Ak'õrepa ne–inaa jõmaweda chiwidi pùk'a ooru misa, chonaarãweda ichi pedee jarapataarã it'aideepa jaradap'edaak'a. 22 Maapai Moisepa tachi chonaarãmaa mãgaji:
‘Ak'õrepa ichi pedee jarapari uchiapiit'ee parã t'ãide mù jîak'a. Oopatáatù irua jara bùk'a. 23 Mãgà Ak'õre pedee jaraparipa jara bù pedee ûri k'iniada–e p'anùùrã Ak'õre eperãarã p'anùmãiipa ãyaa jërek'ooit'ee mãik'aapa peek'ooit'ee.’ (Deuteronomio 18.15-19)
24 +Ichiaba Samuel beedak'ãriipa jõma apemaarã Ak'õre pedee jarapataarãpa jarapachida tachia ârá unu p'anù. 25 Mapa parãpa k'awa p'anù Tachi Ak'õrepa jarada chonaarãweda ichi pedee jarapataarã it'aideepa parã ârapemaarã–it'ee. Ichiaba #k'awa p'anù ichia jarada Abrahammaa parã ârapemaarã–it'ee. Mãgaji Abrahammaa:
‘Mùa na p'ek'au eujãdepemaarã jõmaweda k'aripait'eeda aji, pùdeepa uchiadait'eerã k'ap'ùa pari.’ (Génesis 22.18)
26 Ichia jaradak'a Abrahammaa Tachi Ak'õrepa parã pia ooji, ichi Warra piup'eda chok'ai p'irabai atak'ãri parã t'ãide. Mãga ooji k'inia bada perã parãpa naapùara ijãadamerã mãik'aapa pãchia k'achia oopata oo amaadamerã.