Pedro Juan ome judiorã poroorã k'îrapite
4
1 At'ãri Pedro Juan ome pedeemaa p'anù misa, judiorã p'aareerã pachejida Tachi Ak'õre te jâapataarã poro ome. Ichiaba ãchi ome chejida saduceorã.a 2 K'îrau p'anajida Pedropa mãik'aapa Juanpa jaratee p'anadap'edaa perã eperãarã piudap'eda chok'ai p'irabaidai, Jesús p'irabaidak'a. 3 Mapa jita atadachida. K'ewara bada perã, carcelde t'ùt'aanajida, aù norema ma nepùra ak'ùdait'ee. 4 Mãga oojida mîda, eperãarã chok'araarãpa Cristode ijãajida, ãrapa jarateedap'edaa k'aurepa. Ijãapataarã jõmaweda ùmùk'îraarã aupai cinco mil paji.5 Aù norema Jerusalende abaamaa see nâbaji judiorã poro waibùarã, ãchi chonaarã mãik'aapa Moisepa p'ãda jarateepataarã. 6 Mama baji ichiaba Anás, judiorã p'aareerã poro waibùa pada. Ichiaba baji p'aareerã poro waibùa Caifás, Juan, Alejandro mãik'aapa Anás ëreerã awaraarã. 7 Pedro Juan ome atapijida mãik'aapa ãchi k'îrapite bainâ beepidap'eda, iidijida:
—¿K'ai juapa parãpa jãgee net'aa oo p'anùma? maa–e pùrã ¿k'aipa jãga oopi bùma? ajida.
8 Ak'õre Jaure Pedro ome bada perã, pia p'anauji:
—Judiorã poro waibùarã mãik'aapa chonaarã, 9 parãpa taimaa iidiruta, sãga nãgà k'ayaa bada k'aripajida mãik'aapa sãga jùpa beeji. ¿Mãga–ek'ã? aji. 10 Pia bù. Taipa parã k'îrapite jaradait'ee, jõmaweda israelitaarãpa k'awaadamerã. Nãgà eperã parã jõmaarã k'îrapite bainâ bù, jùpa beeji Jesucristo Nazaretdepema juapa, parãpa kurusode peepidap'edaa mãik'aapa Tachi Ak'õrepa chok'ai p'irabai atada. 11 Tachi Ak'õre Ûraa p'ãdade jara bù:
‘Te oopataarãpa mãu k'iniada–e padap'edaa pipùara padachi.’ (Salmos 118.22)
12 Mapa Jesucristodepai ijãa p'anù pùrã, ùt'aa wãdait'ee, maarepida awaraa eperã wê–e perã iruk'a na p'ek'au eujãde, tachi o k'achiadeepa k'aripa atait'ee.
13 Judiorã poroorã arii p'anadap'edaarãpa unudak'ãri Pedro mãik'aapa Juan jîp'a pedeemaa p'anù waaweeda–ee, mãik'aapa k'awaadak'ãri ãchi eperã jîp'aarã, mak'ùara k'art'a tau k'awada–ee, ak'ùtrua para beeji. K'awaajida Jesús ome nipapatap'edaa perã, mãga pedeejida. 14 Ma awara chiwa bada ãchia jùpadap'edaa arii baji. Mapa judiorã poroorãpa p'oyaa p'anaudak'aa paji. 15 Mãpai ãchia Juan, Pedro, ma chiwa bada ome taawaa uchiapijida. Maap'eda pedee para beeji ãchi pitapai:
16 —¿K'ãata oodait'eema ajida, jã eperãarã ome? Jõmaweda Jerusalendepemaarãpa k'awa p'anù ãrapa ne–inaa pia oodap'edaa, eperãarãpa p'oyaa oodak'aa ãchi juadoopa. Tachia p'oyaa merada–e. 17 Mamîda ârá jaradáma ajida, ma eperãarãmaa jarateenaadamerã Jesupa ne–inaa oopariida, mãga–e pùrã miapidai.
18 Mãpai waya t'â p'e atajida mãik'aapa jarajida waa jarateenaadamerã Jesupa ne–inaa oopariida. 19 Mamîda Pedropa Juan ome p'anaujida:
—Pia k'îsíatù parãpa. ¿K'ãare piata bayama ajida, Ak'õrepa jara bù ooda–e pait'ee, parã pedee ûri k'iniapa? 20 Taipa unudap'edaa mãik'aapa ûridap'edaa p'oyaa nepùrù amaada–eda ajida.
21 Judiorã poroorã arii p'anadap'edaarãpa ãchi juade iru p'anajida mîda miapidait'ee, arajãgaa pëijida eperãarã waidoopa. Jõmaweda eperãarã o–îa ùt'aa t'âmaa p'anapachida Tachi Ak'õremaa, 22 Jesús Jaurepa ma eperã jùpat'aada perã, cuarenta año audú iru bùta.
Ijãapataarãpa Tachi Ak'õremaa k'aripa iididap'edaa
23 K'ena pëidap'eda, Pedro Juan ome chejida ãchi k'õp'ãyoorã p'anadap'edaamaa. Nepùrùjida judiorã p'aareerã poroorãpa mãik'aapa awaraa judiorã poro waibùarãpa ãchimaa jaradap'edaa. 24 Mãgà pedee ûridap'eda, jõmaweda auk'a ùt'aa t'âjida:
—Tachi Waibùa, pùa pajã, na eujã, p'usa mãik'aapa ne–inaa jõmaweda aùde nâbù ooji. 25 Pù Jaurepa tachi chonaa Davidmaa nãga pedeepiji irua pùde ijãa bada perã:
‘¿K'ãare–it'ee awaraa eujãdepemaarã k'îrau p'anapatama? Mùchi eperãarã paara pariatua k'îsiapata. 26 Na p'ek'au eujãdepema reyrã mãik'aapa poro waibùarã audua p'anadairã, pedeeteepata k'achia oodait'ee. Pedee k'achia jarapata Tachi Ak'õre ãpùte mãik'aapa ichia rey pëida ãpùte.’ (Salmos 2.1-2)
27 +Tachi Waibùa, pùa jaradak'a David it'aideepa, mãga uchiaji. Rey Herodes, Poncio Pilato mãik'aapa awaraarã judio–eerã na p'uurude pedeeteejida israelitaarã ome k'achia oodait'ee Jesús, pùa pëida oo chemerã pùa oopi k'inia bù. 28 Mãga oojida pùa naaweda k'îsia iru badak'a. 29 Ârá Tachi Waibùa, ak'àji pù ãpùte k'achia pedee p'anùùrã mãik'aapa taimaa waapùara pù ûraa waawee–ee jarateepíji, taipa oo k'inia p'anadairã pùa oopi bùk'a. 30 Ichiaba tai k'aripáji k'ayaa beerã jùpapataadamerã mãik'aapa ne–inaa eperãarãpa p'oyaa oodak'aa ãchi juadoopa oopataadamerã Jesús t'âde. Iruata pùchia oopi bùk'a ichita oopari.
31 Ùt'aa t'â aupadak'ãri, ãchi p'anadap'edaamãi wùrrùwùrrùa nâbeeji. Mãpai jõmaweda Ak'õre Jaurepa oopi bùk'a oo k'inia p'aneejida mãik'aapa Tachi Ak'õrepa ooda Jesús piuda k'aurepa waawee–ee jarateepachida.
Ijãapataarãpa ãchi net'aa jedepatap'edaa
32 Maapai ijãapataarã jõmaweda auk'a k'îsiapachida mãik'aapa chik'aripa p'anapachida. Apidaapa ãchi net'aa iru p'anù ãchi–it'ee aupaida adak'aa paji. Jîp'a jõmaarã–it'ee paji. 33 Mapa Ak'õrepa ãchi pia oopachi. K'aripaji Cristopa jùrùt'eradaarãpa jarateedamerã Jesús chok'ai p'irabaida mãik'aapa oodamerã ne–inaa eperãarãpa p'oyaa oodak'aa ãchi juadoopa. 34 Ãchi chupùria p'anadak'aa paji. Chi eujã iru beerãpa mãik'aapa ne–inaa awaraa iru beerãpa netot'aapachida. 35 Mãpai ma p'arat'a Cristopa jùrùt'eradaarãmaa teepachida, jedenadamerã wêe beerãmaa. 36 Mãga ooji Levideepa uchiadap'edaarã Josepa. Mãgà eperã Chipre isladepema paji. Mãgùmaa Cristopa jùrùt'eradaarãpa pedida t'â bùjida Bernabé (jara k'inia bù “T'ãri O–îapipari”). 37 Mãgà eperãpa eujã iru bada netot'aaji mãik'aapa ma p'arat'a Cristopa jùrùt'eradaarãmaa teeji.