Ananías chi wêra Safira ome ne–inaa k'achia oodap'edaa
5
1 Mamîda Bernabepa oodak'a ooda–e paji Ananías chi wêra Safira ome. Mãgùùrãpa ãchi eujã netot'aajida. 2 Mamîda mãgà eperã chi wêra ome pedeeteejida p'arat'a jõma teeda–e pait'ee Cristopa jùrùt'eradaarãmaa. Ananiapa mãgà p'arat'a ûk'urupai teenak'ãri, 3 Pedropa mãgaji:—Ananías, ¿pù seewa cheruk'ã aji, Ak'õre Jauremaa, p'arat'a jõma tee che–ee? ¿Sãap'eda oojima Satanapa oopi bùk'a? 4 ¿Jã eujã pùchidé paji–ek'ã netot'aai naaweda? ¿Ma p'arat'a pùchidé paji–ek'ã netot'aap'eda? ¿Sãap'eda nãga oo k'iniadachima? Pùa eperãarãmaa seewa–e paji. Ak'õremaata seewajida aji.
5 Mãga ûriruta, Ananías eujãde piu baainaji. Arii p'anadap'edaarãpa unudak'ãri, p'erak'oodachida. 6 Mãpai k'ûtrãarã ûk'uruurãpa chi piuda beda atajida mãik'aapa ateejida ùade.
—¿Wãara nãgà p'arat'a pari eujã netot'aajidak'ã? aji.
Ichia p'anauji:
—Netot'aajidapù.
9 Pedropa mãgaji:
—¿Sãap'eda parã pedeeteejida Ak'õre Jauremaa seewadait'ee? Ara cherutada aji, pù ùmùk'îra ùadeepa. Naade pù jida auk'a ateedait'eeda aji.
10 Aramata Safira piu baainaji Pedro bùùrù ik'aawa. K'ûtrãarã t'îudak'ãri, unujida piu bù. Maap'eda ùanajida chi ùmùk'îra ik'aawa. 11 Jõmaweda ijãapataarã mãik'aapa awaraarã mãga k'awadap'edaarã p'era para beeji.
Ak'õre Jaurepa k'aripap'eda, Cristopa jùrùt'eradaarãpa oopatap'edaa
12 At'ãri Jerusalende p'anùde Cristopa jùrùt'eradaarãpa oopachida ne–inaa eperãarãpa p'oyaa oodak'aa ãchi juadoopa. Maapai jõmaweda Cristode ijãapataarã cheepurupachida Salomón Pórtico apatap'edaamãi, Tachi Ak'õre te ãuk'idaa. 13 Apemaarã judiorã Tachi Ak'õre tede t'îupataarã waaweepa araa p'anada–e paji ãchi ome. Mamîda pia pedeepachida ãchi ãpùte, apemaarã Jerusalendepemaarã ome. 14 Mãùrã mãgá t'îuda–e paji mîda ãchi ome, Cristode ijãapataarã îwajida, wêraarã mãik'aapa ùmùk'îraarã. 15 Cristopa jùrùt'eradaarãpa ne–inaa pia oo p'anadap'edaa perã, eperãarãpa ãchi k'ayaa beerã calle jã ik'aawa uchia atapachida joip'aruk'a bù ârù, Pedro wãyaa wãk'ãri, chi jaurepa pida ãra t'õbaimerã mãik'aapa jùpamerã. 16 Ichiaba p'uuru k'ait'a beerãpa Jerusalendee k'ayaa beerã chok'ara aneepachida mãik'aapa ichiaba eperã netuara merãtùa bee aneepachida. Tachi Ak'õrepa jõmaweda jùpak'oopachi Cristopa jùrùt'eradaarã juapa.
Cristopa jùrùt'eradaarã jùrùdap'edaa miapidait'ee
17 Unudak'ãri jõmaweda Cristopa jùrùt'eradaarãpa oopata, judiorã p'aareerã poro waibùa mãik'aapa ûk'uru saduceorã iru ome nipapatap'edaarãpa Cristopa jùrùt'eradaarã k'îra unuamaa iru p'aneejida. 18 Mapa Tachi Ak'õre te jâapataarãmaa atapijida carcelde t'ùk'oonadamerã. 19 Mamîda p'ãrik'ua angelpa carcelde t'îupata ewat'aa cheji. Maap'eda ãchi taawaa uchiapik'ooji. Mãpai mãgaji:
20 —Wåtù Tachi Ak'õre tedee mãik'aapa arii p'anùùrãmaa jaratéetù Cristopa ooda eperãarã k'aripait'ee ùt'aa wãdamerã.
21 Mãgá aù norema tap'eweda t'îujida Ak'õre tede mãik'aapa jarateemaa p'aneejida.
Mãùmisa ma p'aareerã poro waibùapa mãik'aapa ichi ome p'anadap'edaarãpa t'â pëijida Junta Supremadepemaarã jõmaweda. Ichiaba carceldeepa Cristopa jùrùt'eradaarã atapijida. 22 Mamîda Ak'õre te jâapataarãpa carcelde jùrùnadak'ãri, unuda–e paji. Maperã nepùrù chejida:
23 —Ununajidada ajida, carcel te pia jâa nâbù, mãik'aapa chi jâapataarã aù t'aide jâa p'anù. Mamîda ewa atadak'ãri, apida unuda–e paji.
24 Mãga ûridak'ãri, ma p'aareerã poro waibùa apemaarã p'aareerã poroorã ome mãik'aapa Ak'õre te jâapataarã poropa k'awada–e paji k'ãata oodai. 25 Mãga nùde eperã pacheji mãik'aapa mãgaji:
—Parãpa carcelde t'ùk'oodap'edaarã Tachi Ak'õre tede eperãarãmaa jarateemaa p'anùda aji.
26 Aramata Tachi Ak'õre te jâapataarã poro apemaarã jâapataarã ome wãjida jita p'e atade. Mamîda k'îra jîp'a p'e aneejida, eperãarãpa ãchimaa mãupa bat'adai jîak'aapa. 27 Pachedak'ãri, ak'ùnâ p'aneepijida Junta Suprema k'îrapite. Mãpai ma p'aareerã poro waibùapa mãgaji:
28 —Taipa parãmaa jarajida waa jarateenaadamerã jã eperãpa oopata. Mamîda mãga ooda–e p'anù. Waapùara jõmaweda Jerusalén pidaarãmaa jarateemaa p'anù. Ma awara táipata jã eperã peet'aajidada a jõnù.
29 Apemaarã pari Pedropa p'anauji:
—Taipa ichita Ak'õrepa oopi bùk'a oodait'eeda aji, eperãpa jara bùk'a oodai k'ãyaara. 30 Tachi chonaarãwedapema Ak'õrépata Jesús, parãpa kurusode peepidap'edaa, chok'ai p'irabaipiji. 31 Tachi Ak'õrepa iru p'irabai atap'eda, su–ak'ù bùji ichi juaraare, jõmaarã k'ãyaara waibùara bairã. Mama bùji eperãarã ak'ùpariimerã mãik'aapa o k'achiadeepa k'aripa atamerã. K'inia baji Jesús piuda k'aurepa israelitaarãpa p'ek'au k'achia oopata oo amaadamerã. Mãgá irua wêpapik'ooi ãrapa p'ek'au k'achia oopata. 32 Tachi Ak'õre Jaurepa ma jõma k'awa bùda aji. Taipa pida ichiaba mãga k'awa p'anùda aji, Cristode ijãadak'ãri, Ak'õrepa ichi Jaure taimaa pëida perã.
33 Judiorã poroorãpa mãga ûridak'ãri, Cristopa jùrùt'eradaarã peek'oo k'iniadachida. 34 Mamîda ãra t'ãide baji fariseoa t'âjarapatap'edaa Gamaliel. Mãgà Gamalielpa Moisepa p'ãda pia k'awaa baji. Mapa eperãarãpa iru t'o p'anapachida. Mãgà bainâ beep'eda, Cristopa jùrùt'eradaarã arak'atùa taawaa uchia atapiji. 35 T'êepai mãgaji apemaarã judiorã poroorãmaa:
—Israelitaarã, pia k'îsíatù ne–inaa oodai naaweda jã eperãarãmaa. 36 K'irãpátù mak'ùara taarã–e bù eperã Teudas apatap'edaapa k'îsiaji ichita jõmaarã k'ãyaara waibùara pai. Mãgà eere cuatrocientos ùmùk'îraarã p'anajida. Mamîda mãgà peet'aadak'ãri, iru ome nipapatap'edaarã jîchoodachida. Mãgá ãchia k'îsia iru p'anadap'edaa jõdachi. 37 Aù t'êepai, Romadepemaarãpa eperãarã t'â p'ãpimaa p'anadak'ãri, ichiaba Judas Galileadepemapa mãga k'îsiaji. Eperãarã ûk'uruurãpa iru pedee ijãajida. Mamîda ichiaba peet'aadak'ãri, iru ome nipapatap'edaarã ãyaa erreudachida. 38 Mapa mùa parãmaa ûraait'ee jã eperãarã k'achia oonaadamerã. Ãchia jaratee p'anù pùrã ãchi k'îsiadeepa mãik'aapa ne–inaa oo p'anù pùrã ãchi juadoopa, ãchia oopata jõdariyada aji. 39 Mamîda Tachi Ak'õrépata ãchimaa mãga oopi bù pùrã, parãpa p'oyaada–eda aji. K'îrak'aupai, Tachi Ak'õre ome chõomaa p'aneedai.
Ãchia Gamaliel ûraa ijãajida. 40 Maap'eda Cristopa jùrùt'eradaarã t'â p'e atajida mãik'aapa wùk'oojida. Jarajida waa jarateenaadamerã Jesupa ooda. Maap'eda k'ena pëijida. 41 Mamîda Cristopa jùrùt'eradaarã judiorã poroorã k'îrapiteepa o–îa uchiajida, Ak'õrepa ãchi ita–aria miapida perã Jesús k'aurepa. 42 Maap'eda ewari chaa jarateepachida Jesucristota Tachi Ak'õrepa pëida eperãarã k'aripamerã. Mãga jaratee wãpachida Tachi Ak'õre tede mãik'aapa te bee chaa.