Ijãapataarã siete jùrùt'eradap'edaa<R>Cristopa jùrùt'eradaarã k'aripadamerã
6
1 Maapai ijãapataarã chok'arapùara îwajida. Judiorã griego pedee pedeepataarãpa ùmùateejida judiorã hebreo pedee pedeepataarãmaa, ãchia griego pedee pedeepataarã p'êtrãarã pia ak'ùdak'aa pada perã ewari chaa ne–inaa jededak'ãri k'aripadait'ee. 2 Maperã chi doce jùrùt'eradaarãpa t'â pëijida jõmaweda Cristode ijãapataarã cheepurudamerã. See nâbeek'ãri, mãgajida:—K'õp'ãyoorã, tai jua araada–e ijãapataarã jõmaweda ak'ùdait'ee. Pia–e bùda ajida, taipa waa jarateeda–e pait'ee Ak'õrepa jara pëida Jesucristo k'ap'ùa pari, chi ne–inaa wêe beerã ak'ù k'iniapa. 3 Mapa eperãarã siete jùrùt'erátù ma mimia oodamerã. Jùrùdaipia bù nãgee eperãarã: k'îsia k'awaa beerã; t'ãri pia beerã mãik'aapa Ak'õre Jaurepa oopi bùk'a oo k'inia beerã. 4 Tai jõdee ùt'aa t'âmaa p'anadait'ee mãik'aapa Ak'õrepa jara pëida jarateedait'eeda ajida.
5 Mãpai ãchia p'anaujida:
—Pia bùda ajida.
Maap'eda jùrùt'erajida Esteban. Ma eperã Cristode pia ijãaji mãik'aapa Ak'õre Jaurepa oopi bùk'a oopachi. Ichiaba jùrùt'erajida Felipe, Prócoro, Nicanor, Timón, Pármenas mãik'aapa Nicolás Antioquiadepema. Naaweda mãgà Nicolás Tachi Ak'õrede ijãak'aa bap'eda, judiorãpa ijãapatade ijãa baji. 6 Ma t'êepai ateejida Cristopa jùrùt'eradaarã p'anadap'edaamaa. Mãgùùrã ùt'aa t'âjida ãchi pari mãik'aapa jua bùjida ãchi ârù. Mãga oojida ak'ùpidait'ee ma mimia ãchimaa teeruta.
7 Ma t'êepai, Ak'õrepa ooda Cristo piuda k'aurepa waapùara jarateepachida mãik'aapa ijãapataarã waapùara îwapachida Jerusalende. Judiorã ûk'uru, p'aareerã jida ichiaba Cristode ijãajida.
Judiorã poroorãpa Esteban jita atadap'edaa
8 Maapai Jerusalendepemaarã t'ãide Estebanpa oopachi ne–inaa eperãarãpa p'oyaa oodak'aa ãchi juadoopa. Mãga oopachi Tachi Ak'õrepa iru k'aripa bada perã. 9 Mamîda ewari aba pachejida judiorã Tachi Ak'õre Ûraa jarateepata tedepema. Ma te t'âjarapachida Esclavoorã P'anadap'eda Uchiadap'edaa. Mãùrãpa nepùra jùrù chejida Estebanmaa. Ãchi ome chejida auk'a Cirene p'uurudepemaarã, Alejandría p'uurudepemaarã, Cilicia eujãdepemaarã mãik'aapa Ásia eujãdepemaarã. 10 Mamîda aupedeedak'ãri, Esteban p'oyaa k'îup'eepidak'aa paji, Ak'õre Jaurepa iru k'îsia k'awaapida perã ãchia iidida p'anauit'ee. 11 Mapa awaraarãmaa p'aajida seewa jaradamerã ichia pedee k'achia pedeemaa bù Moisés ãpùte mãik'aapa Tachi Ak'õre ãpùte. 12 Mãgá p'uuru pidaarã, judiorã poro waibùarã mãik'aapa Moisepa p'ãda jarateepataarã k'îraupik'oojida Esteban ome. Mãùrãpa Esteban jita atadap'eda, atadachida Junta Suprema k'îrapite Tachi Ak'õre tede. 13 Mãpai ma p'aadap'edaarã aneejida seewa jaradamerã. Mãùrãpa mãgajida:
—Nãgà eperãpa ik'achia pedeeparida ajida, Tachi Ak'õre tedé mãik'aapa Moisepa p'ãdadé. 14 Jara bù Jesús Nazaretdepemapa nãgà te t'eet'aait'ee mãik'aapa tachimaa waa oopi–e pait'ee Moisepa p'ãdade jaradak'a, tachia oodamerã.
15 Judiorã poroorãpa mãik'aapa arii p'anadap'edaarãpa Esteban ak'ùdak'ãri, chi k'îra ángel k'îrak'a unujida.