Abrahampa ijãada
4
1 K'îsiadáma tai judiorã chonaarãwedapema Abrahampa oodade. ¿K'ãata oojima Tachi Ak'õrepa iru pia ak'ùmerã? 2 Tachi Ak'õrepa jaradak'a jõmaweda ooda paara Abrahampa, ichia jarak'aji awaraarãmaa: “Tachi Ak'õrepa mù pia ak'ùpari ne–inaa oopari perã iru–it'ee.” Mamîda Tachi Ak'õre–it'ee mãga jara–e pak'aji, ne–inaa jõmaweda oo–e pada perã Ak'õrepa k'inia badak'a. Mãga bùta, ¿sãap'eda Tachi Ak'õrepa Abraham pia ak'ùjima? 3 Ak'õre Ûraa p'ãdade jara bù:‘Abrahampa Tachi Ak'õrepa jarada ijãaji. Maperã Tachi Ak'õrepa iru pia ak'ùpachi.’ (Génesis 15.6)
4 K'îsiadáma nãgùde. Eperã mimiak'ãri awaraa pari, ma mimia aupap'eda, ichi p'arat'a iidinapari mimia chiparimaa. Mãgá tachia oopata p'arat'a jitadait'ee. 5 Mamîda mãga–e Tachi Ak'õre ome. Irua eperã pia ak'ù–e, ma eperãpa mãga iidi bairã ichia ne–inaa pia oopari k'aurepa. Jîp'a p'ek'au k'achia oopataarã pia ak'ùpari, mãùrãpa wãara ijãadak'ãri irua ãchia p'ek'au k'achia oopata wêpapiit'ee. 6 Chonaarãweda Rey Davidpa ichiaba k'awaji Ak'õrepa eperã p'ek'au k'achia wêe ak'ùpari, ne–inaa pia oo–e bù mîda iru–it'ee. Jaraji mãgee eperã t'ãri o–îa bapari, Ak'õrepa iru mãgá k'aripapari perã. Mãgaji:
7 ‘P'ek'au k'achia oopataarã o–îa p'anapata Tachi Ak'õrepa ãchi p'ek'au k'achia ãyaa bùk'ãri mãik'aapa wêpapik'ãri. 8 Mãgee eperã o–îa bapari Tachi Ak'õrepa iru p'ek'au k'achia wêe ak'ùk'ãri.’ (Salmos 32.1-2)
9 Davidpa mãga jarada perã, ¿k'ãata jaradaima? ¿Tachi Ak'õrepa wêpapiik'ã tauchaa iru beerãpa p'ek'au k'achia oopatap'edaa aupai? Tauchaa wêe beerãpa p'ek'au k'achia oopatap'edaa auk'a wêpapiit'ee, o–îa p'anapataadamerã Davidpa jaradak'a. Waya pedeedáma Tachi Ak'õre Ûraa p'ãdade jara bù:
‘Abrahampa Tachi Ak'õrepa jarada ijãaji. Maperã Tachi Ak'õrepa iru pia ak'ùpachi.’ (Génesis 15.6)
10 Tachi Ak'õrepa mãga jarak'ãri, Abrahampa at'ãri ichi k'ap'ùade tauchaa bù–e baji. 11 Ma t'êepaita Abrahampa mãga ooji. Mãga ook'ãri, ak'ùpiji ichia wãara ijãa bù Tachi Ak'õrepa iru k'achia wêe ak'ùda, ma ijãa bù k'aurepa. Tachi Ak'õrepa Abraham mãgá ak'ùda perã ma tauchaa bùi naaweda, k'awa p'anù tauchaa wêe beerã auk'a p'ek'au k'achia wêe p'aneedai Tachi Ak'õre k'îrapite, ijãadak'ãri Abrahampa ijãadak'a. Mãgá ijãadak'ãri, Abraham warrarãk'a padaipata, ãchi k'ap'ùade tauchaa wêe p'anù mîda. 12 Jõdee tauchaa iru beerã ichiaba Abraham warrarã. Mãga p'anù–e tauchaa iru p'anadairã ãchi k'ap'ùadepai. Jîp'a mãga p'anù ijãapata perã tai judiorã chonaarãwedapema Abrahampa ijãadak'a, ichi waide tauchaa wêe bùde.
Tachi Ak'õrepa jaradak'a oopari ijãapataarã ome
13 Ak'õrepa ichi ûraa p'ãpii naaweda, Abrahammaa jaraji irudeepa uchiadap'edaarãpa Tachi Ak'õrepa ooda jõmaweda iru p'aneedait'ee ãchi jua ek'ari, mãik'aapa ãchi k'aurepa Tachi Ak'õrepa na p'ek'au eujãdepemaarã pia ak'ùit'ee. Ak'õrepa mãga jara–e paji Abrahampa ne–inaa oo bada perã iru ûraade jaradak'a. Mãga jaraji Abrahampa irude ijãa bada perã. Maperãpù Abraham p'ek'au k'achia wêe baji iru k'îrapite. 14 Tachi Ak'õrepa mãga jarada paara ichi ley p'ãdade jara bùk'a oopataarãmaa aupai, ¿k'ãare–it'ee irude ijãadaima? Mãga bada paara, oo–e pak'aji ichia jaradak'a Abrahammaa. Mamîda mãga–e. Tachi Ak'õrepa k'awa bù eperã apidaapa p'oyaa ooda–e jõmaweda iru ley p'ãdade jara bùk'a. 15 Ma awara eperãarãpa ooda–e pak'ãri ma ley p'ãdade jara bùk'a, ne–inaa k'achia oopata. Mãgá Tachi Ak'õre k'îraupipata mãik'aapa ma k'aurepa atuapata. Ma ûraa wê–e pada paara, k'awada–e pak'aji ãchia ne–inaa k'achia oo p'anù.
16 Ma jõma jara aupadade k'îsiadak'ãri, k'awa p'anù Tachi Ak'õrepa jaradak'a, ichia Abrahamdeepa uchiadap'edaarã pia ak'ùpariit'ee, ãrapa ijãapata perã Abrahampa ijãadak'a; ma k'aurepapai. Maperã k'awa p'anù Abraham jõmaarã ak'õchona, judiorã ak'õchona mãik'aapa judio–eerã ak'õchona, ijãadak'ãri irua ijãadak'a. 17 Tachi Ak'õrepa Abrahammaa jara bù ichi ley p'ãdade:
‘Mùa pù eujã awara–awaraadepemaarã ak'õchona papiit'ee.’ (Génesis 17.5)
Mãgá k'awa p'anù Tachi Ak'õre k'îrapite Abraham tachi ijãapataarã ak'õchona, irudeepa uchiada–e paji mîda. Abrahampa ijãapachi Tachi Ak'õrepa piudap'edaarã chok'ai p'irabaipipari. Ichiaba ijãapachi Ak'õrépata jarak'ãri ichia ooit'ee bù, mãga ooit'ee, waide oo–e bù mîda.
18-19 Abraham perá cien año iru baji Tachi Ak'õrepa jarak'ãri:
‘Pùdeepa uchiadait'eerã cho–k'ara pait'ee.’ (Génesis 15.5)
Mãgá taarã–ee piuit'ee baji mãik'aapa chi wêra Sara, chõtrãa bùta, warra t'ok'aa paji mîda, Abrahampa ijãaji Tachi Ak'õrepa jarada; chi wêrapa warra t'oit'ee. Mãga ijãaji k'awa bada perã Tachi Ak'õrepa ichita oopari ichia jara bùk'a. Mãgá ijãada perã, Ak'õrepa Abraham awara–awaraa eujãdepemaarã ak'õchona papiji. 20 Abrahampa Tachi Ak'õrepa jarada ijãa amaa–e paji mãik'aapa awaraa ne–inaa k'îsia–e paji. Jîp'a ijãaji Tachi Ak'õrepa ooit'ee ichia jaradak'a. Maperã Abraham ùt'aa t'âji Tachi Ak'õremaa 21 jarait'ee iruta jõmaarã k'ãyaara waibùara bù. K'awaji ne–inaa wê–e Tachi Ak'õrepa p'oyaa ook'aa. 22 Maperãpù Tachi Ak'õre Ûraa p'ãdade jara bù:
‘Abrahampa Tachi Ak'õrepa jarada ijãaji. Maperã Tachi Ak'õrepa iru pia ak'ùpachi.’ (Génesis 15.6)
23 Tachi Ak'õrepa mãga jara–e paji Abraham–it'ee aupai. 24 Ichiaba mãga jaraji tachi–it'ee, irude ijãapata perã. Iruata Tachi Waibùa Jesucristo chok'ai p'irabaipiji. 25 Tachi Ak'õrepa Jesucristo pëiji piumerã tachia p'ek'au k'achia oopata k'aurepa. Maap'eda iru chok'ai p'irabaipiji tachi p'ek'au k'achia wêe p'anadamerã iru k'îrapite.