Cristode ijãapataarã k'ãiwee p'anapata Tachi Ak'õre ome
5
1 Tachi Cristode ijãapataarã mãgá p'ek'au k'achia wêe p'anapata perã Tachi Ak'õre k'îrapite, k'ãiwee p'anapata, k'awaa p'anadairã Tachi Ak'õrepa tachi atuapi–e pait'ee. Ma k'ãyaara tachi pia ak'ùpari Tachi Waibùa Jesucristo k'aurepa. 2 Irude ijãapata k'aurépata Tachi Ak'õrepa tachi k'aripapari. Maperã t'ãri o–îa p'anapata. K'awa p'anù irua ichi k'îra wãree unupiit'ee tachimaa. 3 Ma awara âraweda t'ãri o–îa p'anapata, mia p'anù pùjida. Mãga p'anadai k'awa p'anadairã mãgá miadak'ãri, k'awaa wãpata choodait'ee. 4 Mãgá choodak'ãri, k'awaapata Tachi Ak'õrepa tachi pia ak'ùpari mãik'aapa waapùara ijãapata ewari cherude iru k'îra wãree unudait'ee. 5 K'awa p'anù ma ewate irua tachi k'ûra–e pait'ee, ichi Jaure pëida perã tachi ome ba chemerã. Mãgùpa tachi t'ãride k'awapipari Tachi Ak'õrepa tachi k'inia iru bù.6 Naaweda tachia p'ek'au k'achia p'oyaa oo amaada–e paji tachi k'îradoopa. Maperã Ak'õrepa ewari aba jùrùt'eraji Cristo piumerã k'achia beerã pari. 7 Eperã jîp'aapa mãga oo–e pak'aji awaraa pari. ¿K'aita chîara t'ãri k'achia–idaa bù pari piuk'ajima? Piu–e pak'aji pia oopataarã pari pùjida. Piuk'ajisk'a eperã t'ãri pia bù pari. 8 Mamîda Tachi Ak'õrepa ak'ùpiji ichiata tachi audú k'inia iru bù, Cristo pëik'ãri piumerã p'ek'au k'achia oopataarã pari.
9 Ichia mãga ooda perã tachi–it'ee, ijãapata Cristo waa bat'ada k'aurepa Tachi Ak'õrepa ijãapataarã p'ek'au k'achia wêe papipari ichi k'îrapite. Ma awara k'awapata Cristo k'aurepa Tachi Ak'õrepa tachi miapi–e pait'ee ichi ewari waibùa ewate. 10 Naaweda tachi jida Tachi Ak'õre k'îra unuamaa iru p'anapataarãk'a p'anajida, o k'achiade p'anapachida perã. Mamîda Cristo piuda k'aurepa tachi pari, Tachi Ak'õrepa ichi t'ãri auk'a bùji tachi t'ãri ome. Ma awara Cristo piup'eda chok'ai p'irabaida perã, ârá audupùara tachi k'aripapari ichi ode wãrutade, mãik'aapa mãgá k'aripapariit'ee tachi wãrutamaa ichi truadee. 11 Tachi Waibùa Jesucristopa tachi mãgá k'aripapari perã, ârá tachi t'ãri auk'a p'anapata Tachi Ak'õre ome. Maperãpù tachi t'ãri o–îa p'anapata.
Adán badak'ãriipa Cristo parumaa
12 Adanpa oodade k'îsiadáma. Chi naapema eperãpa naapùara p'ek'au k'achia ooji, oo–e pada perã Tachi Ak'õrepa jaradak'a. Piuji ma k'achia ooda k'aurepa. Ma k'achia oodak'ãriipa jõmaweda ichideepa uchiadap'edaarãpa p'ek'au k'achia oo p'aneejida. Mãgá Adanpa naapùara k'achia ooda k'aurepa, maadamãiipa eperãarã piupata. 13 Mãga paji Ak'õrepa ichi ûraa p'ãpii naaweda Moisemaa. Ma ûraa p'ãpida k'awada–e p'anapachida mîda, eperãarãpa pariatua p'ek'au k'achia oopachida Tachi Ak'õre k'îrapite. Mamîda Tachi Ak'õrepa ãchi miapi–e paji ãchia ne–inaa k'achia oopatap'edaa k'aurepa. 14 Jîp'a piujida Adanpa ne–inaa k'achia ooda k'aurepa, auk'a ooda–e paji mîda irua oodak'a. Ârá k'îsiadáma Adanpa oodade mãik'aapa Cristo, chi cheit'ee bada apatapa oodade.
15 Tachi Ak'õrepa eperãarã chupùria k'awaada mãik'aapa pia ooda Cristo k'aurepa, Adanpa oodak'a bù–e. Adanpa ooda k'aurepa na p'ek'au eujãdepemaarã jõmaweda piupata mãik'aapa pia–ee p'anapata Tachi Ak'õre k'îrapite. Mãga p'anapata mîda Ak'õre k'îrapite mãik'aapa p'ek'au k'achia oopata mîda, Cristode ijãadak'ãri, Tachi Ak'õrepa eperãarã chupùria k'awaapari mãik'aapa ãrapa p'ek'au k'achia oopata wêpapipari. Mãgá Cristopa ooda k'aurepa Ak'õrepa ma eperãarã p'ek'au k'achia wêe ak'ùpari. 16 Ma awara Adanpa k'achia ooda k'aurepa Tachi Ak'õrepa na p'ek'au eujãdepemaarã pia ak'ù–e paji mãik'aapa ma k'aurepa ãra atuapiit'ee paji. Jõdee Cristopa pia ooda k'aurepa Tachi Ak'õrepa na eujãdepemaarã pia ak'ùpari irude ijãadak'ãri. 17 Ma et'ewa jara aupadade k'îsiadak'ãri, k'awa p'anù Adanpa ooda k'aurepa na p'ek'au eujãdepemaarã piupata. Mamîda ma k'ãyaara Jesucristopa ooda pipùara bù. Ma k'aurepa Tachi Ak'õrepa eperãarã k'aripapari, p'ek'au k'achia wêe ichita p'anapataadamerã iru truade, ãrapa irude ijãapata perã.
18 Ichiaba Adanpa k'achia ooda k'aurepa, jõmaweda atuadait'ee paji. Jõdee Jesucristopa pia ooda k'aurepa jõmaweda p'ek'au k'achia wêe p'anadai Tachi Ak'õre k'îrapite mãik'aapa iru truadee wãdai. 19 Mapa jaradai eperã abaapa oo–e pada perã Ak'õrepa jaradak'a, eperãarã chok'araarãpa p'ek'au k'achia oo p'aneejida. Jõdee chi apemapa ooda perã Ak'õrepa jaradak'a, eperãarã chok'ara p'ek'au k'achia wêe p'anù Tachi Ak'õre k'îrapite.
20 Tachi Ak'õrepa ichi ûraa Moisemaa p'ãpiji ak'ùpiit'ee eperãarãmaa ãchia ne–inaa k'achia oopata. Ma ûraa k'awaadak'ãri, audupùara k'achia oopachida. Mamîda Tachi Ak'õrepa mãgee eperãarã audú k'inia iru bada perã, ãchi ma o k'achiadeepa k'aripa ataji. 21 Waide Tachi Ak'õrepa mãgá k'aripa–e bak'ãri, tachi eperãarã piudap'eda, atuapachida tachia p'ek'au k'achia oopata k'aurepa. Mamîda Tachi Ak'õrepa tachi p'ek'au k'achia oopataarã k'aripak'ãri Jesucristo k'aurepa, p'ek'au k'achia wêe p'aneejida iru k'îrapite mãik'aapa iru ode p'aneejida. Ma ode p'anadak'ãri, tachi k'ap'ùa piuruta pùjida, Ak'õre truade p'ananadait'ee.