Cristodeerãpa p'ek'au k'achia oodaamaa p'anapata
6
1 Parãdepemapa iidii: “Tachi Ak'õrepa Cristode ijãapataarã p'ek'au k'achia wêe ak'ù bù pùrã, ¿p'ek'au k'achia waapùara oodaipia bù–ek'ã, mãgá Ak'õrepa waapùara tachi pia ak'ùmerã?” 2 ¡Mãga–e! Cristode ijãadak'ãri, tachi p'ek'au k'achia ooyaa bù k'ap'ùa piu pùk'aji. Mãga bùta, ¿sãga waapùara p'ek'au k'achia oodaima? 3 ¿K'awada–e p'anùk'ã? Jesucristode ijãadak'ãri, poro choopijida ak'ùpidait'ee iru ome araa p'anù. Mãgá araa p'anadairã iru ome, iru piuk'ãri tachi p'ek'au k'achia wêpapiit'ee, tachi jida auk'a piu pùk'ajida. 4 Ma awara tachi ijãapataarãpa poro choopidak'ãri mãgá ak'ùpidait'ee tachi piu pùk'adap'edaa Cristo ome, jaradai tachi auk'a ùa pùk'ajida iru ome. Ichiaba jaradai Tachi Ak'õre Waibùapa tachi auk'a p'irabai pùk'apiji iru p'irabaipidak'a, mãgá awara p'anapataadamerã irua k'inia bùk'a.5 Cristo ome araa p'anù k'aurepa, tachi auk'a piu pùk'ajida pùrã iru ome, mãgara auk'a p'irabaidait'ee mãik'aapa iru ome p'ek'au k'achia wêe p'anapataadait'ee, irua k'inia bùk'a. 6 K'awa p'anù Cristode ijãadai naaweda p'ek'au k'achia ooyaa p'anapachida. Mamîda ijãadak'ãri mãik'aapa araa p'aneedak'ãri iru ome, ma p'ek'au k'achia ooyaa bù k'ap'ùa kurusode piu pùk'aji iru k'ap'ùa ome. Mãgá uchiajida ma p'ek'au k'achia ooyaa bù k'ap'ùa jua ek'ariipa, waa tachimaa k'achia oopinaamerã. 7 Tachi eperã k'ap'ùa piuk'ãri, ne–inaa waa tachimaa oopi–e pai, pia wa k'achia. Mãga pùk'a tachi p'ek'au k'achia ooyaa bù k'ap'ùa piu pùk'ak'ãri Cristo k'ap'ùa ome, ne–inaa k'achia waa tachimaa oopi–e pai. 8 Tachi p'ek'au k'achia ooyaa bù k'ap'ùa mãgá piu pùk'ada perã Cristo k'ap'ùa ome, ijãa p'anù Cristopa tachi k'aripait'ee p'anapataadamerã irua k'inia bùk'a, auk'a p'irabai pùk'adap'edaa perã iru ome. 9 Tachi ijãapataarãpa k'awa p'anù Cristo piup'eda chok'ai p'irabaida perã, waa piu–e pait'ee. 10 Piuda apai piuji p'ek'au k'achia jõmaweda wêpapiit'ee. Ma piudak'ãriipa ichita chok'ai bapari ooit'ee Ak'õrepa oopi bùk'a. 11 Parã ichiaba mãgá p'anapataadaipia bù, parã p'ek'au k'achia ooyaa bù k'ap'ùa piu pùk'ada perã Jesucristo k'ap'ùa ome. Mapa ichita iididaipia bù Jesucristomaa, irua parã k'aripamerã oodait'ee Tachi Ak'õrepa k'inia bùk'a. Mãgá ne–inaa k'achia oo amaadaipù.
12 Oonáatù ma p'ek'au k'achia ooyaa bù k'ap'ùapa oopi k'inia bùk'a parãmaa. Mãgà k'aurepa ne–inaa k'achia k'îra t'ãdoo oopata. Mamîda ma k'ap'ùa jõit'eepù. 13 Ne–inaa k'achia oopináatù pãchi juamaa, bùùrùmaa, it'aimaa, taumaa. Jîp'a pãchi k'ap'ùa bàtù Tachi Ak'õre jua ek'ari, irua ne–inaa pia oopimerã ma k'ap'ùamaa. P'anapatáatù k'ap'ùa chiwidi iru p'anùk'a, parã auk'a p'irabai pùk'adap'edaa perã Cristo ome, iru k'ap'ùa chiwidi p'irabaik'ãri. 14 Mãga ooruta pùrã, waa p'ana k'iniada–e pait'ee pãchia p'ek'au k'achia ooyaa bù k'ap'ùa jua ek'ari. Cristopa parã uchiapidak'a Tachi Ak'õre Ûraa p'ãda jua ek'ariipa, auk'a uchiapii ma k'achia ooyaa bù k'ap'ùa jua ek'ariipa. Mãgá Tachi Ak'õrepa parã k'aripa k'inia bù, parã k'inia iru bapari perã.
Pù, k'ai esclavo
15 Parãdepemapa jarai: “Mãgara, Cristopa ooda k'aurepa ùt'aa wãdait'ee pùrã, oonaadáma Tachi Ak'õre Ûraa p'ãdade jara bùk'a. Oodáma tachia oo k'iniata.” ¡Mãga–e! 16 ¿K'awada–e p'anùk'ã esclavopa oopari chiparipa oopi bùk'a? Ne–inaa k'achia oopiru pùrã, k'achia oopari mãik'aapa k'achiade baaipari. Mãga pùk'a bù parã p'ek'au k'achia ooyaa bù k'ap'ùa jua ek'ari p'anadak'ãri. Jõdee ma esclavo chiparipa chi esclavomaa ne–inaa pia oopiru pùrã, pia oopari mãik'aapa chiparipa k'achia wêe ak'ùpari. Mãga pùk'a bù Tachi Ak'õre jua ek'ari p'anadak'ãri. Pù ¿k'ai esclavoma; p'ek'au k'achia ooyaa bù k'ap'ùa esclavo wa Tachi Ak'õre esclavo? 17 Mùa gracias jarapari Tachi Ak'õremaa, ârá irua oopiparik'a oo k'inia p'anadairã pãchi t'ãripa. Mãga oo k'inia p'anù Tachi Ak'õrepa pedee pia jara pëida Cristode ûridap'edaa perã iru–it'ee mimiapataarã it'aideepa mãik'aapa irude ijãadap'edaa perã. 18 Mãgá uchiajida ma p'ek'au k'achia ooyaa bù k'ap'ùa jua ek'ariipa mãik'aapa Tachi Ak'õre jua ek'ari p'aneejida. 19 (Nãgà jarateerude mùa “esclavo” jara bù parãpa pipùara k'awaadamerã k'ãata mùa jara k'inia bù.) Naaweda pãchi p'ek'au k'achia ooyaa bù k'ap'ùa jua ek'ari esclavoorãk'a p'anapachida. Mamîda ârá pãchi k'ap'ùamaa oopidaipia bù ne–inaa pia k'îra t'ãdoo, Tachi Ak'õrepa k'iniata, ma–it'ee Ak'õrepa parã awara bùda perã.
20 Parã at'ãri pãchi p'ek'au k'achia ooyaa bù k'ap'ùa jua ek'ari esclavoorãk'a p'anadak'ãri, ûridaamaa p'anapachida Ak'õrepa oopi k'inia bada parãmaa. Jîp'a oo k'inia p'anapachida k'achia beerãpa oopatak'a. 21 ¿K'ãare piata atajidama mãga p'anadap'edaa pari? Mãga p'anadap'edaa paara pãchi piurutamaa, atuak'ajida k'achia beerã atuapatak'a. Ma awara ârá ijãapata perã, k'îra nejasia p'anù k'îsiadak'ãri ma k'achia oopatap'edaade. 22 Mamîda Tachi Ak'õrepa parã ichideerã papiji mãik'aapa parã uchia ataji ma p'ek'au k'achia jua ek'ariipa, waa esclavoorãk'a p'ananaadamerã. Ichia parã mãgá awara bùda perã, ichia k'inia bùk'a p'anapataadai mãik'aapa ùt'aa wãdai pãchi jai–idaadak'ãri. 23 Wãara p'ek'au k'achia oopataarã piudak'ãri, atuadait'ee. Mamîda Cristode ijãapataarã ùt'aa wãdait'ee mãik'aapa ichita p'anapataadait'ee Tachi Waibùa Jesucristo ome, Tachi Ak'õrepa mãga k'inia bairã.