Chonaarãwedapema ûraa mãik'aapa Cristode ijãapataarã
7
1 Âpemaarã Cristo k'aurepa, parãpa k'awa p'anù Tachi Ak'õrepa Moisemaa ûraa p'ãpida. K'awa p'anù tachi ma ûraa jua ek'ari p'anapata chok'ai p'anù misa. 2 K'îsiadáma nãgùde. Tachi Ak'õre Ûraade jara bù wêrapa awaraa ùmùk'îra jùrùik'araa bù, ichi ùmùk'îra chok'ai bù misa. Mamîda chi ùmùk'îra jai–idaak'ãri, chi wêra uchiai mãgà ûraa jara bù jua ek'ariipa. Awaraa ùmùk'îra atai. 3 Pia jarait'eera, chi ùmùk'îra chok'ai bùde, araa beeru pùrã awaraa ùmùk'îra ome, p'ek'au oo bù Tachi Ak'õre k'îrapite. Mamîda chi k'ima jai–idaap'eda, awaraa ome araa paru pùrã, p'ek'au oo–e bù Tachi Ak'õre k'îrapite.4 Mãga pùk'a bù parã ome, mùchi âpemaarã Cristo k'aurepa. Parã p'ek'au k'achia ooyaa bù k'ap'ùa kurusode piu pùk'ak'ãri Cristo k'ap'ùa ome, Moisepa p'ãda ûraa jara bùdeepa uchiajida. Parãpa Cristode ijãadak'ãri, araa p'aneejida iru ome, ichideerã p'aneedamerã mãik'aapa oodamerã irua oopi bùk'a. 5 Araa p'anadai naaweda Cristo ome, ma p'ek'au k'achia ooyaa bù k'ap'ùapa ne–inaa k'achia k'îra t'ãdoo oopipachi tachimaa, oo k'inia bada perã Ak'õre Ûraa p'ãdade jara bù eperãarãpa oonaadamerã. Mãga oopida perã, Tachi Ak'õrepa tachi atuapiit'ee paji. 6 Mamîda Cristode ijãadak'ãri mãik'aapa ma p'ek'au k'achia ooyaa bù k'ap'ùa piu pùk'ak'ãri Cristo ome, tachi uchiajida ma ûraa jara bù jua ek'ariipa oodait'ee Tachi Ak'õre Jaurepa oopi bùk'a. Naaweda ma ûraa tachi chipari pùk'a baji. Mamîda Cristo ome araa p'aneedak'ãri, Tachi Ak'õre Jaure tachi chipari beeji p'anapataadamerã Ak'õrepa k'inia bùk'a.
Chonaarãwedapema ûraa<R>mãik'aapa tachi p'ek'au k'achia ooyaa bù k'ap'ùa
7 Mãgá Tachi Ak'õre Jaure tachi chipari beeji pùrã, ¿jaradaik'ã, Tachi Ak'õrepa ûraa p'ãpida k'achia bù? ¡Mãga–e! Ma ûraa wê–e pada paara, mùa k'awa–e pak'aji k'ãare net'aata k'achia bù Ak'õre k'îrapite. Ma ûraade jara–e pada paara:
‘Chîara net'aa k'âanáaji’, (Éxodo 20.17)
mùa k'îsia–e pak'aji chîara net'aa k'âait'ee. 8 Mamîda tachia Ak'õre Ûraa p'ãda iru p'anù. Maperã mù p'ek'au k'achia ooyaa bù k'ap'ùapa waapùara mùmaa chîara net'aa k'âapipari, mãgùpa oopi k'inia bairã ma ûraade jara bù eperãarãpa oonaadamerã. Ma ûraa wê–e pada paara, ¿sãga oopik'ajima ma ûraade jara bù oonaadamerã? ¡Maarepida oopi–e pak'aji! 9 Mùa ma ûraade jara bù waide k'awa–e bak'ãri, k'îsia p'ua wêe bapachi Ak'õre k'îrapite. Mamîda ma ûraa k'awaadak'ãriipa k'îsia p'ua beeji, k'awada perã chîara net'aa k'âa bù k'aurepa mù atuait'ee. 10 Ak'õrepa ma ûraa p'ãpiji ak'ùpiit'ee sãga iru ode t'îudai. Mamîda mùa ma ûraa ooik'araa bùda adade ook'ãri, iru ode t'îu k'ãyaara, o k'achiade t'îuji. 11 Mù p'ek'au k'achia ooyaa bù k'ap'ùapa mù k'ûrat'aaji. Oopii k'ãyaara Ak'õrepa Ûraa p'ãpidade jara bùk'a, oopiji ma ûraade jara bù oonaadamerã, mãgá mù atuapiit'ee.
12 Tachi Ak'õrepa Moisemaa ûraa p'ãpida pia bù, ichia ûraa jarada chaa. Mùa mãga jara bù ma ûraa uchiada perã Tachi Ak'õre t'ãri pia bùdeepa. Iru k'achia wêe bapari. Mapa ma ûraa k'aurepa Ak'õrepa ak'ùi eperãarãpa oopata k'awaait'ee pia wa k'achia.
13 Mãga pùrã, ¿jaraik'ã Tachi Ak'õre Ûraa k'aurepa mù atua baji? ¡Mãga–e! Mù p'ek'au k'achia ooyaa bù k'ap'ùapa mù atuapiji oopik'ãri Ak'õre Ûraa pia jara bù eperãarãpa oonaadamerã. Tachi Ak'õrepa k'îsia iru baji ichi ûraa k'aurepa mùa k'awaamerã wãara mù p'ek'au k'achia ooyaa bù k'ap'ùa audú k'achia bù.
14 Tachia k'awa p'anù Ak'õre Ûraa jõmaweda uchiaji ichi Jauredeepa. Mamîda mùa p'oyaa oo–e ma ûraade jara bùk'a, mù p'ek'au k'achia ooyaa bù k'ap'ùa mù chiparik'a bairã. Mãgùpa mùmaa ichita k'achia oopipari. 15 K'awa–e sãgap'eda oopari mãgùpa oopi bùk'a. Mùa oo–e wãara mùchi t'ãripa oo k'inia bùk'a. Ma k'ãyaara oopari ne–inaa mùa ooamaa bù. 16 Mãga ook'ãri, ak'ùpi bù Tachi Ak'õre Ûraade wãarata jara bù. 17 Oo k'inia bù Cristopa oopi bùk'a. Mamîda mù p'ek'au k'achia ooyaa bù k'ap'ùapa ne–inaa k'achia mùmaa oopipari. 18 K'awa bù na p'ek'au k'achia ooyaa bù k'ap'ùade pia wê–e, mùchi k'îradoopa pia p'oyaa oo–e bairã, mãga oo k'inia bù mîda. 19 Oo–e ne–inaa pia, mùa oo k'inia bù. Jîp'a oopari ne–inaa k'achia, mùa oo k'inia–e bù. 20 Mãga oopari perã, k'awa bù p'ek'au k'achia ooyaa bù k'ap'ùapa mùmaa mãga oopipari.
21 Ne–inaa pia oo k'inia bak'ãri Ak'õrepa oopi k'inia bùk'a, ma p'ek'au k'achia ooyaa bù k'ap'ùapa mãga oopi k'inia–e. 22 Mù t'ãri o–îa bù Tachi Ak'õre Ûraa k'awa bairã. T'ãripa oo k'inia bapari made jara bùk'a. 23 Mamîda mù p'ek'au k'achia ooyaa bù k'ap'ùa presok'a bù. Mãgà chõo pùk'a bù mùchi t'ãri ome, at'ãri mù chipari ba k'inia bairã.
24 ¿Sãgapù ooima? ¡Mù chupùria chù! ¿K'aipa mù k'aripa ataima na p'ek'au k'achia ooyaa bù k'ap'ùa jua ek'ariipa? Mãgùpa mù waya o k'achiade t'îupi k'inia bù. 25 ¡Mamîda mùa gracias jarapari Tachi Ak'õremaa, Tachi Waibùa, Jesucristópata, mù k'aripa atada perã mù p'ek'au k'achia ooyaa bù k'ap'ùa jua ek'ariipa! Mùchi t'ãripa oo k'inia bù Ak'õre ûraade jara bùk'a. Mamîda mù k'achia ooyaa bù k'ap'ùapa at'ãri k'achia oopi k'inia bù.