Sãga p'anapata Tachi Ak'õre Jaure ome
8
1 Ma jõma jara aupadade k'îsiadak'ãri, tachia k'awa p'anù Tachi Ak'õrepa Jesucristo ome araa p'anùùrã atuapi–e pait'ee. 2 Cristode wãara ijãadak'ãri, Tachi Ak'õre Jaure ba chepari tachi ome. Iruata tachi uchiapipari tachi p'ek'au k'achia ooyaa bù k'ap'ùa jua ek'ariipa, ma k'aurepa atuanaadamerã. 3 Tachi Ak'õre Ûraa Moisemaa p'ãpidapa eperãarã p'oyaa k'aripa ata–e paji, eperãarãpa p'oyaa ooda–e p'anadairã ma ûraade jara bùk'a, ãchi p'ek'au k'achia ooyaa bù k'ap'ùa jua ek'ari p'anù misa. Mapa Tachi Ak'õrepa ichi Warra pëiji eperã jîp'aak'a bapariimerã mãik'aapa piumerã tachi pari, tachia p'ek'au k'achia oopata jõmaweda wêpapiit'ee. Mãgapù Cristopa tachi p'ek'au k'achia ooyaa bù k'ap'ùa p'oyaaji. 4 Mãga ooji tachi ijãapataarã p'anapataadamerã Ak'õre Ûraa p'ãdade jara bùk'a. Mãgá p'anadai oodak'ãri Ak'õre Jaurepa oopi bùk'a, tachi p'ek'au k'achia ooyaa bù k'ap'ùapa oopii k'ãyaara.5 Chi oo k'inia p'anapataarãpa ãchi p'ek'au k'achia ooyaa bù k'ap'ùapa oopi bùk'a, mãga oopata jùrùpata perã ãchia oo k'inia p'anù aupai. Mamîda chi oo k'inia p'anapataarãpa Tachi Ak'õre Jaurepa oopi bùk'a, mãga oopata jùrùpata perã Tachi Ak'õrepa k'inia bù. 6 Ma awara chi oo k'inia p'anapataarãpa ãchi p'ek'au k'achia ooyaa bù k'ap'ùapa oopi bùk'a o k'achia jùrùpata. Mãgá atuadait'ee. Mamîda chi oo k'inia p'anapataarãpa Ak'õre Jaurepa oopi bùk'a, k'ãiwee p'anapata Ak'õre k'îrapite, iru ode p'anadairã mãik'aapa ùt'aa wãdait'ee perã. 7 Mãgee oo k'inia p'anapataarãpa ãchi p'ek'au k'achia ooyaa bù k'ap'ùapa oopi bùk'a Tachi Ak'õre k'îra unuamaa iru p'anapata. Mapa oo k'iniadak'aa iru ley p'ãdade jara bùk'a. Wãara mãgá p'oyaa oodak'aa, Ak'õre Jaure wêe p'anadairã. 8 Ma awara ne–inaa wê–e mãgee eperãarãpa oodai Tachi Ak'õrepa ãchi pia ak'ùmerã.
9 Jõdee Ak'õre Jaure pãchi t'ãride baparida a p'anù. Mãga pùrã, parãpa oo k'inia p'anapataadaipia bù iru Jaurepa oopi bùk'a. Tachia k'awa p'anù Cristo Jaure wêe beerã Cristodeerã–e. 10 Mamîda Cristo pãchi t'ãride bapari pùrã, parã jaure ichita chok'ai bapariit'ee. Maperã parã k'ap'ùa piudaruta pùjida p'ek'au k'achia oopata k'aurepa, Cristo k'aurepa Tachi Ak'õrepa parã p'ek'au k'achia wêe ak'ùpari. 11 Ma awara Tachi Ak'õre Jaure pãchi t'ãride bapari pùrã, parã jai–idaadak'ãri, irua parã k'ap'ùa chok'ai p'irabaipiit'ee ichita p'anapataadamerã. Mãga k'awa p'anù Tachi Ak'õrepa mãga ooda perã Cristo ome, iru piup'eda p'irabaipik'ãri.
12 Mãpai âpemaarã, Tachi Ak'õrepa tachi Cristode ijãapataarã mãgá k'aripapari perã ichi Jaure k'ap'ùa, p'anapataadaipia bù iru Jaurepa p'anapi bùk'a. Ârá tachi ijãapataarã Cristo jua ek'ari p'anapata. Mãga bùta ¿sãga oodaima tachi p'ek'au k'achia ooyaa bù k'ap'ùapa oopi bùk'a? 13 Parã p'anaruta pùrã mãgà p'ek'au k'achia ooyaa bù k'ap'ùapa p'anapi k'inia bùk'a, atuadait'ee. Mamîda mãgùpa oopi bùk'a oo amaaruta pùrã mãik'aapa Ak'õre Jauremaa oopiruta pùrã irua oopi bùk'a, parã p'ek'au k'achia ooyaa bù k'ap'ùa p'oyaadait'ee mãik'aapa Ak'õre truade p'ananadait'ee.
14 Jõmaweda Tachi Ak'õre Jaurepa p'anapi bùk'a p'anapataarã Tachi Ak'õre warrarã. 15 Cristode ijãadak'ãri, Tachi Ak'õrepa ichi Jaure pëi–e paji parã p'era p'anapataadamerã esclavoorãk'a, irua parã miapii jîak'aapa. Jîp'a pëiji ichi warrarã padamerã. Maperãpù Tachi Ak'õremaa ùt'aa t'âdak'ãri, jarapata: “¡Abbá!a ¡Mù Ak'õre!” 16 Mãga jaradai Ak'õre Jaurepa tachi t'ãrimaa k'awapipari perã wãara Tachi Ak'õre warrarã. 17 Mãgá Tachi Ak'õre warrarã p'anadairã, iru p'anadait'ee jõmaweda irua k'îsia iru bù ichideerã–it'ee ùt'ari p'ananadak'ãri. Ne–inaa iru p'anadait'ee iru Warra Cristopa iru bùk'a. Iru na eujãde bù misa, ijãadak'aa beerãpa iru jùrùpachida miapidait'ee. Mãgá tachi auk'a jùrùpata. Mapa ùt'ari panadak'ãri, Tachi Ak'õrepa tachi Cristok'a papiit'ee, auk'a iru k'îra wãreede p'anapataadamerã.
Tachi Ak'õre k'îra wãree unudait'ee
18 Mùchi t'ãride mùa nãga k'awa bù. Na p'ek'au eujãde p'anù misa, tachi mak'ùara miada–e p'anù k'îsiadak'ãri jõma Tachi Ak'õrepa tachimaa unupiit'ee ichi k'îra wãree eujãde. 19 Na p'ek'au eujãde mãgá mia jõnù jida, o–îa nù p'anù iru ewari waibùa ewate. Jõma ne–inaa Tachi Ak'õrepa ooda jida nùmaa bù irua ak'ùpimerã ichi warrarã Cristo cheru ewaride. 20 Chi naapema eperãpa oo–e pak'ãri Tachi Ak'õrepa jaradak'a, k'achiade baaiji. Maperã Ak'õrepa ichia ooda jõmaweda auk'a k'achiade baaipiji, ma ne–inaa Ak'õrepa ooda mãga k'inia–e baji mîda. 21 Mamîda ârá ma ooda jõmaweda nùmaa bù ma ewari cherude ma k'achia baaidadeepa auk'a uchiait'ee perã Tachi Ak'õre warrarã ome. Iru warrarã waa piuda–e pait'ee mãik'aapa Tachi Ak'õre k'îra wãree eujãde p'ananadait'ee. 22 K'awa p'anù Tachi Ak'õrepa ooda jõmaweda at'ãri mia nâbù, wêra mia nâbaparik'a ichi warra ewaa t'oit'ee pak'ãri. 23 Tachi ijãapataarã jida mia chitoonù na p'ek'au eujãde p'anù misa, ne–inaa pipùara bù iru p'anù mîda, Tachi Ak'õrepa k'îsia iru bùdepema teeit'ee Cristode ijãapataarãmaa. Mãgà iru Jaure. Mãgá iru Jaure tachi ome iru p'anù mîda, tachi t'ãride k'îsia paraa p'anapata na p'ek'au eujãde p'anù misa. Auk'a o–îa nùpata Tachi Ak'õrepa tachi k'ap'ùa chiwidi p'irabaipimerã mãik'aapa ùt'ari tachi ichi warrarãk'a p'anapimerã. 24 Ichia tachi o k'achiadeepa k'aripa atadak'ãriipa, k'awajida ewari cherude wãara mãgá k'ap'ùa chiwidide p'anapataadait'ee iru k'îra wãree truade. Ma k'ap'ùa chiwidi iru p'anadap'edaa paara, nùda–e pak'ajida k'ap'ùa chiwidi iru p'anadait'ee. 25 Mamîda wãara ijãa p'anù pùrã ma k'ap'ùa chiwidi iru p'anadait'ee, waide unuda–e p'anù mîda, choodait'ee tachia nù p'anùde.
26 Mãgá choodai Tachi Ak'õre Jaurepa tachi k'aripapari perã, audú k'îsia paraa p'anadak'ãri maa–e pùrã tachi t'ãride juatau wêe pùk'a p'anadak'ãri. Mãga p'anùde tachi k'îradoopa p'oyaa ùt'aa t'âda–e pak'ãri Ak'õremaa, iru Jaurepa enenee nâbù tachi pari îyapaa bùdepai, pedee wêe. 27 Mãpai Tachi Ak'õrepa tachi ijãapataarã t'ãride iru bù k'awapari perã, ûripari ichi Jaurepa jara k'inia bù tachi k'ap'ùa pari. Ichi Jaurepa ichita iidipari irua k'inia bùk'a.
28 Mapa k'awa p'anù Tachi Ak'õrepa pia uchiapiit'ee jõmaweda ne–inaa p'asaru ichi k'inia iru p'anùùrãmaa. Mãga ooit'ee ichiata mãùrã jùrùda perã Cristode ijãadamerã. 29 Eperãarã ooi naaweda, Tachi Ak'õrepa k'awaji mãùrãpa iru k'inia iru p'anadait'ee. Mapa k'îsia iru baji mãùrã ichi warra jîak'a papiit'ee. Cristo chi Warra naapema paji. Maap'eda irude ijãapataarã iru âpemaarãk'a p'aneejida. 30 Pia jarait'eera, naaweda Tachi Ak'õrepa k'awaji eperãarã ûk'uruurãpa iru k'inia iru p'anadait'ee. Mapa mãùrã jùrùpari Cristode ijãadamerã. Mãpai, ijãadak'ãri, irua ãchi p'ek'au k'achia wêe ak'ùpari ichi warra Cristo ak'ùparik'a. Maperãpù ãra p'anapiit'ee ichi trua k'îra wãree bùde.
Cristode ijãapata k'aurepa Tachi Ak'õrepa tachi k'inia iru bapari
31 K'îsiadak'ãri jõmaweda Tachi Ak'õrepa ooparide tachi ijãapataarã k'aripait'ee, ¿k'ãata waa jaradaima? Tachi Ak'õrepa tachi mãgá k'aripapari pùrã, ¿k'aipa tachi k'achia ooima? 32 Tachi Ak'õrepa wãak'a–e paji pùrã ichi Warra piupik'ãri tachi pari, audupùara wãak'a–e pait'ee ne–inaa awaraa ichia jara bù teeit'ee tachi Cristode ijãapataarãmaa. 33 ¿K'aipa Tachi Ak'õrepa jùrùt'eradaarã ùmùateeima, irua ãra pia–ee ak'ùmerã? Tachi Ak'õrépata tachi p'ek'au k'achia wêe ak'ùpari Cristopa ooda k'aurepa. 34 Mãga–e pùrã, ¿k'aipa Cristode ijãapataarã atuapiima? Jesucristo piuji mãik'aapa chok'ai p'irabaiji tachi o k'achiadeepa k'aripa atait'ee. Maap'eda ùt'ari Tachi Ak'õre juaraare banaji chupùria iidiit'ee Ak'õremaa tachi pari. 35 Mãga–e pùrã, ¿k'aipa tachi ãyaa ataima Cristo juadeepa, irua tachi k'inia–ee iru bamerã? Mãgá ãyaa wãda–e pai nepùrade baairuta pùjida maa–e pùrã audú k'îsia jõnù pùjida maa–e pùrã awaraarãpa tachi k'achia ooruta pùjida Cristode ijãapata perã maa–e pùrã jarrapisia jõnù pùjida maa–e pùrã p'aru wêe p'anù k'aurepa chupùria chitoonù pùjida maa–e pùrã awaraarãpa tachi jùrùruta pùjida miapidait'ee wa peedait'ee. ¡Ne–inaa apidaapa tachi ãyaa wãpida–e Cristo juadeepa! 36 Tachi Ak'õre Ûraa p'ãdade jara bù:
‘Ak'õre, taipa pù k'inia iru p'anapata perã, k'achia beerãpa tai ip'ii jùrùpata peedait'ee. Oveja peepataarãpa oveja iru p'anapatak'a ateedak'ãri peedait'ee, mãga pùk'a mãgee k'achia beerãpa tai iru p'anù.’ (Salmos 44.22)
37 K'achia beerãpa tachi ijãapataarã at'ãri mãgá iru p'anù mîda, tachia ne–inaa jõmaade ãchi p'oyaapata, tachi k'inia iru baparipa k'aripapari perã. 38 Cristopa tachi mãgá k'inia iru bapari perã, mùchi t'ãripa mùa nãga ijãa bù. Ãyaa wãda–e iru juadeepa piuruta pùjida maa–e pùrã mia jõnù pùjida na eujãde p'anù misa. Cristo juadeepa tachi ãyaa wãpida–e pai angeleerãpa, netuaraarãpa, na p'ek'au eujãdepemaarã waibùarãpa pida. Apidaapa mãgá wãpida–e pai ne–inaa ârapema wa t'êepema ewari cherude. 39 Ùt'ùpùara wãruta pùjida pajãde maa–e pùrã edupùara wãruta pùjida eujã ek'ari maa–e pùrã t'ùmùpùara wãruta pùjida na p'ek'au eujãde, ãyaa wãda–e pai iru juadeepa. Mùa mãga jara bù wê–e perã ne–inaa tachi ãyaa wãpiit'ee Tachi Ak'õre juadeepa Tachi Waibùa, Jesucristopa, tachi k'inia iru bapari perã.